2020 ج. 13 قاراشادا ونلاين فورماتتا، قر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن "اۋىل ايەلدەرىنىڭ اۋىلداعى ءومىر ساپاسىن ارتتىرۋداعى باستامالارى جانە تۇراقتى دامۋ ماقساتتارى - 2030 جەتىستىكتەرى" اتتى قازاقستاننىڭ اۋىل ايەلدەرىنىڭ ءىىى رەسپۋبليكالىق فورۋمى ءوتتى.
ۇلتتىق كوميسسيا ءتورايىمى لاززات رامازانوۆا پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆتىڭ سالەمىن جەتكىزدى.
وندا، بۇگىندە ەل حالقىنىڭ 40% استامى اۋىلدىق جەرلەردە تۇرادى، سوندىقتان اۋىلدى دامىتۋ مەملەكەتتىك ساياساتتىڭ باسىم باعىتى بولىپ تابىلادى دەپ اتالعان. بۇل رەتتە اۋىل ايەلدەرىنىڭ الەۋەتىن كۇشەيتۋگە ەرەكشە ءمان بەرىلەدى. جىل سايىن ولاردىڭ ەكونوميكالىق بەلسەندىلىگى مەن الەۋمەتتىك جاۋاپكەرشىلىگى ارتىپ كەلەدى. ايەلدەر ءوز كاسىپورىندارىن اشىپ، شارۋا قوجالىقتارىن باسقارادى، بىرەگەي وندىرىستەردى ىسكە قوسادى جانە مىڭداعان ادامدى جۇمىسپەن قامتاماسىز ەتەدى. الەۋمەتتىك سالا، دەنساۋلىق ساقتاۋ جانە ءبىلىم بەرۋدىڭ دامۋىنا بەلسەندى ۇلەس قوسادى.
لاززات رامازانوۆا ءوز سوزىندە بۇگىنگى تاڭدا 1,8 ملن. اۋىل ايەلىنىڭ ەلىمىزدىڭ ەكونوميكالىق تۇراقتىلىعىن نىعايتۋعا زور ۇلەس قوسىپ وتىرعانىن اتاپ ءوتتى.
«قازاقستان پرەزيدەنتى قاسىم-جومارت توقاەۆ ءوز جولداۋىندا اۋىل شارۋاشىلىعىن دامىتپاي باسەكەگە قابىلەتتى ەكونوميكا قۇرۋ مۇمكىن ەمەس ەكەنىن اتاپ ءوتتى، اۋىل مەن اگروونەركاسىپتىك كەشەنىن ودان ءارى دامىتۋ بويىنشا ماڭىزدى مىندەتتەردى ايقىندادى. بۇل مىندەتتەردى ىسكە اسىرۋدا، ارينە، اۋىل ايەلدەرىنە ۇلكەن جانە جاۋاپتى ءرول بولىنگەن. تاجىريبە كورسەتكەندەي، ايەلدەر وزدەرىنە جۇكتەلگەن مىندەتتەردى تابىستى ءارى ءتيىمدى ورىنداۋدا", - دەپ مالىمدەدى ۇلتتىق كوميسسيا باسشىسى.
ءلاززات رامازانوۆا وتباسىلىق قۇندىلىقتار مەن داستۇرلەردى ساقتاۋداعى اۋىل ايەلدەرىنىڭ ءرولىن ەرەكشە اتاپ ءوتتى.
"وتباسى ەجەلدەن قوعامنىڭ مىزعىماس نەگىزى، بىرلىكتىڭ، بەيبىتشىلىك پەن كەلىسىمنىڭ سيمۆولى بولعان قازاقستان ءۇشىن ايەلدىڭ ءرولىن اسىرا باعالاۋ مۇمكىن ەمەس. بۇگىندە ەلىمىزدىڭ بارلىق وڭىرلەرىندە وتباسى ينستيتۋتىن نىعايتۋ جانە دامىتۋ بويىنشا جۇيەلى جۇمىس جۇرگىزىلۋدە. ادام جۇزەگە اسىراتىن بارلىق ءساتتى باستامالار ونىڭ وتباسى شەڭبەرىندەگى تاربيەسىنىڭ ناتيجەسى ەكەنىن ۇمىتپايىق. اۋىل ايەلدەرى ناعىز ەڭبەككەرلەر، ولار وتباسى وشاعىن ساقتاپ قالۋدىڭ ۇيلەسىمدى ۇلگىسى بولىپ قالا بەرمەك", - دەپ اتاپ ءوتتى سپيكەر.
