اقتوبە وبلىسىندا 5 كوللەدج بيىل "جاس مامان" جوباسى اياسىندا ماتەريالدىق-تەحنيكالىق بازاسىن جاڭارتۋدا. جوبانىڭ ماقساتى رەسپۋبليكا بويىنشا 180 كوللەدجدى جانە 20 جوعارى وقۋ ورنىن 100 اسا تالاپ ەتىلەتىن ماماندىقتار بويىنشا جاڭعىرتۋ جانە بىلىكتى مامانداردى دايارلاۋدىڭ حالىقارالىق تاجىريبەسىن ەنگىزۋ بولىپ تابىلادى. وتكەن جىلى رەسپۋبليكاداعى 80 كوللەدج وسى جوباعا تاڭدالىنىپ الىندى. ال اقتوبە وبلىسىنان ءتۇرلى قويىلعان تالاپتارعا ساي كەلەتىن 9 كوللەدجگە تاڭداۋ ءتۇستى.
جوبا اياسىندا 5 كوللەدج 2020 جىلى، 4 كوللەدج 2021 جىلى جابدىقتالاتىن بولادى. رەسپۋبليكالىق بيۋدجەتتەن بيىلعى جىلى 1,4 ملرد. تەڭگە قاراستىرىلدى. بۇل وقۋ زەرتحانالارى مەن شەبەرحانالارىن زاماناۋي قۇرىلعىلارمەن جابدىقتاۋ، كابينەتتەردى قۇرال-جابدىقتارمەن قامتاماسىز ەتۋگە، لوباراتوريالاردى جاڭارتۋعا جۇمسالادى. وسى سالادا ءبىلىم الاتىن ستۋدەنتتەردىڭ پراكتيكالىق جۇمىسقا دەن قويۋىنا باسىمدىق بەرىلەدى.
«جاس مامان» جوباسى - وقۋ ورىندارى ءۇشىن ماتەريالدىق بازانى كەڭەيتۋگە جانە جاقسارتۋعا تاماشا مۇمكىندىك. بولاشاقتا بۇل ينۆەستيتسيا وبلىس ەكونوميكاسى ءۇشىن قاجەتتى بىلىكتى كادرلاردىڭ دايارلانىپ شىعۋىنا مۇمكىندىك بەرەدى. «جاس مامان» جوباسىنىڭ ارتىق¬شىلىعى – ەڭ قاجەتتى مامان¬دىقتارعا باسىمدىق بەرىلۋى. ياعني قازىرگى سۇرانىستاعى ماماندىقتاردى ساپالى ەتىپ شىعارۋعا كۇش جۇمسالاتىن بولادى دەپ كۇتىلۋدە. سونىمەن قاتار، باسەكەگە قابىلەتتى مامان دايارلاۋ بويىنشا وقىتۋ جوسپارى جانداندىرىپ، وزگەرتۋ مەن تولىقتىرۋلار ەنگىزىلەدى.
بۇگىنگى كۇنى جوبا شەڭبەرىندە وڭىردە سۇرانىسقا يە 24 ماماندىق بويىنشا وقىتۋ ءۇشىن جابدىقتار ساتىپ الىنادى، ولار: تەحنيكالىق ماماندىقتار جانە قىزمەت كورسەتۋ سالاسى بويىنشا.
كوللەدجدەردى جابدىقتاۋعا ارنالعان قۇرىلعىلاردىڭ ءتىزىمى كوللەدجدەردىڭ ۇسىنىستارىنا، جۇمىس بەرۋشىلەردىڭ تالاپتارى مەن WorldSkills ستاندارتتارىنا سايكەس جاسالدى.
مىسالى، اقتوبە كولىك، كوممۋنيكاتسيا جانە جاڭا تەحنولوگيا كوللەدجى جوباعا 4 ماماندىق 4 بىلىكتىلىك بويىنشا قاتىسۋدا.
اتالعان كوللەدج مەحاترونيكا، روبوتوتەحنيكا، لوگيستيكالىق كونتروللەرلەردى باعدارلامالاۋ، ەلەكتروتەحنيكا بويىنشا زامان تالابىنا ساي وقۋ كابينەتى، جاڭا ۇلگىدەگى مونوبلوكتار، ءموبيلدى ۋلتراقىسقا فوكۋستىق پروەكتورلار، ۆاگون شارۋاشىلىعى ماماندىعى بويىنشا 12 ورىندىق ينتەراكتيۆتى سىنىپ، بايلانىس جۇيەسىنىڭ جاڭا ۇلگىدەگى قۇرىلعىلارى، قوزعالتقىشتىڭ ماكەتتىك كورىنىسى، ەلەكترلەنگەن جاڭا ۇلگىدەگى ستەندتەر، تاجىريبە جۇمىستارىنا ارنالعان ستانوكتارمەن جابدىقتالدى. سونداي-اق تەمىر جولداعى اقاۋلاردى انىقتايتىن قۇرىلعىلار، تەمىر جولداعى اۆتوماتتاندىرىلعان جۇمىس ءتۇرىنىڭ جاڭا قۇرىلعىسى الىندى. زامان تالابىنا ساي، وندىرىستە قولدانىلىپ جۇرگەن بۇل قۇرال-جابدىقتارمەن جۇمىس جاساي الۋى ءۇشىن كوللەدج وقىتۋشىلارىنىڭ بىلىكتىلىگى دە جەتىلدىرىلەتىن بولادى.
«جاس مامان» جوباسىن ىسكە اسىرۋ جاڭاشا وقىتۋدىڭ جەكە مودەلىن قالىپتاستىرىپ، ونەركاسىپتە سۇرانىسقا يە حالىقارالىق دەڭگەيدەگى بىلىكتى مامانداردى دايارلاۋعا جول اشتى.
قازىرگى تاڭدا وقۋ ورىندارىندا جابدىقتاردى ورناتۋعا دايىنداۋ بويىنشا بارلىق قاجەتتى جۇمىستار جۇرگىزىلۋدە. وسىلايشا، حرومتاۋ تاۋ-كەن، اقتوبە جوعارى پوليتەحنيكالىق، قۇرىلىس جانە بيزنەس كوللەدجدەرىندە جوسپارلانعان جۇمىستاردىڭ ءبىر بولىگى اياقتالۋ ساتىسىندا. جابدىقتاردى جەتكىزۋدى اقتوبە اۆتوجول، كولىك-كوممۋنيكاتسيا جانە جاڭا تەحنولوگيالار كوللەدجدەرى كۇتۋدە.
كوللەدجدەردە كادرلاردى دايارلاۋدىڭ حالىقارالىق ستاندارتتارىن ەنگىزۋ ءۇشىن شەتەلدىك سەرىكتەستەر تارتىلاتىن بولادى. شەتەلدىك سەرىكتەسپەن بىرلەسىپ كادرلاردى دايارلاۋ باعدارلامالارىن جاڭارتۋ، وقىتۋشىلاردىڭ بىلىكتىلىگىن ارتتىرۋ جانە وقۋ ورنى مەن مەنەدجمەنت پروتسەستەرىن جەتىلدىرۋ بويىنشا جۇمىس ۇيىمداستىرىلعان.
«جاس مامان» جوباسى كوللەدجدىڭ وقۋ-وندىرىستىك بازاسىن جاڭارتىپ قانا قويماي، قۇزىرەتتىلىك ورتالىعىن قۇرۋعا دا مۇمكىندىك بەرمەك.
