قاراعاندىدا بالالارىنا كومەكتەسۋدەن باس تارتقان اليمەنتشى قالا كوشەلەرىن قاردان تازارتۋعا ءماجبۇر بولدى، دەپ حابارلايدى «ادىرنا» ءتىلشىسى stan.kz اقپاراتتىق اگەنتتىگىنە سىلتەمە جاساپ.
وبلىستىق قىلمىستىق-اتقارۋ جۇيەسى دەپارتامەنتىنىڭ مالىمەتىنشە، 2014 جىلى اجىراسقاننان كەيىن ەر ادام جالاقىسىنىڭ ۇشتەن ءبىرىن كامەلەتكە تولماعان ەكى بالاسىنا اقشا تولەۋگە مىندەتتەلگەن. الايدا وسى ۋاقىتقا دەيىن ول بىردە-ءبىر رەت اليمەنت تولەمەگەن جانە 3,7 ميلليون تەڭگەگە قارىز بولعان.
"ول جۇمىسقا ورنالاسقىسى كەلمەدى جانە بالالاردى اسىراۋعا ماتەريالدىق كومەك كورسەتپەدى. بىراق ول ءوزىنىڭ اليمەنتتىك مىندەتتەمەلەرى تۋرالى ءبىلدى جانە ولاردى ورىنداۋعا ناقتى مۇمكىندىك الدى. ەر ادام ەڭبەك قاتىناستارىن جاساماعان جۇمىسىنان بەيرەسمي تابىس الدى. وعان سوت اكتىسىن ورىنداماعانى ءۇشىن قىلمىستىق جاۋاپكەرشىلىك تۋرالى بىرنەشە رەت ەسكەرتىلدى. دەگەنمە اليمەنتتەردى تولەۋ بويىنشا مىندەتتەردەن قاساقانا جالتارعان", - دەدى ۆەدومستۆودا.
وسىدان كەيىن ەر ادامنىڭ ۇستىنەن سوتقا تاعى ارىز بەرىلگەن، ناتيجەسىندە جاڭا ۇكىم شىعارىلدى. ەندى اليمەنت تولەۋدەن جالتارعان اكە قاراعاندى كوشەلەرىن تازالايدى. وعان 300 ساعاتتىق قوعامدىق جۇمىس تاعايىندالدى. جالتارعان جاعدايدا ەر ادام قاماۋعا الىنادى.
"ول قالانىڭ ورتالىق ساياباعىنداعى قاردى تازالايدى. وندا "قوعامعا قارىزدى وتەۋ" دەگەن جازۋى بار اشىق-قىزعىلت كەۋدەشە كيدى. بۇل جارىق شاعىلىستىرعىش كەۋدەشەلەر قوعامدىق جۇمىستاردى ورىنداۋ ءۇشىن پروباتسيا قىزمەتىندە ەسەپتە تۇرعان سوتتالعانداردى قامتاماسىز ەتۋ جونىندەگى پيلوتتىق جوبا بولىپ تابىلادى. ول وتكەن جىلدىڭ قىركۇيەك ايىنىڭ باسىندا وبلىستىق قاج دەپارتامەنتى قاراعاندى اكىمدىگىمەن جانە وبلىس پروكۋراتۋراسىمەن بىرلەسىپ ىسكە قوسىلدى", - دەپ تولىقتىردى ۆەدومستۆودا.
«ادىرنا» ۇلتتىق پورتالى
