تۇرىكتىڭ "بايكار ماكينا" اسكەري كومپانياسى ءوز دامۋىندا ودان ارى كەتىپ جاقىندا "اكينجي" اتتى ۇشقىشسىز باسقارىلاتىن ۇشاقتى قۇراستىرىپ شىعاردى. بۇنىڭ قاسىندا قاراباق اسپانىندا جاسىنداي جارقىراعان "بايراكتار tb2" ويىنشىق بوپ قالاتىن ءتارىزدى.
مىنا ناجاعايدىڭ سالماعى 5 جارىم توننا.
ءوزى 1350 كەلى سالماق قارۋ جاراعىن كوتەرەدى. زىمىراندارىمەن بىرگە.
بۇل شابۋىلداۋشى ۇشاق 250 شاقىرىم اۋماعىندا كوكتە ۇشىپ كەلە جاتقان ۇشاقتى، جەردە ءجۇرىپ كەلە جاتقان تەحنيكانى دالدەپ تۇرىپ اتىپ قاعىپ تۇسىرەدى. ءىشى تولعان ەلەكترونيكامەن جابدىقتالعان قارۋ - جاراق.
انادولى تۇرىكتەرىنىڭ بۇنىڭ الدىندا جاساپ شىعارعان "اقسۇڭگىر" دەگەن بەسپيلوتنيگى بارلاۋشى بولاتىن، ال مىناۋ "اكينجي" 24 ساعات بويى توبەدەن قادالىپ قىلت ەتكەندى، شىلت ەتكەندى دەمدە بۇرق ەتكىزىپ وتقا ورايدى ەكەن. ءوزى كوكتە 12 مىڭ مەترگە شەيىن كوتەرىلە الاتىن قابىلەتكە يە.
بۇنىڭ قاسىندا تۇرىكتىڭ باسقا پۋلەمەتشە اتقىلايتىن دروندارى تۋرالى ايتۋدىڭ قاجەتى دە جوق. ولار ويناماي قالادى.
تۇرىك ينجەنەرلەرى جاساپ شىعارعان بۇل ۇشاق تۇركيانى لەزدە الەمدەگى كوكتى بيلەگەن ءۇش اسكەري دەرجاۆانىڭ قاتارىنا قوستى. ياعني، اقش پەن ءيزرايلدىڭ قاتارىنا.
جالپى، تۇركيا بۇل تەمانى جاقسى ۇستاپ الدى. بۇلار ەندى بۇل باعىتتان اجىراي قويماس.
تاعى تۇرىكتەر كارىستەرمەن بىرىگىپ "التاي" دەگەن تانكى شىعارادى.... ءوز جاياۋ اسكەرىنىڭ سانى ناتو داعى اقش تان كەيىنگى سانى مول اسكەر ەكەنى بەسەنەدەن بەلگىلى. قىسقاسى، تۇركيا اسكەري سالادا وزگە ەلدەردەن وق بويى وزىق تۇر.
بۇلار ول جاعىنان جارادى.
ال ءبىز "قاراتەڭىز بەن ءسىبىردىڭ اراسى بۇرىن ءبىزدىڭ جەر بولعان، ول تۇركى قاعاناتى ەدى",
"شىڭعىسحان ءبىزدىڭ بابامىز" دەپ كۇمپىلدەگەننەن باسقا دانەڭە دە بىلمەيدى ەكەنبىز.
سول عالامدى دۇبىرلەتكەن بابالارىمىزدىڭ ءوز زامانىندا قانداي تەڭدەسسىز اسكەري ينجەنەر بولعانىن،
ولاردىڭ سول زاماندا ەڭ وزىق، ۇزدىك اسكەري تەحنولوگيالاردى مەڭگەرگەنىن، سونى سوعىس الاڭىندا ءساتتى پايدالانعانىن،
ولاردىڭ قانداي كەرەمەت اسكەري ستراتەگ، تاكتيك بولعانىن،
ولار وزدەرىنىڭ سونداي قابىلەتتەرىنىڭ ارقاسىندا ازعانتاي جاۋىنگەر حالقىمەن تاس قامالداردى تالقانداپ ميلليونداعان پارسى، قىتاي، ءۇندى سياقتى حالىقتاردى سوعىس الاڭىندا وپ - وڭاي جەڭىپ، توپالاڭىن شىعارىپ كەتە بەرەتىنىن ءالى ءوزىمىز دە تۇسىنبەگەن سياقتىمىز.
بۇل تۋرالى كەزىندە الەمنىڭ كونە زامان تاريحشىلارى، مۇيىزدەرى قاراعايداي جىلناماشىلارى تامسانا وتىرىپ، جەڭىلگەنى مۇڭايا وتىرىپ اڭىز قىلىپ تالاي جازدى.
قازىر دە باتىستىڭ "ەكسپلورەر", "نەشونال دجەگرافيك"' سياقتى تەلەارنالارى شىڭعىسحاننىڭ جاۋىنگەرلەرىنىڭ پايدالانعان ساۋىت - سايمانىمەن قارۋ جاراقتارىنىڭ قانداي اعاشتان، ساداعىنىڭ وعى قانداي ماتەريالدان جاساعانىن، نايزاسىنىڭ ۇشىنا نە سالعانىن، قانداي وت شاشاتىن قارۋ سۇيرەگەنىن،
ولاردىڭ سوعىس الاڭىندا قانداي اسكەري تاكتيكا قولدانعانىن، بىلىكتىلىگىن، مىقتىلىعىن، تاعى باسقالارىن ءالى زەرتتەپ تاۋىسا الماي جاتىر..
الەمدە زەڭبىرەكتى دە تۇڭعىش جاساپ شىعارعان وسى شىڭعىستىڭ وعلاندارى بولاتىن.
ولار كەزىندە قىتايدىڭ وت شاشاتىن كۇكىرتىن سارتتىڭ ارباسىنا سالىپ بۇگىنگى زاماناۋي زەڭبىرەكتىڭ العاش نۇسقاسىن جاساپ شىعارعان ەدى. قامال تالقاندايتىن كاتاپۋلتالاردى دا ەڭ العاش سۇيرەتكەن سول كوشپەندىلەر. ولاردىڭ سوعىس سالاسىندا جەتكەن جەتىستىكتەرى - ءوز زامانىندا سۇمدىق ينجەنەرلىك يننوۆاتسيا ەدى.
ولار سول زاماندا ۇزدىك سوعىس تەحنولوگيالارىن مەڭگەرمەگەندە مىناداي ۇلانعايىر جەردى تۇركى جۇرتىنا مۇرا قىپ تاستاپ كەتپەس ەدى.
وكىنىشكە وراي بۇنى كەيىن ءبىز جالعاستىرا الماي كورىنگەنگە جەم بولدىق، قور بولدىق.
مەنىڭشە، ءبىزدىڭ سول اتا جولدى بۇگىندە وسى تۇرىكتەر شاما - شارقىنشا جالعاستىرىپ جاتىر.
