Tramp sottan eshteńe shyǵara alar emes. Ol 31 ret talap-aryz berip, onyń 23-i eshqandaı dáleldemesi joq dep qaralmaı keri qaıtaryldy. Talap-aryzdarynyń birde-birinde naqty faktileri joq, tek qana saılaý zańy buzylýy múmkin degen dolbar ǵana bar. Qalǵan 8 talap-aryzy qaralý ústinde, biraq olar da keri qaıtarylýy múmkin.
Sonda meniń túsingenim boıynsha talap-aryz bermes buryn onyń jetkilikti dálelderi, nemese naqty kúdigi, nemese kýáleri, t.s.s. bolýy tıisti sııaqty, kez-kelgen talap-aryzdy ámirıka sottary qaraı bermeıtindigi belgili boldy.
Ótken saılaýda bizdiń baqylaýshylarymyz saılaý komıssııasy qol qoıǵan protokoldardy qoldaryna ustap, sotqa kórsetip turyp, ıaǵnı naqty dálelderi jetkilikti bola tura ádildikke qoldary jete almady. Al Tramptyń qolynda eń bolmaǵanda sondaı protokoldary da bolmaı tur.
Degenmen Tramp ólispeı berispeıtin emes, ol endi sotqa aryz berýmen qatar tikeleı memlekettik tóǵkeris jasaýǵa kirisip ketkendeı. Áli daýys berý qorytyndysyna sertıfıkat bermegen shtattardaǵy respýblıkashyl komıssııa múshelerine telefon shalyp, olarǵa qysym jasap, sońǵy qorytyndyǵa qol qoımaýdy talap etýde. Ádette prezıdentti saılaıtyn ókilder sol shtatta qaı prezıdent kóp daýys alsa, soǵan ǵana daýys berýge tıisti eken, alaıda Tramp endi osy ókilderdi (saılaǵyshtardy) erkinen tys keri daýys berýge tyrysýy múmkin. Bul buryn-sońdy AQSh tarıhynda kezdespegen jaǵdaı eken.
Qalaı bolǵanda da barlyq shtattar 8 jeltoqsanǵa deıin saılaý qorytyndysyna sertıfıkat berýdi aıaqtap, sol kúni saılaǵyshtardy (vyborık degendi osylaısha aýdardym, ol mıllıondaǵan saılaýshy emes, ár shtattan taǵaıyndalǵan ókilder ǵana) taǵaıyndaýy tıis, sol adamdar keıin, 14 jeltoqsanda prezıdentti saılaýy kerek. Mine, osy dataǵa sheıin Tramp ózine qarsy kelgenderdi qyryp-joıyp, jumystan shyǵaryp, bar qolynan kelgenin jasaýy múmkin. Al odan qalsa, qansha tyrmyssa da onyń kúni bitedi.
Belgili sarapshylar kezinde eger Baıden aıqyn basymdyqpen jeńbese, Tramptyń qolynan bári de kelýi múmkin dep boljaǵan eken. Qazirgi kezde Baıden aıqyn basymdyqpen jeńip otyr: ol Tramptan 6 mln-nan astam daýys artyq aldy jáne saılaǵyshtar sany boıynsha da 306-ǵa 232 bolyp aıqyn basymdyqpen alda keledi. Osynshama daýysty sotpen bolsyn, basqalaı bolsyn, Tramptyń basyp ozýy múmkin emes, ol protokoldy qoldan jaza salatyn Qazaqstan emes qoı, soǵan qaramastan ólermendikpen kresloǵa jarmasýy - onyń ne ólim, ne ómir degen tańdaý aldynda turǵandyǵyn ǵana bildiredi.
Rasynda da qazirgi kezde ol basqa jumystyń bárin qoıǵan, esi-derti qalaıda ornyn saqtap qalý, óıtkeni prezıdenttikten túsken boıda-aq ol nólge aınalatynyn, tipti sottalatynyn bilip otyr. Aıtqandaı, týıtter de, feısbýk de 20 qańtarda túski 12-00-den keıin Trampt kádimgi qarapaıym ámirıkandyqtar sııaqty birden buǵattalatynyn, banǵa jiberiletinin qazirden-aq eskertip otyr. Qalaı bolǵanda da bul jaǵdaı ámirıka demokratııasyna berilgen qatty soqqy boldy, tek qana ámirıkalyq demokratııa ınstıtýttarynyń myqtylyǵy arqasynda ǵana, ámirıka ámirıkalyǵynyń arqasynda ǵana ázirge mundaı soqqyny kótere alyp tur, basqa kez-kelgen el áldeqashan qańǵyp ketken bolar edi.
