الماتى وبلىسىندا 18 كولىك سوقتىعىسقان ءىرى جول اپاتى بولدى، دەپ حابارلايدى "ادىرنا" ۇلتتىق پورتالى.
15 قاڭتار كۇنى تاڭعى ساعات 07:30 شاماسىندا الماتى – وسكەمەن اۆتوجولىنىڭ 28-شاقىرىمىندا (الماتى – قوناەۆ باعىتى) 18 كولىكتىڭ قاتىسۋىمەن جول-كولىك وقيعاسى ورىن الدى. اپات قويۋ تۇمان كەزىندە ورىن العان.
«الدىن الا اقپارات بويىنشا، اپاتقا جۇرگىزۋشىلەردىڭ جىلدامدىق رەجيمىن جانە ناشار كورىنۋ جاعدايىندا قاۋىپسىز قاشىقتىقتى ساقتاماۋى سەبەپ بولعان. اپات بولعان جول ۋچاسكەسى Iا تەحنيكالىق ساناتىنا جاتادى، التى جولاقتان تۇرادى. جولدىڭ ءجۇرۋ بولىگى قۇرعاق، اقاۋسىز جانە بوگدە زاتتارسىز بولعان»، – دەلىنگەن حابارلامادا.
اپات سالدارىنان زارداپ شەككەندەر مەن قايتىس بولعاندار جوق. وقيعانىڭ ءمان-جايى انىقتالۋدا.
ايماق پوليتسياسى بارلىق جول قوزعالىسىنا قاتىسۋشىلارعا ساقتىق شارالارىن قاتاڭ ساقتاۋ قاجەتتىگىن ەسكەرتەدى. ناشار كورىنۋ جاعدايىندا جىلدامدىقتى تومەندەتۋ، قاۋىپسىز قاشىقتىقتى ساقتاۋ جانە جول قوزعالىسى ەرەجەلەرىن قاتاڭ ساقتاۋ اسا ماڭىزدى.
