اقتوبە وبلىسىندا الەۋمەتتىك از قامتىلعان ازاماتتاردى تۇرعىن ۇيمەن قامتاماسىز ەتۋدىڭ ءتيىمدى شارالارى قابىلدانۋدا.
بيىل 1 جەلتوقسانان ءۇي كەزەگىندە تۇرعاندارعا "قارعالى" تۇرعىن ءۇي الابىنان №19 جانە №35 ۇيلەردەن كەزەڭ-كەزەڭمەن باسپانا بەرىلە باستادى. پاتەردى 2006 جىلدان بەرى ءوز كەزەگىن كۇتىپ جۇرگەن اقتوبە قالاسىنىڭ تۇرعىندارى الدى.
تاۋەلسىزدىك كۇنى قارساڭىندا وبلىس اكىمى وڭداسىن ورازالين 30 وتباسىعا باسپانا كىلتىن تابىستادى. جاڭا قونىس يەلەرىنىڭ قاتارىندا ۇوس قاتىسۋشىسىنا تەڭەستىرىلگەن تۇلعالار، تولىق ەمەس وتباسىلار، مۇمكىندىگى شەكتەۋلى بالا تاربيەلەپ وتىرعان جانۇيالار، 1, 2 توپ مۇگەدەكتەرى، جەتىم بالالار بار. ولار نۇر اقتوبە شاعىن اۋدانىنداعى توعىز قاباتتى ۇيدەن ءبىر، ەكى، ءۇش بولمەلى پاتەرگە يە بولدى.
"مەملەكەت باسشىسىنىڭ سىندارلى ساياساتىنىڭ ارقاسىندا ەل ەكونوميكاسى قارقىندى دامىپ، حالىقتىڭ تۇرمىس ساپاسىن ارتتىرۋ جونىندەگى ساياساتى قارقىندى ىسكە اسىرىلۋدا. وبلىس ورتالىعىنىڭ وزىندە 24 مىڭنان استام ادام ءۇي كەزەگىندە تۇر، ولاردىڭ باسپانالى بولۋى ءۇشىن كوپ قاباتتى ۇيلەردى سالۋ جۇمىستارى بەلسەندى جۇرگىزىلۋدە",- دەدى وڭداسىن ورازالين.
جاڭادان تاپسىرىلعان ۇيدە مۇمكىندىگى شەكتەۋلى ازاماتتاردىڭ ىڭعايلى كىرىپ-شىعۋىنا جاعداي جاسالعان. ماسەلەن، كىرە بەرىس جەرگە ەلەكتروندى كوتەرگىشتەر ورناتىلعان.
كاسىپكەر، "پاندۋس وك" جشس باسشىسى شاحان جولداسباەۆ كوتەرگىشتەردىڭ قالاي جۇمىس جاسايتىندىعىمەن تانىستىردى.
ايتا كەتەيىك، بيىل كەزەكتە تۇرعان 782 ادامعا جالدامالى-كوممۋنالدىق پاتەرلەر ۇسىنۋ جوسپارلانىپ وتىر. ولاردىڭ ىشىندە 252 وتباسى جاڭا قونىس تويىن تويلادى.
"باقىتتى وتباسى"-"2-10-20" باعدارلاماسى اياسىندا 3 ملرد تەڭگەگە 302 ءوتىنىش ماقۇلداندى. «شاڭىراق» - «5-10-20» باعدارلاماسى اياسىندا 278 وتباسىعا جالپى سوماسى 2,38 ملرد تەڭگەگە نەسيە بەرىلدى.
اعىمداعى جىلدىڭ 17 تامىزىنان بەرى "شاڭىراق" پيلوتتىق باعدارلاماسى جۇمىس جاسايدى. وسى باعدارلاما جۇزەگە اسىرىلعاننان باستاپ 1,4 ملرد تەڭگەگە 148 قارىز بەرىلدى.