ۇلتتىق كوميسسيا باسشىسى بيىلعى جىلى Nur Otan پارتياسى ۇيىمداستىرعان پرايمەريز اياسىنداعى اۋىل ايەلدەرىنىڭ بەلسەندىلىگىنە دە نازار اۋداردى. پارتيا ىشىندەگى سايلاۋ ايەلدەرگە وزدەرىنىڭ الەۋمەتتىك جانە ساياسي امبيتسيالارىن جاريالاۋعا مۇمكىندىك بەردى. "پرايمەريزگە جاس جانە بەلسەندى قىزدار شىقتى. ولار قوعامدى تولعاندىراتىن نەگىزگى الەۋمەتتىك ماسەلەلەردى شەشۋدى ءوز موينىنا الۋعا دايىن ەكەندىكتەرىن كورسەتتى", - دەپ ەرەكشە اتادى ل.رامازانوۆا.
فورۋمدا لاززات رامازانوۆا ۇلتتىق كوميسسيانىڭ اۋىل ايەلدەرىنىڭ قۇقىقتارىن نىعايتۋعا، ولاردىڭ الەۋمەتتىك جانە ەكونوميكالىق الەۋەتىن دامىتۋعا مۇمكىندىك بەرەتىن باستامالارىن اتاپ ءوتتى. اتاپ ايتقاندا، جەرگىلىكتى اتقارۋشى ورگاندارمەن، كاسىپوداقتارمەن جانە ۇكىمەتتىك ەمەس ۇيىمدارمەن بىرلەسىپ، ايەلدەردىڭ ەڭبەگىنە اقى تولەۋدىڭ ەڭ تومەنگى كۇنكورىس دەڭگەيىنەن تومەن بولۋىنا، ايەلدەردىڭ ەڭبەك ەتۋ قۇقىقتارىنىڭ بۇزىلۋىنا، الەۋمەتتىك سالا مەكەمەلەرىنىڭ نەگىزسىز جابىلۋىنا، بالالى وتباسىلاردىڭ ءومىر ءسۇرۋ دەڭگەيىنىڭ تومەندەۋىنە جول بەرمەۋ شارالارى ۇسىنىلدى.
سونداي-اق، ەل ەكونوميكاسى مەن وتباسىلىق-دەموگروفيالىق ماسەلەلەردى دامىتۋ ءۇشىن اۋىلداعى ايەلدەر كاسىپكەرلىگىنىڭ ماڭىزدىلىعىن باعالاۋ بويىنشا ەلدىك زەرتتەۋگە باستاماشىلىق ەتۋ ۇسىنىلدى. اۋىلدىق جەرلەردە ايەلدەر كاسىپكەرلىگىنىڭ دامۋىنا تالداۋ جۇرگىزۋگە مۇمكىندىك بەرەتىن رەسمي ستاتيستيكا ءۇشىن كورسەتكىشتەر تىزبەسىن قالىپتاستىرۋ كەرەكتىگىن ايتتى.
ءلاززات رامازانوۆا ۇكىمەتتىك ەمەس ۇيىمداردىڭ اۋىل ايەلدەرىنىڭ الەۋمەتتىك جاۋاپكەرشىلىگى مەن بەلسەندىلىگىن ارتتىرۋداعى ءرولىن اتاپ ءوتتى.
"اۋىلدىق جەرلەردەگى ايەلدەردىڭ مۇددەلەرىن قورعاۋ ماسەلەلەرىمەن اينالىساتىن ۇەۇ ءۇشىن جىل سايىنعى ارنايى سىيلىققا باستاماشىلىق ەتۋدى ۇسىنامىن. بارلىق ۇەۇ-دى اۋىلدىق ەلدى مەكەندەر دەڭگەيىندە بىرلەسىپ جۇمىس ىستەۋگە شاقىرامىن", - دەدى لاززات رامازانوۆا.
فورۋمعا قاتىسۋشىلار ايتىلعان ۇسىنىستاردى ءبىراۋىزدان قولدادى.
سونداي-اق فورۋمدا جىلدىڭ ۇزدىك بەلسەندىلەرى – ازاماتتىق قوعام، بيزنەس جانە اگروونەركاسىپتىك كەشەن، باق وكىلدەرى، سونداي-اق اۋىلدىق جەرلەردى دامىتۋعا ۇلەس قوسىپ جۇرگەن ۇزدىك اۋىل ەڭبەككەرلەرى انىقتالدى. سونىمەن قاتار، فورۋمدا «اسقار شىڭدارعا تۋ تىككەن اۋىل ايەلدەرى/ 100 يستوري ۋسپەحا سەلسكيح جەنششين» اتتى كىتابىنىڭ تۇساۋكەسەرى ءوتتى.
فورۋمنىڭ ۇيىمداستىرۋشىلارى مەن رەسمي سەرىكتەستەرى - قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ جانە Coca-Cola حالىقارالىق قورىنىڭ، ەقىۇ-نىڭ نۇر-سۇلتانداعى باعدارلامالار ءوفيسىنىڭ قولداۋىمەن "جاسىل ەكونوميكا جانە G-Global-دى دامىتۋ كواليتسياسى "زتب،" EXPO&WOMEN" قم، "قازاقستان ايەلدەرىنىڭ اگرارلىق وداعى" زتب، "الەۋمەتتىك ديناميكا" قق بولىپ تابىلادى.
