جامبىلدىق پوليتسەيلەر اۆتوكولىكتىڭ جۇكسالعىشىنان 3 قاپ ماريحۋانا تاپتى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
25 جەلتوقساندا جامبىل وبلىسىنىڭ پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جەدەل-ىزدەستىرۋ شارالارى كەزىندە مەركى – شۋ – بۋرىلبايتال اۆتوجولىندا «ۆاز-21014» ماركالى اۆتوكولىگىن توقتاتىپ، ونىڭ جۇكسالعىشىنان ءۇش پوليەتيلەن قاپتى تاركىلەدى. قاپتاردىڭ ىشىندەگى زات جالپى سالماعى 8 كەلى 600 گرامم كەپتىرىلگەن ماريحۋانا بولىپ شىقتى. بۇل فاكت بويىنشا جامبىل وبلىسىنىڭ 28 جانە 31 جاستاعى ەكى تۇرعىنى، سونداي-اق نۇر-سۇلتان قالاسىنىڭ 31 جاستاعى تۇرعىنى ۇستالدى. ولار مەركى اۋدانىنىڭ قۇمعا جاقىن ماڭداعى ايماقتارىندا ماريحۋانا جيناۋمەن اينالىسقان.
قر قك-ءنىڭ 296-بابىنىڭ 4-بولىگى (اسا ءىرى مولشەردەگى ەسiرتكi, پسيحوتروپتىق زاتتاردى، سول تەكتەستەردى وتكىزۋ ماقساتىنسىز زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ) بويىنشا سوتقا دەيىنگى تەرگەۋ باستالدى. ۇستالعاندار ءوز كىنالارىن مويىندادى، ولار مەركى اۋدانىنىڭ پب ۋاقىتشا ۇستاۋ يزولياتورىنا قامالدى.
«ادىرنا» ۇلتتىق پورتالى
