جوعارى ەۋرازيالىق ەكونوميكالىق كەڭەستىڭ قۇرمەتتى توراعاسى نۇرسۇلتان نازارباەۆ بيىل بەلارۋس پەن ارمەنيادا بولعان وقيعالار تۋرالى ويىن ايتتى، - دەپ حابارلايدى «ادىرنا» ۇلتتىق پورتالى Tengrinews.kz تىلشىسىنە سىلتەمە جاساپ.
قازاقستاننىڭ تۇڭعىش پرەزيدەنتى جوعارى ەۋرازيالىق ەكونوميكالىق كەڭەس وتىرىسىنا قاتىسۋشىلارعا شاقىرعانى ءۇشىن العىس ايتتى.
"بۇل جىل جاعىمسىز وقيعالارعا تولى بولدى، ونىڭ ىشىندە پاندەميا، ەكونوميكالىق داعدارىس، بەلارۋستە وتكەن سايلاۋ، ارمەنيادا بولعان وقيعالار. ءبىز وسىنىڭ ءبارىن باقىلاپ، بىرگە ۋايىمدادىق. بۇل ارتتا قالادى دەپ ۇمىتتەنەمىن. پاندەميانىڭ ءوزى داعدارىس كەزىندە مەملەكەتتىڭ ماڭىزدى ءرولىن تاعى دا كورسەتتى.
مەملەكەتتىك رەتتەۋدىڭ جەدەل شارالارىنىڭ ارقاسىندا ءبىز پاندەميا دامۋىنىڭ جاعىمسىز ستسەناريلەرىنەن اۋلاق بولا الدىق. تەك مەملەكەتتىك قولداۋ عانا ازىق-تۇلىك، ءدارى-دارمەك جانە باسقا دا الەۋمەتتىك ماڭىزى بار ونىمدەردىڭ ىشكى نارىقتارىندا تۇراقتىلىقتى قامتاماسىز ەتتى. ەاەو-عا مۇشە مەملەكەتتەر كووپەراتسياسىنىڭ شەڭبەرىندە ءوزارا گۋمانيتارلىق كومەك الماسۋدىڭ جوعارى دەڭگەيىن اتاپ وتەمىن", - دەدى ەلباسى.
