ۇلىتاۋ ءوڭىرىنىڭ تۇرعىنى تۇيمەگۇل تەمىرباەۆا بيىل 116-شى كوكتەمىن قارسى الدى. ول قازاقستانداعى ەڭ قارت تۇرعىنداردىڭ ءبىرى. قاڭتار ايىندا 116 جاسقا تولعان كەيۋانانىڭ جاسى ەلدەگى ەڭ ۇلكەن جاس ەكەنى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى تاراپىنان راستالعان، دەپ حابارلايدى "ادىرنا".
24.kz مالىمەتىنشە، عاسىردان اسقان اجە جاسىنىڭ ۇلعايعانىنا قاراماستان ءالى دە تىڭ. ءومىر بويى ەڭبەكپەن شىڭدالعان ول قازىر دە بوس وتىرمايدى. ءۇي شارۋاسىنا ارالاسىپ، قۇرت جايىپ، قولىنان كەلگەنشە وتباسىنا كومەكتەسىپ جۇرەدى. ءتىپتى كەيۋانا كوزاينەكسىز ينە ساباقتاپ، ءىس تىگە الادى.
تۇيمەگۇل اجە ۇزاق جاساۋدىڭ سىرىن ادال ەڭبەك پەن اق نيەتكە بايلانىستىرادى. ول جۇبايى ايازباي تەمىرباەۆپەن بىرگە ءومىر بويى جىلقى باعىپ، مال شارۋاشىلىعىمەن اينالىسقان. قيىن ەڭبەككە قاراماستان، ەرلى-زايىپتىلار اۋىل تىرشىلىگىنەن قول ۇزبەگەن. ايازباي اقساقال 95 جاسقا دەيىن ءومىر سۇرگەن.
"100-دەن اسىپ بارا جاتىرمىن. ولمەي كەلە جاتىرمىن. بالالارىم امان بولسىن. بالالاردىڭ الدىندا كەتسەم دەپ ءجۇرمىن", -دەيدى 116 جاستاعى اجەي.
تۇيمەگۇل اجەنىڭ بالالارى: "وسى كۇنگە شەيىن ول كىسىنىڭ "اۋىردىم" دەگەنىن ەستىمەدىك", - دەيدى. ەس بىلگەننەن ەڭبەكپەن وسكەن جان قازىر دە قارتايدىم دەپ قاراپ وتىرعان جوق. نەمەرەلەردىڭ قارسىلىعىنا قاراماي، ءۇيدىڭ تىرلىگىنە دە ارالاسادى.
"اندا-ساندا دالاعا شىعىپ كەلەدى. كوبىنەسە ۇيدە جۇرەدى. بيىل سولاي بولدى. وعان دەيىن بارلىق شارۋاعا جاراپ تۇرعان. سىرتتىڭ شارۋاسىنا، ءىشتىڭ شارۋاسىنا. قانشا دەگەنمەن جاسى كەلدى عوي. تەلەديدار كورىپ وتىرادى. بىزگە تاماق ىستەپ قويادى", – دەيدى كەلىنى راۋشان تەمىرباەۆا.
تۇيمەگۇل تەمىرباەۆا قاڭتار ايىندا 116 جاسقا تولدى. ونىڭ ەلدەگى ەڭ قارت تۇرعىن ەكەنىن ەڭبەك جانە حالىقتى الەۋمەتتىك قورعاۋ مينيسترلىگى راستاعان. كەيۋانا بۇگىندە قىزىلجار كەنتىندە كەنجە ۇلىنىڭ قولىندا تۇرادى. باۋىرىنان ورگەن 4 بالادان 15 نەمەرە، 25 شوبەرە سۇيگەن.
