قر پرەزيدەنتىنىڭ كومەكشىسى ەرلان كارين مەملەكەت باسشىسىنىڭ «ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويۋىنا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
«پرەزيدەنت قاسىم-جومارت توقاەۆ
«ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويدى. وسىلايشا، مەملەكەت باسشىسىنىڭ 2019 جىلعى جەلتوقساندا ۇلتتىق قوعامدىق سەنىم كەڭەسىنىڭ ەكىنشى وتىرىسىندا ايتىلعان ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا قوسىلۋ تۋرالى باستاماسى تۇپكىلىكتى تۇردە ىسكە اسىرىلدى (بۇعان دەيىن 2020 جىلعى 23 قىركۇيەكتە نيۋ-يوركتە بۇۇ شتاب-پاتەرىندە قازاقستاننىڭ وسى ۇيىم جانىنداعى تۇراقتى وكىلى قايرات وماروۆ ەكىنشى فاكۋلتاتيۆتىك حاتتاماعا قول قويعان بولاتىن). بۇل باستاما پرەزيدەنتتىك ساياسي رەفورمالار پاكەتىنىڭ ءبىر بولىگى بولدى. وسى قۇجاتقا قوسىلۋ جونىندەگى ماسەلەنى كوتەرگەن ءبىزدىڭ قۇقىق قورعاۋشىلارىمىزدى، ۇلتتىق كەڭەس مۇشەلەرىن باستامالارىنىڭ تۇپكىلىكتى ىسكە اسىرىلۋىمەن قۇتتىقتايمىن. بۇل ءبىزدىڭ ەلىمىزدەگى ءتيىمدى قوعامدىق ديالوگتىڭ تاعى ءبىر مىسالى. جاقىندا ۇلتتىق كەڭەس اياسىندا ايتىلعان باسقا دا ماڭىزدى باستامالار قولعا الىندى. بۇگىنگى تاڭدا بۇۇ-عا مۇشە 193 مەملەكەتتىڭ 88 - ءى ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانىڭ قاتىسۋشىلارى بولىپ تابىلادى",-دەپ جازدى ەرلان قارين ءوزىنىڭ تelegram-كانالىندا.
«ادىرنا» ۇلتتىق پورتالى
