عالىمداردىڭ جالاقىسىن زاڭ جۇزىندە قاراستىرۋ قاجەت. مۇنداي ۇسىنىستى قر بعم عىلىم كوميتەتى توراعاسىنىڭ ەكس-ورىنباسارى ءلاززات قۇسايىنوۆا ADAL BILIM پلاتفورماسىندا وتكەن تىكەلەي ەفير بارىسىندا ايتتى.
قازاقستاندىق عىلىمدى دامىتۋعا جانە عىلىمي جوبالارعا گرانتتىق قارجىلاندىرۋدى بولۋگە قاتىستى ماسەلەلەر عالىمدار اراسىندا تالقىلاندى. ەفير بارىسىندا حالىقارالىق عىلىمي ىنتىماقتاستىق ورتالىعىنىڭ پرەزيدەنتى الەۋمەتتىك قامسىزداندىرۋ جۇيەسى بويىنشا عالىمداردىڭ جالاقىسى مەملەكەتتىك قىزمەتكەرلەرمەن تەڭەستىرىلەتىنىن اتاپ ءوتتى.
«مەملەكەتتىك قىزمەتكەرلەر ءۇشىن «ازاماتتىق قىزمەتشىلەرگە، مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە، قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» قازاقستان رەسپۋبليكاسى ۇكىمەتىنىڭ قاۋلىسى بار. وندا عالىمدار تاربيەشىلەرمەن، مەديتسينا قىزمەتكەرلەرىمەن، مۇعالىمدەرمەن قاتار قاراستىرىلعان. اتالعان قاۋلىدا كورسەتىلگەن جالاقى جۇيەسى بويىنشا عالىمدار ەڭ تومەنگى جالاقىنى الادى، سوندىقتان ولار مەملەكەتتىك قىزمەتكەرلەرمەن تەڭەستىرىلەدى»، - دەپ اتاپ ءوتتى ءلاززات قۇسايىنوۆا.
ءلاززات ابايقىزىنىڭ ايتۋىنشا، سوڭعى ەكى جىل ىشىندە دەپۋتاتتاردىڭ نازارىن عالىمداردى قازىرگى جالاقى جۇيەسىنەن ءبولىپ شىعارۋ نەمەسە وسى شەشىم شەڭبەرىندە جەكە تولەم جۇيەسىن قۇرۋ قاجەتتىلىگىنە بىرنەشە رەت اۋدارعان. ياعني جەكە قوسىمشالار دايىنداپ، جالاقىسىن دۇرىس ەسەپتەۋ كەرەكتىگىن العا تارتادى. تالقىلاۋ بارىسىندا عىلىمي قىزمەتكەرلەرگە ەڭبەكاقى تولەۋدى زاڭداستىرۋدى ۇسىندى، ويتكەنى ول سالىق سالۋعا جاتاتىن زەينەتاقى تولەۋ مۇمكىندىگىن قاراستىراتىنىن ايتادى.
فوتو اشىق دەرەككوزدەن الىندى
"ادىرنا" ۇلتتىق پورتالى
