بۇگىن الاتاۋ اۋدانىنىڭ اكىمدىگى قازا تاپقان جەلتوقساندىقتاردىڭ رۋحىنا ارناپ اس بەرىپ، قۇران وقىتتى. شاراعا جەلتوقساندىقتارمەن قاتار، باتىر انا، جەلتوقسان قۇربانى ءلاززات اسانوۆانىڭ اناسى التىناي اسانوۆا قاتىستى. شارا بارىسىندا جەلتوقساندىقتار مەملەكەت تاراپىنان 150 000 تەڭگەلىك كومەكتىڭ بەرىلگەنىن جارىسا ايتىسىپ جاتتى. الايدا ءار جىل سايىن 16 جەلتوقساندا بەرىلەتىن قارجى وسى جولى دا التىناي اپامىزعا بۇيىرماپتى. «التىناي اپامىزعا قارجى نەگە بەرىلمەيدى؟» دەگەن سۇراققا «اقيقات» جەلتوقسانشىلار ۇيىمىنىڭ الاتاۋ اۋدانىنداعى توراعاسى ەرالى مامبەتباەۆ تومەندەگىدەي جاۋاپ بەردى.
–قازىر الماتى بويىنشا جەلتوقساندىقتاردىڭ 12 ۇيىمى بار. وكىنىشكە قاراي، ۇيىم-ۇيىمعا ءبولىنىپ، باستارىمىز ءالى دە بىرىكپەۋدە. سىي-اقىنى اقتالعاندار عانا الدى. الماتى قالاسى بويىنشا شامامەن 300-دەي جەلتوقساندىق 150 000 تەڭگە قارجىعا يە بولدى. التىناي اپامىزعا عانا بەرىلمەي جاتقان قارجى كەلەشەكتە شەشىلەدى دەپ ويلايمىن. ءوز باسىم وسى ماسەلەنى ەندى كوتەرسەم دەپ ءجۇرمىن.
ارينە، 150 000 مىڭنىڭ سويىلىن سوعۋ بىلاي تۇرسىن، الاتاۋ اۋدانى اكىمدىگى ۇيىمداستىرعان شارادا دا التىناي اپامىزدى ءبىر پاراق ماقتاۋ قاعازىمەن شىعارىپ سالعانى كوڭىلگە كىربىڭ ۇيالاتادى ەكەن. ەح، بۇندايدا «وزگەنى جارىلقاۋدا شەبەر، ءوز جاقسىسىن ۇكىلەي بىلمەيتىن قازاعىم-اي» دەۋدەن باسقا امال جوق سەكىلدى...
اقگۇل ايداربەكقىزى،
«ادىرنا» ۇلتتىق پورتالى
