قۇرمەتتى انالار!
ەكى جىل بۇرىن ۇكىمەت كوپبالالى انالارعا ااك تاعايىنداعاندا، "بۇل كومەكتەن باس تارتىڭىزدار! سىزدەر ۇكىمەتتەن قايىر-ساداقا سۇراۋشى ەمەسسىزدەر! سىزدەر دەموگرافياعا اۋقىمدى ۇلەس قوسىپ وتىرعان، مەملەكەتتىڭ ەڭ قۇندى بايلىعى - ادام كاپيتالىن كوبەيتىپ وتىرعان تۇلعاسىزدار!.." دەپ ەدىم...
بىراق سىزدەر "اسپ، اسپ" دەپ، وزدەرىڭىزدىڭ كىم ەكەندىكتەرىڭىزدى، بالالارىڭىزعا رۋح بەرەتىن، نامىستى ۇرپاق وسىرەتىن انا دەگەن اسىل جان رەتىندە ءوز رولدەرىڭىزدى ۇمىتتىڭىزدار.
بۇعان دەيىن بىرنەشە رەت ايتقانمىن، تاعى دا قايتالاپ ايتامىن:
ااك - اسپدان باس تارتىڭىزدار!!!
مەملەكەت بالالارعا "جاردەماقى" دەپ قايىر-ساداقا ەمەس، "انا مەن بالا" كاپيتالى قورىن قۇرسىن!!!
مەكتەپ جاسىنان بالالاردىڭ نامىسىنا ءتيىپ، قۇربى-دوستارىنىڭ الدىندا ۇيالتىپ، كيىم-كەشەك تاراتۋىن توقتاتسىن!!!
جيەن ءسىڭلىم كوپبالالى انا. ءۇش بالاسى مەكتەپ جاسىندا. 7 سىنىپتاعى قىزىنا مەكتەپتە كيىم-كەشەك بەرگەن ەكەن، الماي قويىپتى.
"اپاي، ءبىز كەدەي ەمەسپىز، كەرەك ەمەس" دەپتى.
مۇعالىمى سىڭلىمە حابارلاسىپ، جاعدايدى ايتىپ، ء"وزىڭىز كەلىپ الىپ كەتىڭىز" دەپتى.
قىزىنان سۇراسا، "ماما، دوستارىمنىڭ كوزىنشە قايىرشى قۇساپ سولار بەرگەن كيىمدى الام با، پوزور عوي!.. كەرەك ەمەس، ءسىز دە الماڭىز" دەپ، نامىستان جارىلىپ كەتەردەي بۋلىعىپ تۇر دەيدى.
"قىزىم نامىستانىپ الماي قويعان زاتتى مەن بارىپ الام با؟ قاجەت ەمەس، ءويتىپ بەرگەنشە، بەرمەي-اق قويسىنشى، قۇداي وزىمىزگە قۋات بەرسىن!.." دەپ وتىر.
كوپبالالى انالاردىڭ اراسىنان مۇنداي اڭگىمەلەردى ءجيى ەستىپ قالامىن...
ۇكىمەت كەيىنگى ۇرپاقتى ارلى، نامىستى، ۇياتتى عىپ ءوسىرۋدىڭ جولدارىن ەمەس، وسىنداي ءارتۇرلى دەڭگەيدە، يتكە سۇيەك لاقتىرعانداي عىپ قايىر-ساداقا تاراتۋ ارقىلى بالالاردىڭ رۋحىن ءولتىرىپ، نامىسسىزدىق، الاقان جايعىشتىق پسيحولوگياسىن قالىپتاستىرىپ وتىر.
اقىرى مەملەكەتتەن بولىنەتىن قارجى عوي، ماسەلە - سونى قالاي بەرۋدە! ادەمى، مادەنيەتتى ۇيىمداستىرۋعا بولادى عوي! مەملەكەتىڭ دە، ءوزىڭ دە، انالار دا، بالالار دا ۇيالمايتىنداي، نامىسىنا تيمەيتىندەي، حالىقارالىق ارەنادا ءوز ابىرويىڭ، مەملەكەت ابىرويى ارتاتىنداي ەتىپ ءبولۋدىڭ جولدارىن تابۋعا بولادى. ونىڭ بىردەن-ءبىر جولى - قايتالاپ ايتامىن، "انا مەن بالا كاپيتالى" مەملەكەتتىك قورىن قۇرىپ، سول ارقىلى ءار بالاعا جەكە شوت اشۋ. ول شوت بالاعا عانا تيەسىلى شوت بولۋ كەرەك!!! اكەسى الىپ، اراق ءىشىپ، شەشەسى الىپ، كىرپىك جالعاتىپ جۇرمەيتىندەي، ول اقشا تەك بالانىڭ قاجەتىنە عانا جۇمسالۋى ءتيىس!
"ادىرنا" ۇلتتىق پورتالى
