بعم جوعارى وقۋ ورىندارىنىڭ 2020 جىلعى رەيتينگ قورىتىندىلارىن جاريالادى، دەپ حابارلايدى «ادىرنا» ءتىلشىسى مينيسترلىكتىڭ ءباسپاسوز قىزمەتىنە سىلتەمە جاساپ.
زەرتتەۋ جۇمىستارىن قر ءبىلىم جانە عىلىم مينيسترلىگىنىڭ تاپسىرىسى بويىنشا جۇمىس بەرۋشىلەردىڭ قاتىسۋىمەن "اتامەكەن" ۇلتتىق كاسىپكەرلەر پالاتاسى جۇرگىزدى. رەيتينگكە ءىىم، ۇقك جانە قورعانىس مينيسترلىگىنە باعىنىشتى جوو-لاردان باسقا ەلىمىزدىڭ بارلىق جوعارى وقۋ ورنى قاتىستى.
رەيتينگتى جاساۋ بارىسىندا تۇلەكتەردىڭ جۇمىسقا ورنالاسۋ كورسەتكىشتەرى، جوو-نىڭ ءبىلىم بەرۋ باعدارلامالارىنىڭ ساپاسى جانە ءبىلىم الۋشىلاردىڭ جەتىستىكتەرى ەسكەرىلدى. زەرتتەۋ ناتيجەلەرى بويىنشا 2020 جىلى تۇلەكتەردى جۇمىسقا ورنالاستىرۋدىڭ ورتاشا كرسەتكىشى وتكەن جىلدار دەڭگەيىندە قالىپ وتىر جانە 71%-دى قۇرايدى. مامانداندىرىلعان اگەنتتىكتەردە ءبىلىم بەرۋ باعدارلامالارىنىڭ 73%-ى اككرەديتتەلگەن، وقىتۋشىلاردىڭ 72%-ى پراكتيكالىق تاجىريبەگە يە. سونداي-اق 36 جوو ستۋدەنتتەرى ستارتاپ-جوبالارىن ىسكە اسىردى.
جالپى، جۇمىس بەرۋشىلەردىڭ ءبىلىم بەرۋ باعدارلامالارىنىڭ ساپاسى مەن وزەكتىلىگىنە قاناعاتتانۋ دەڭگەيى 2018 جىلعى كورسەتكىشتەرمەن سالىستىرعاندا ۇشتەن بىرگە ارتتى. جوعارى وقۋ ورىندارىنا بەرىلگەن اكادەميالىق ەركىندىك جۇمىس بەرۋشىلەردىڭ قاتىسۋىمەن ءبىلىم بەرۋ باعدارلامالارىن دەربەس ازىرلەۋگە مۇمكىندىك بەردى. ناتيجەسىندە ءبىلىم بەرۋ باعدارلامالارىنىڭ ساپاسى جاقسارعانى بايقالادى. شەتەلدىك اگەنتتىكتەردە مامانداندىرىلعان اككرەديتتەۋدەن وتكەن باعدارلامالار سانى 8,2%-عا ارتتى.
جۇمىس بەرۋشىلەردىڭ پىكىرى بويىنشا 2020 جىلدىڭ اۋتسايدەرلەرى:
«سىرداريا» ۋنيۆەرسيتەتى;
شىمكەنت ۋنيۆەرسيتەتى;
حالىقارالىق گۋمانيتارلىق-تەحنيكالىق ۋنيۆەرسيتەتى;
«استانا» ۋنيۆەرسيتەتى;
تاراز يننوۆاتسيالىق-گۋمانيتارلىق ۋنيۆەرسيتەتى;
اكادەميك ا.قۋاتبەكوۆ اتىنداعى حالىقتار دوستىعى ۋنيۆەرسيتەتى;
شەت تىلدەر جانە ىسكەرلىك كارەرا ۋنيۆەرسيتەتى;
قازاق-ورىس حالىقارالىق ۋنيۆەرسيتەتى;
قىزىلوردا ق. «بولاشاق» ۋنيۆەرسيتەتى;
«اقمەشىت» گۋمانيتارلىق-تەحنيكالىق ينستيتۋتى.
– "سىرداريا" ۋنيۆەرسيتەتى، شىمكەنت ۋنيۆەرسيتەتى، حالىقارالىق گۋمانيتارلىق-تەحنيكالىق ۋنيۆەرسيتەتى جانە "استانا" ۋنيۆەرسيتەتى ءۇشىنشى جىل قاتارىنان اۋتسايدەرلەر قاتارىندا. رەيتينگ ناتيجەلەرى قوسىمشا كريتەري رەتىندە جوعارى ءبىلىمى بار كادرلاردى دايارلاۋعا مەملەكەتتىك ءبىلىم بەرۋ تاپسىرىسىن ءبولۋ كەزىندە ەسكەرىلەدى. بيىل العاش رەت مەملەكەتتىك تاپسىرىس 36 جوعارى وقۋ ورنىندا ورنالاستىرىلعان جوق", – دەپ اتاپ ءوتتى قر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
«ادىرنا» ۇلتتىق پورتالى
