ميكروقارجى ۇيىمدارى ازاماتتارعا كرەديت بەرگەن كەزدە، ونىڭ پايىزىن قوسقانداعى جالپى سومانى كەلىسىمشارتتىڭ ءبىرىنشى بەتىندە كورسەتۋى ءتيىس. ءماجىلىس قازاقستاندىقتاردىڭ كرەديتتى تىم كوپ الۋىنا جول بەرمەۋ ماقساتىندا ازىرلەنگەن زاڭ جوباسىن ءبىرىنشى وقىلىمدا ماقۇلدادى، دەپ حابارلايدى «ادىرنا» ۇلتتىق پورتالى Sputnik قازاقستان تىلشىسىنە سىلتەمە جاساپ.
ءماجىلىستىڭ جالپى وتىرىسىندا ميكروقارجىلىق جانە كوللەكتورلىق قىزمەتتى رەتتەۋ ماسەلەلەرى تۋرالى زاڭ جوباسى قارالدى. زاڭ جوباسى ازاماتتاردىڭ كرەديتتى بۇدان ءارى تىم كوپ الۋىنا جول بەرمەۋ جانە تۇتىنۋشىلىق كرەديت بەرۋدىڭ وڭتايلى ءوسۋ قارقىنىن قامتاماسىز ەتۋ ماقساتىندا ازىرلەندى.
قۇجاتتى تومەنگى پالاتانىڭ دەپۋتاتتارى ازىرلەگەن.
ماجىلىسمەن البەرت راۋدىڭ ايتۋىنشا، قازاقستاندا ازاماتتاردى وڭدى-سولدى كرەديتتەۋ پروبلەماسى ءالى شەشىلمەي كەلەدى.
ءبىرىنشى كرەديتتىك بيۋرونىڭ مالىمەتىنشە، 2020 جىلدىڭ 1 قاراشاسىنداعى جاعداي بويىنشا ميكروقارجى ۇيىمدارىنان 170 مىڭ كاسىپكەر مەن 810 مىڭ جەكە تۇلعا قارىز العان. نەسيەنىڭ جالپى سوماسى 735 ميلليارد تەڭگەدەن اسادى. بولشەك نەسيە بويىنشا قارىز الۋشىلاردىڭ 38%-ءى، شامامەن 310 مىڭ ادام كرەديتىن تولەي الماي ءجۇر.
"ازاماتتاردى قوسىمشا قورعاۋ ماقساتىندا دەپۋتاتتار ميكروقارجى جانە كوللەكتورلىق قىزمەتتى رەتتەۋ ماسەلەلەرى تۋرالى زاڭ جوباسىن ازىرلەدى. وعان سايكەس، ميكروكرەديت بەرۋ تۋرالى كەلىسىمنىڭ العاشقى بەتىندە كرەديتتىڭ تولىق سوماسى (كرەديتتىڭ پايىزىن قوسقاندا، ۇستىنە قانشا تەڭگە قوسىپ تولەيتىنى), سونداي-اق، ميكروكرەديتتى وتەۋ كەستەسى كورسەتىلۋى ءتيىس", - دەدى دەپۋتات.
بۇدان بولەك، زاڭ جوباسى كوللەكتورلىق اگەنتتىكتەردىڭ جاۋاپكەرشىلىگىن ارتتىرۋعا باعىتتالعان. ماجىلىسمەندەر ولاردىڭ جارعىلىق كاپيتالىنىڭ ەڭ تومەنگى مولشەرىن 10 ميلليون تەڭگە دەپ بەلگىلەۋدى ۇسىنىپ وتىر.
دەپۋتات جارعىلىق كاپيتالعا قاتىستى تالاپتاردى ەنگىزۋدىڭ نەگىزى بار ەكەنىن اتاپ ءوتتى.
"ماسەلەن، اكتيۆتەر اقپاراتتى ساقتاۋ، جەكە مالىمەتتەردى قورعاۋ، اۋديو-ۆيدەوفيكساتسيا، كەڭسە ۇستاۋ جانە تاعى باسقا ءۇشىن قاجەت", - دەدى راۋ.
ونىڭ ايتۋىنشا، زاڭ جوباسىن قابىلداۋ حالىقتىڭ قارىزعا بەلشەسىنەن باتۋىنا جول بەرمەيدى.
ءماجىلىس زاڭ جوباسىن ءبىرىنشى وقىلىمدا ماقۇلدادى.
فوتو اشىق دەرەككوزدەن الىندى.
