كازگيۋ-دە ەرەكشە ءبىر ءداستۇر قالىپتاسىپ كەلەدى. بۇل تۋرالى وسى وقۋ ورنىنىڭ باسقارما باسشىسى تالعات نارىكباەۆ ءوزىنىڭ الەۋمەتتىك جەلى پاراقشاسىندا جازدى دەپ حابارلايدى «ادىرنا» ۇلتتىق پورتالى.
«كازگيۋ-دە وقىتۋشىلارمەن بەيرەسمي كەزدەسۋلەردى ءجيى وتكىزۋگە تىرىسامىز. ءار جينالىس سايىن ءارتۇرلى تاقىرىپتا اڭگىمەلەسەمىز.
مۇنداي كەزدەسۋلەر ارقىلى وقىتۋشىلار وزدەرىنىڭ دارەجەلەرى جوعارى وقۋ ورنىنىڭ باسشىلىعىمەن تەڭ ەكەنىن تۇسىنەدى. بۇل - كازگيۋ-دە بىرنەشە جىل بۇرىن ەنگىزىلگەن گوريزونتالدى باسقارۋ جۇيەسىنىڭ جالعاسى. ەندى ۋنيۆەرسيتەتكە قاتىستى كەز كەلگەن شەشىمدى رەكتور نەمەسە دەكان ەمەس، ۇجىم شەشەدى. ياعني ۇجىمنىڭ پىكىرى ەسكەرىلىپ قانا قويماي، شەشىم قابىلداۋدىڭ ءوزى تولىعىمەن جوعارى مەكتەپ كوميتەتتەرىنە (اكادەميالىق ساپا كوميتەتى، ەتيكا كوميتەتى، عىلىم كوميتەتى) بەرىلدى، ال اكىمشىلىك (پروۆوست، دەكاندار) ارالاسپايدى.
ءبىر-بىرىمىزگە جوسپارىمىز، جوبالارىمىز، يدەيالارىمىز تۋرالى ايتامىز. سەنىم - جەكە ومىردە عانا ەمەس، جۇمىستا دا قارىم-قاتىناستىڭ نەگىزى. ءبىزدىڭ بولاشاق جوسپارلارىمىز سايكەس كەلۋى كەرەك. ايتپەسە، جۇمىس بەرۋشىنىڭ ارماندارى مەن جوسپارلارى باسقا، وقىتۋشىلاردىڭ ويى مۇلدەم وزگەشە بولۋى مۇمكىن. سونىمەن قاتار بۇل ءبىر-ءبىرىمىزدىڭ كوزقاراسىمىزدى تۇسىنۋگە كومەكتەسەدى.
زاماناۋي ءبىلىم سالاسىنداعى وزەكتى پروبلەمالاردى تالقىلايمىز. قازىرگى باستى مىندەتىمىز — عىلىمي تۇرعىدا ويلايتىن جاستاردى وسى سالاعا باۋلۋ، جاس عالىمداردى تاربيەلەۋ. بۇل ماسەلەنى تەك ۋنيۆەرسيتەت ىشىندە عانا ەمەس، پارلامەنت ءماجىلىسىنىڭ دەڭگەيىندە تالقىلاۋعا شىعارۋدامىز.
P.S. الداعى ۋاقىتتا كازگيۋ-دىڭ ءاربىر قاباتىنا ارنايى تاقتا قويىلادى. وعان كەز كەلگەن قىزمەتكەر مەن وقىتۋشى ۋنيۆەرسيتەت جۇمىسىن جاقسارتۋ بويىنشا ۇسىنىستارى مەن يدەيالارىن جازادى دەگەن سەنىمدەمىن. ءاربىر جاقسى يدەيا باعالاناتىن بولادى»، -دەپ جازادى ت.نارىكباەۆ.
