الماتىلىق پوليتسەيلەر ارنايى وپەراتسيا بارىسىندا قارۋ-جاراق وڭدەيتىن جاسىرىن تسەحتىڭ جۇمىسىن اشكەرەلەدى، – دەپ حابارلايدى «ادىرنا» ۇلتتىق پورتالى IIM-گە سىلتەمە جاساپ.
– ارنايى وپەراتسيا بارىسىندا الماتى قالاسى مەدەۋ اۋدانىنىڭ ەكى تۇرعىنى ۇستالىپ، ولاردىڭ تۇرعىلىقتى مەكەن-جايلارى بويىنشا ءىرى كولەمدەگى ءتۇرلى ۇلگىدەگى اتىس قارۋلارى، وق-دارىلەر جانە قارۋلاردى قايتا وڭدەۋگە ارنالعان قۇرىلعىلار تاركىلەندى. بۇل فاكت قازاقستان رەسپۋبليكاسى قىلمىستىق كودەكسىنىڭ 287-بابىنىڭ 3-تارماعى (قارۋدى، وق-دارىلەردى، جارىلعىش زاتتاردى جانە جارىلىس قۇرىلعىلارىن زاڭسىز يەمدەنۋ، بەرۋ، وتكىزۋ، ساقتاۋ، تاسىمالداۋ نەمەسە الىپ ءجۇرۋ) بويىنشا تىركەلىپ، قىلمىستىق ءىس قوزعالدى. بارلىق قارۋ -جاراق ارنايى بالليستيكالىق ساراپتاماعا جىبەرىلدى،” – دەپ مالىمدەدى الماتى قالاسىنىڭ پد باستىعىنىڭ ورىنباسارى بەرىك ابىلبەكوۆ.
سونداي-اق ساراپتاما ناتيجەلەرى بويىنشا اتالعان قارۋ-جاراقتىڭ قانداي ماقساتتا قايتا وڭدەلگەندىگى بەلگىلى بولادى.
«ادىرنا» ۇلتتىق پورتالى
