بارىمىزدە ورىن بار

1896
Adyrna.kz Telegram

نۇرسۇلتان-قاتارداعى وقۋشىنىڭ ءبىرى. اعاسى ەسىمىن ەلىمىزدىڭ تۇڭعىش پرەزيدەنتى سەكىلدى ەلگە قالاۋلى، ۇلتقا ەڭبەگى سىڭەتىن ازامات بولسىن دەگەن نيەتپەن قويعان. بارلىعى سەكىلدى ءبىزدىڭ كەيىپكەرىمىز دە مەكتەپ تابالدىرىعىن اتتاپ، سول جەردە 11 جىل ءبىلىم العان. ءدال وسى كەزەڭدە ونىڭ ومىرىندەگى ەڭ باستى سۇراقتاردىڭ ءبىرى پايدا بولدى: "مەن كىم بولامىن؟ قايدا بارامىن؟".

باتىس ەلدەرى تاجىريبەسىندە "Gap year" تۇسىنىگى بار. ياعني، ءوزىڭدى تانۋعا بەرىلەتىن سەنىڭ ۋاقىتىڭ. جالپى ورتا ءبىلىم بەرەتىن مەكتەپتى بىتىرگەننەن كەيىنگى ۋاقىت. بىزدە مەكتەپ بىتىرگەننەن كەيىن جوعارى وقۋ ورنىنا ءتۇسۋ كەرەك دەگەن تۇسىنىك بار. ال ءوزىڭدى تابۋ، ىشكى "مەن"-مەن تىلدەسۋ جانە ونى ءتۇسىنۋ وڭايلىقپەن كەلمەيدى. سول ءۇشىن جوعارى وقۋعا تۇسكەنىمەن ۋنيۆەرسيتەتتى بىتىرمەي تاستاپ كەتەتىندەر سانى ايتارلىقتاي كوپ.

نۇرسۇلتان "ق.جۇبانوۆ اتىنداعى اقتوبە وڭىرلىك ۋنيۆەرسيتەتىنە" تاۋ-كەن ءىسى ماماندىعىنا وقۋعا ءتۇستى. بۇل ماماندىققا ول ارمان جەتەگىنە ەرىپ، الداعى ومىرىنە ماقسات قويۋ ارقىلى تۇسكەن جوق. سول سەبەپتى وقۋدى اياقتاعان سوڭ، ءدال وسى سالادا قىزمەت ەتۋگە دايىن بولمادى. سولاي كەيىپكەرىمىز رەسمي تۇردە جۇمىسسىزدار قاتارىنا قوسىلدى.

جۇمىس - امالدىڭ جوقتىعىنان كۇنكورىس ءۇشىن بارىپ كەلەتىن جەر ەمەس. ول جان دۇنيەڭە ءلاززات سىيلاپ، سەنى ءوزىڭدى قوعامنىڭ قاجەت بولشەگى ساناۋىڭا جەتەلەۋ كەرەك. ال، نۇرسۇلتان سول مەكەندى تابا المادى. ول ءوزىن دامىتۋ ماقساتىندا دوستارىمەن قىتاي حالىق رەسپۋبليكاسىنا اتتاندى. بىراق شىعىس ەلى دە قاتتى قىزىقتىرا قويماعان سەكىلدى. جارتى جىلدا ول جاقتان دا قايتىپ كەلدى. مامىر ايىنا دەيىن سول قالىپتا ۇنسىزدىككە بەت بۇردى.

ادامنىڭ ومىرىندەگى ەڭ ۇلكەن وكىنىشى - زايا كەتكەن ۋاقىتى، وزىڭە نە كەرەگىن بىلمەۋ، ءوزىڭدى تانىماۋ نەمەسە... بۇل ءتىزىم تاۋسىلمايدى. اركىم ءۇشىن ارقالاي. اركىمنىڭ مۇمكىندىگى دە ءارتۇرلى. مامىر ايىنىڭ جايما شۋاق كۇندەرىنىڭ بىرىندە نۇرسۇلتانعا ءوز كۇشىن سىناپ كورۋ تۋرالى وي كەلدى. سول ماقساتتا "Zhas project" جوباسىنا قاتىسۋعا بەل بۋدى. ناتيجەسىندە جەڭىپ شىعىپ، ءوز كومانداسىمەن از قامتىلعان بالالارعا التى اي بويى اعىلشىن ءتىلىن ۇيرەتتى. بۇل كەزەڭ ونىڭ ەسىنەن مۇلدە كەتپەيدى. كىشكەنە بۇلدىرشىندەرگە كومەك بەرۋ ارقىلى قوعامنىڭ قانشالىقتى ءبىر-بىرىمەن تىعىز بايلانىستا ەكەنىن ۇعىنا باستادى. ءومىرىنىڭ ءدال وسى كەزەڭى نۇرسۇلتاننىڭ بولاشاعىنا باعىت - باعدار بەردى.

