بۇگىن مەملەكەت باسشىسىنىڭ ماشينا جاساۋ سالاسىن دامىتۋ جونىندەگى تاپسىرماسىن ورىنداۋ اياسىندا مۇناي-گاز ماشيناسىن جاساۋدى دامىتۋدىڭ حالىقارالىق ورتالىعىن قۇرۋ تۋرالى كەلىسىمگە قول قويىلدى.
كەلىسىمگە قول قويۋ راسىمىنە پرەمەر-ءمينيستردىڭ ورىنباسارى رومان سكليار قاتىستى. قۇجاتقا ەنەرگەتيكا ءمينيسترى نۇرلان نوعاەۆ، يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ، «قازاقستان ماشينا جاساۋشىلار وداعى» زتب باسقارما توراعاسى مەيرام پىشەمباەۆ، «PSA» جشس باس ديرەكتورى بەكەت يزباستين، قاراشىعاناق پەتروليۋم وپەرەيتينگ (كپو) جوباسىنىڭ باسشىسى ەدۆين بلوم، نورت كاسپيان وپەرەيتينگ كومپاني (نكوك) باسشىسى ريچارد حوۋۆ جانە تەڭىزشەۆرويل (تشو) جوباسىنىڭ باسشىسى يمەر بوننەر قول قويدى.
ورتالىق جۇمىسىنىڭ ماقساتى جاڭا ونەركاسىپتىك كاسىپورىندار مەن سەرۆيستىك ورتالىقتار اشۋ، ينۆەستيتسيالىق قىزمەتتى قولداۋ ارقىلى قازاقستاننىڭ مۇناي-گاز سالاسى ءۇشىن تاۋارلار ءوندىرىسىن وقشاۋلاندىرۋ بولىپ وتىر. بۇل باستاما وتاندىق تاۋار وندىرۋشىلەرگە قوسىمشا قولداۋ كورسەتەدى جانە مۇناي-گاز جوبالارىنىڭ وپەراتورلارى وتكىزەتىن ساتىپ الۋ ۇدەرىسىنە ولاردىڭ بارىنشا تارتىلۋىنا ىقپال ەتەتىن بولادى. ورتالىقتى قۇرۋ كەزىندە شەلل جانە ەني كومپانيالارى قۇرعان وسىنداي زەرتتەۋلەر مەن جوبالار ورتالىقتارىنىڭ جۇمىس تاجىريبەسى پايدالانىلاتىن بولادى. ورتالىقتى مۇناي-گاز جوبالارىنىڭ وپەراتورلارى قارجىلاندىرادى جانە ول كوممەرتسيالىق ەمەس نەگىزدە جۇمىس ىستەيتىن بولادى.
