جىل سايىن قازاقستاندا 30 مىڭعا جۋىق اۋتوپسيا جۇرگىزىلەدى. بۇل تۋرالى پروفەسسور فرانتس گاليتسكي "قازاقستان رەسپۋبليكاسىنىڭ كەيبىر زاڭنامالىق اكتىلەرىنە سوت-ساراپتاما قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن تالقىلاۋ جونىندەگى ونلاين-دوڭگەلەك ۇستەل بارىسىندا ايتتى، دەپ حابارلايدى «ادىرنا»تىلشىسى.
ونىڭ ايتۋىنشا، بۇل كورسەتكىش ەلىمىزدىڭ سوت-ساراپتامالىق قۇرامى ءۇشىن ايتارلىقتاي جۇكتەمە جانە بىرقاتار ايماقتاردا كادرلاردىڭ جەتىسپەۋشىلىگى بايقالادى. «اۋتوپسيا، ياعني ءمايىتتى سويۋ سانىن ازايتساق، مامان جەتىسپەۋشىلىگى ماسەلەسىن شەشەمىز», – دەيدى دارىگەر گاليتسكي.
دۇنيەجۇزىلىك بانكتىڭ «سوت تورەلىگى سەكتورىن ينستيتۋتسيونالدىق نىعايتۋ – سوت ساراپتاماسىن كۇشەيتۋ» جوباسىنىڭ ۇيلەستىرۋشىسى، م.س. نارىكباەۆ اتىنداعى كازگيۋ ۋنيۆەرسيتەتىنىڭ پروۆوستى سەرگەي پەننىڭ پىكىرىنشە، ۆيرتۋالدى 3D-اۋتوپسيا ءداستۇرلى اۋتوپسياعا بالاما بولا الادى.
«قازاقستان رەسپۋبليكاسىنىڭ ادىلەت مينيسترلىگى ەكسپەريمەنتتىك شارا رەتىندە توموگرافتىڭ كومەگىمەن 3D-اۋتوپسيانى ەنگىزۋدى جوسپارلاپ وتىر. تەحنيكالىق تۇرعىدان الساق شىعىنى از ەمەس، سوندىقتان ەلىمىزدىڭ بارلىق وڭىرىندە بىردەن قولدانۋ قيىنعا سوعادى. 3D اۋتوپسيا كەزىندە دەنەگە پىشاق تيمەي ادام ءولىمىنىڭ نەگىزگى سەبەبى انىقتالادى. زەرتتەۋ بارىسىندا ونىڭ ىشكى اعزالارىنا زاقىم كەلمەيدى», – دەپ حابارلادى سەرگەي پەن ونلاين دوڭگەلەك ۇستەلدە.
ماجىلىسكە ەنگىزىلگەن زاڭ جوباسى قازاقستاننىڭ سوت ساراپتامالىق قىزمەتىن رەفورمالاۋ جولىنداعى ۇلكەن قادام ەكەنىن ەسكەرە كەلە، قر ادىلەت مينيسترلىگى ساراپتاما قىزمەتىن ۇيىمداستىرۋ دەپارتامەنتىنىڭ ديرەكتورى تيمۋر يسابەكوۆ 3D اۋتوپسيا جەكە سوت-ساراپتاما قىزمەتىنىڭ جۇيەسىن نەعۇرلىم ءتيىمدى ەتەتىنىن اتاپ ءوتتى.
«ادىرنا» ۇلتتىق پورتالى
