«مەن ونىمەن 30 جىل بۇرىن، تاۋەلسىز قازاقستاننىڭ قالىپتاسۋ كەزەڭىندە كەزدەستىم»، - دەيدى ەۋروپالىق قايتا قۇرۋ جانە دامۋ بانكىنىڭ ءبىرىنشى پرەزيدەنتى، تانىمال فرانتسۋز ەكونوميستى، جازۋشى جانە ساياسي قايراتكەر جاك اتتالي نۇرسۇلتان نازارباەۆپەن تانىسقان كەزدى ەسىنە الىپ.
ەقدب – قازاقستان ءوزىنىڭ داۋىس بەرۋ قۇقىعى بار، تولىق مۇشەلىككە يە بولعان العاشقى حالىقارالىق مەكەمەلەرىنىڭ ءبىرى بولدى.
بۇل وسى 30 جىل ىشىندە پرەزيدەنت نازارباەۆپەن بىرنەشە رەت كەزدەسۋدىڭ جانە ونىڭ نارىقتىق ەكونوميكاعا نەگىزدەلگەن قازىرگى زامانعى دەموكراتيالىق، الەۋمەتتىك جانە ەكولوگيالىق تۇرعىدان سانالى، ءوز ينستيتۋتتارىن جاڭارتۋ جولىنداعى مەملەكەت رەتىندەگى ەلدى دامىتۋ ۇستانىمىمەن، جىگەرىمەن، ونىڭ قابىلەتى جانە تاجىريبەسىمەن تانىسۋدىڭ تاماشا مۇمكىندىگى بولدى.
مەن ءۇشىن ساراپتامالىق-كونسۋلتاتيۆتىك كەڭەستىڭ مۇشەسى بولۋ جانە قازاقستان كونستيتۋتسياسىنىڭ ەرەجەلەرىن دايىنداۋعا كومەكتەسۋ ۇلكەن مارتەبە بولدى. مەن سونداي-اق پرەزيدەنت نازارباەۆتىڭ حالىقارالىق قىزمەتىنەن جانە ونىڭ ساياسي كورەگەندىگى، كەلىسسوزدەردى باقىلاۋدا ۇستاۋ جانە وتە قيىن جاعدايدا ارەكەت ەتۋ قابىلەتى تۇرعىسىنان وتە قىسقا مەرزىمدە الەمدەگى ەڭ دانا ادامداردىڭ بىرىنە اينالۋىنان قاتتى اسەر الدىم»، - دەدى اتتالي الىپ كورشىلەرمەن قورشالعان ەلدىڭ زور الەۋەتىن اتاپ ءوتىپ.
رەسەي، قىتاي، يران جانە باسقا ەلدەرمەن كورشىلەس ورنالاسقان قازاقستان سەكىلدى ەلدى باسقارۋ ءۇشىن ديپلوماتيالىق ءارى الەۋمەتتىك ۇلكەن الەۋەت پەن داعدى قاجەت. پرەزيدەنت نازارباەۆ وسى داعدىلارعا يە، سونىڭ ارقاسىندا ول سالماقتى شەشىمدەر قابىلداي الدى، ونىڭ ءبىرى – ەلدىڭ باس قالاسىن استاناعا كوشىرۋ جانە الەمدەگى ەڭ مىقتى ساۋلەتشىلەردىڭ كومەگىمەن عاجايىپ، قالاعا اينالدىرۋ بولدى.
سونىمەن قاتار، پرەزيدەنت نازارباەۆتىڭ دانالىعىنىڭ ارقاسىندا قازاقستانعا تىكەلەي قاتىسى جوق ماسەلەلەر بويىنشا قازاقستاندا اشىق جانە جابىق فورماتتا كوپتەگەن حالىقارالىق كەلىسسوزدەر جۇرگىزىلۋدە. وتە قيىن جاعدايعا تۇسكەن كەلىسسوز جۇرگىزۋشىلەرى بار قوناقجايلىلىقپەن قابىلدانىپ، پرەزيدەنت نازارباەۆتىڭ اقىل-كەڭەستەرىن الادى»، - دەدى ەكونوميست.
ونىڭ ايتۋىنشا، قازاقستان – بولاشاعى زور ەل. پرەزيدەنت نازارباەۆ ازيالىق جانە دە باتىستىق كوپتەگەن الەمدىك وركەنيەتتەردىڭ باستاۋلارىنا ورالىپ، مەملەكەتتى جاڭادان تۇرعىزدى.
مەن وعان بار جاقسىلىقتى تىلەيمىن جانە ونىڭ ەلگە جانە بۇكىل الەمگە قالدىرعان مۇراسى كەلەشەك ۇرپاققا جەتەدى دەپ سەنەمىن. بۇل مۇرا – ەلدى كوركەيتۋگە، وركەنيەتتى مەملەكەت، جاڭا ينستيتۋتتار قۇرۋعا، توتاليتارلىق رەجيمنەن دەموكراتيالىق رەجيمگە بەيبىت جولمەن كوشۋگە بولاتىندىعىن ايقىندايدى. سونداي-اق، بارشا حالىقتى، ونىڭ ىشىندە، اسىرەسە، بولاشاعى مەملەكەتتىك باسقارۋدىڭ باسىمدىعى بولىپ تابىلاتىن كەيىنگى ۇرپاقتى قامتيتىن مودەرنيزاتسيانى جۇزەگە اسىرۋعا بولاتىندىعىن دالەلدەيدى»، - دەدى ج.اتتالي.