بولاشاقتى نۇرسۇلتان ماماندىعى بويىنشا جۇمىسپەن بايلانىستىردى. ال ول ديپلوممەن قايدا بارۋعا بولادى؟ كىم سەنى ء"يا، كەلە عوي، مەن سەنى ۇزاق كۇتتىم",-  دەپ ەسىگىن ايقارا اشىپ وتىرادى؟

قۋانىشقا وراي، "ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ" تاۋ-كەن ءىسى ماماندىعىن بىتىرگەن ستۋدەنتتەردى ەسىگىن اشىپ كۇتىپ وتىراتىندار بار ەكەن. ول تۋرالى  ۋنيۆەرسيتەتتىڭ مەتاللۋرگيا، تاۋ-كەن ءجان مۇناي-گاز ءىسى كافەدراسىنىڭ دوتسەنتى، تەحنيكا عىلىمدارىنىڭ كانديداتى كەلامانوۆ باۋىرجان ساتىبالدىۇلى:

«ءبىزدىڭ كافەدرا مەن "قازحروم" تۇك" اق اراسىندا بەس جىل سايىن جاڭارىپ وتىراتىن كەلىسىم بار. باكالاۆر مەن ماگيستراتۋرادا وقيتىن ستۋدەنتتەرىمىز كاسىپتىك تاجىريبەدەن وتە الادى. ودان بولەك، 2000 جىلدان بەرى ۇزدىك وقيتىن مەتاللۋرگ ماماندىعىنىڭ ءۇش ستۋدەنتىنە كاسىپورىن ارنايى شاكىرتاقى تاعايىنداپ كەلە جاتىر. ۋنيۆەرسيتەتىمىزدە كاسىپورىن جۇمىسشىلارى ارنايى شەبەرلىك لەكتسيالارىن وقيدى، بىرىگىپ سايت-جۋرنالدارعا ماقالالار جازادى. زەرتتەۋ جۇمىستارىمەن اينالىساتىن عىلىم جولىنداعى ستۋدەنتتەرگە ارنايى وزدەرىنىڭ قۇرالدارىنا رۇقسات بەرگەن. وقۋدى ءبىتىرىپ ديپلوم العاننان كەيىن ءۇش ايدىڭ ىشىندە بارعان كافەدرا تۇلەكتەرىن مىندەتتى تۇردە جۇمىسقا قابىلدايدى. ورتاشا ەسەپپەن ءبىزدىڭ تۇلەكتەرىمىزدىڭ 70-80 پايىزى كاسىپورىنعا جۇمىسقا ورنالاسادى",- دەيدى.

"قازحروم" تۇك" اق كورپوراتيۆتىك كوممۋنيكاتسيا ءبولىمىنىڭ باسشىسى ماشكارينا ۆيكتوريا يۋرەۆنانىڭ دەرەگىنە سايكەس كاسىپورىن ۋنيۆەرسيتەت ستۋدەنتتەرىنىڭ تاجىريبەدەن وتۋىنە، دۋالدى وقىتۋ جۇيەسىنىڭ ەلەمەنتتەرىن ەنگىزۋگە جاعداي جاسايدى. قازىرگى تاڭدا اقتوبە  فەرروقورىتپا زاۋىتىندا 35 جاسقا دەيىنگى 2086 ادام (49%), ءدوڭ تاۋ-كەن بايىتۋ كومبيناتىندا 35 جاسقا دەيىنگى 3360 (46%) جاستار قىزمەت اتقارۋدا.

نۇرسۇلتان دا وسى جاستاردىڭ قاتارىنا قوسىلىپ، اقتوبە فەرروقورىتپا زاۋىتىنىڭ كەلىسىمشارتتاردى قولداۋ بولىمىنە جۇمىسقا تۇردى. ارىپتەستەرىمەن تەز ءتىل تابىسۋعا "جاستار كەڭەسى" قولداۋ ءبىلدىرىپ، سول قۇراممەن تومەندەگىدەي باعىتتار بويىنشا قوسىمشا جۇمىستار ىستەۋدە:

  • كومپانياداعى جاس مامانداردى كاسىبي بەيىمدەۋ، عىلىمي-تەحنيكالىق جۇمىستارعا تارتۋ بويىنشا جۇمىس;
  • جۇمىسشىلاردىڭ بىلىكتىلىگىن ارتتىرۋعا كومەك;
  • جاس مامانداردىڭ قۇقىقتارىن قورعاۋ، باسقا ۇجىمدارداعى ارىپتەستەرىمەن شىعارماشىلىق بايلانىستاردى دامىتۋ، عىلىم مەن تەحنولوگيا تۋرالى ءبىلىمدى، جاستار اراسىندا سالاۋاتتى ءومىر سالتىن، كورپوراتيۆتى قۇندىلىقتاردى ناسيحاتتاۋ.

ەڭ باستىسى وعان اينالىساتىن ءىسى ۇنايدى! سوعان قاراعاندا ءدال وسى ماماندىققا نۇرسۇلتان شاتاسىپ كەلمەگەن سەكىلدى.

پسيحولوگ سەيتوۆا گۇلجانات جەكسەنقىزى ماماندىق تاڭداۋدا اتا-انانىڭ ىقپالى باسىمىراق ەكەنىن ايتادى.

"كاسىبي باعىت باعدار بەرۋ بارىسىندا وقۋشى ماماندىقتىڭ قوعامداعى دارەجەسىنە كوپ كوڭىل بولەتىنىن بايقايمىن. جەكە كوزقاراستارىن بىلدىرەتىن وقۋشىلار از دەۋگە بولادى.  وقۋعا تۇسپەگەن جاعدايدا كوبىنە وكىنىش، ءوزىن كىنالاۋ باسىم بولىپ كەتەدى", -دەيدى  پسيحولوگ مامان.

كاسىپكەرلەرگە قاجەتتىلىك كوپ بولۋى مۇمكىن. بىراق، بۇل مەملەكەتكە ۇستاز نەمەسە ءبيشى كەرەك ەمەس دەگەندى بىلدىرمەيدى. ءبىر-بىرىمەن تىعىز بايلانىسقان قوعامنىڭ قاجەت ەمەس مۇشەسى جوق. اسىقپاي انىق باسىپ، كەتىگىن تاۋىپ قالانعان دۇرىس. بارىمىزدە ورىن بار.

 

پىكىرلەر