ترامپ سوتتان ەشتەڭە شىعارا الار ەمەس. ول 31 رەت تالاپ-ارىز بەرىپ، ونىڭ 23-ءى ەشقانداي دالەلدەمەسى جوق دەپ قارالماي كەرى قايتارىلدى. تالاپ-ارىزدارىنىڭ بىردە-بىرىندە ناقتى فاكتىلەرى جوق، تەك قانا سايلاۋ زاڭى بۇزىلۋى مۇمكىن دەگەن دولبار عانا بار. قالعان 8 تالاپ-ارىزى قارالۋ ۇستىندە، بىراق ولار دا كەرى قايتارىلۋى مۇمكىن.
سوندا مەنىڭ تۇسىنگەنىم بويىنشا تالاپ-ارىز بەرمەس بۇرىن ونىڭ جەتكىلىكتى دالەلدەرى، نەمەسە ناقتى كۇدىگى، نەمەسە كۋالەرى، ت.س.س. بولۋى ءتيىستى سياقتى، كەز-كەلگەن تالاپ-ارىزدى امىريكا سوتتارى قاراي بەرمەيتىندىگى بەلگىلى بولدى.
وتكەن سايلاۋدا ءبىزدىڭ باقىلاۋشىلارىمىز سايلاۋ كوميسسياسى قول قويعان پروتوكولداردى قولدارىنا ۇستاپ، سوتقا كورسەتىپ تۇرىپ، ياعني ناقتى دالەلدەرى جەتكىلىكتى بولا تۇرا ادىلدىككە قولدارى جەتە المادى. ال ترامپتىڭ قولىندا ەڭ بولماعاندا سونداي پروتوكولدارى دا بولماي تۇر.
دەگەنمەن ترامپ ولىسپەي بەرىسپەيتىن ەمەس، ول ەندى سوتقا ارىز بەرۋمەن قاتار تىكەلەي مەملەكەتتىك توعكەرىس جاساۋعا كىرىسىپ كەتكەندەي. ءالى داۋىس بەرۋ قورىتىندىسىنا سەرتيفيكات بەرمەگەن شتاتتارداعى رەسپۋبليكاشىل كوميسسيا مۇشەلەرىنە تەلەفون شالىپ، ولارعا قىسىم جاساپ، سوڭعى قورىتىندىعا قول قويماۋدى تالاپ ەتۋدە. ادەتتە پرەزيدەنتتى سايلايتىن وكىلدەر سول شتاتتا قاي پرەزيدەنت كوپ داۋىس السا، سوعان عانا داۋىس بەرۋگە ءتيىستى ەكەن، الايدا ترامپ ەندى وسى وكىلدەردى (سايلاعىشتاردى) ەركىنەن تىس كەرى داۋىس بەرۋگە تىرىسۋى مۇمكىن. بۇل بۇرىن-سوڭدى اقش تاريحىندا كەزدەسپەگەن جاعداي ەكەن.
قالاي بولعاندا دا بارلىق شتاتتار 8 جەلتوقسانعا دەيىن سايلاۋ قورىتىندىسىنا سەرتيفيكات بەرۋدى اياقتاپ، سول كۇنى سايلاعىشتاردى (ۆىبورششيك دەگەندى وسىلايشا اۋداردىم، ول ميلليونداعان سايلاۋشى ەمەس، ءار شتاتتان تاعايىندالعان وكىلدەر عانا) تاعايىنداۋى ءتيىس، سول ادامدار كەيىن، 14 جەلتوقساندا پرەزيدەنتتى سايلاۋى كەرەك. مىنە، وسى داتاعا شەيىن ترامپ وزىنە قارسى كەلگەندەردى قىرىپ-جويىپ، جۇمىستان شىعارىپ، بار قولىنان كەلگەنىن جاساۋى مۇمكىن. ال ودان قالسا، قانشا تىرمىسسا دا ونىڭ كۇنى بىتەدى.
بەلگىلى ساراپشىلار كەزىندە ەگەر بايدەن ايقىن باسىمدىقپەن جەڭبەسە، ترامپتىڭ قولىنان ءبارى دە كەلۋى مۇمكىن دەپ بولجاعان ەكەن. قازىرگى كەزدە بايدەن ايقىن باسىمدىقپەن جەڭىپ وتىر: ول ترامپتان 6 ملن-نان استام داۋىس ارتىق الدى جانە سايلاعىشتار سانى بويىنشا دا 306-عا 232 بولىپ ايقىن باسىمدىقپەن الدا كەلەدى. وسىنشاما داۋىستى سوتپەن بولسىن، باسقالاي بولسىن، ترامپتىڭ باسىپ وزۋى مۇمكىن ەمەس، ول پروتوكولدى قولدان جازا سالاتىن قازاقستان ەمەس قوي، سوعان قاراماستان ولەرمەندىكپەن كرەسلوعا جارماسۋى - ونىڭ نە ءولىم، نە ءومىر دەگەن تاڭداۋ الدىندا تۇرعاندىعىن عانا بىلدىرەدى.
راسىندا دا قازىرگى كەزدە ول باسقا جۇمىستىڭ ءبارىن قويعان، ەسى-دەرتى قالايدا ورنىن ساقتاپ قالۋ، ويتكەنى پرەزيدەنتتىكتەن تۇسكەن بويدا-اق ول نولگە اينالاتىنىن، ءتىپتى سوتتالاتىنىن ءبىلىپ وتىر. ايتقانداي، تۋيتتەر دە، فەيسبۋك دە 20 قاڭتاردا تۇسكى 12-00-دەن كەيىن ترامپت كادىمگى قاراپايىم امىريكاندىقتار سياقتى بىردەن بۇعاتتالاتىنىن، بانعا جىبەرىلەتىنىن قازىردەن-اق ەسكەرتىپ وتىر. قالاي بولعاندا دا بۇل جاعداي امىريكا دەموكراتياسىنا بەرىلگەن قاتتى سوققى بولدى، تەك قانا امىريكالىق دەموكراتيا ينستيتۋتتارىنىڭ مىقتىلىعى ارقاسىندا عانا، امىريكا امىريكالىعىنىڭ ارقاسىندا عانا ازىرگە مۇنداي سوققىنى كوتەرە الىپ تۇر، باسقا كەز-كەلگەن ەل الدەقاشان قاڭعىپ كەتكەن بولار ەدى.
