وزبەكستاننىڭ مەملەكەتتىك مەكتەپكە دەيىنگى ءبىلىم بەرۋ مەكەمەلەرىندە قوسىمشا شەت ءتىلى رەتىندە قىتاي ءتىلى وقىتىلا باستاۋى مۇمكىن. ءدال وسى ماسەلە قىتايدىڭ وزبەكستانداعى توتەنشە جانە وكىلەتتى ەلشىسى تسزيان يان مەن وزبەكستاننىڭ مەكتەپكە دەيىنگى ءبىلىم ءمينيسترى اگريپپين شين وتكىزگەن ونلاين-كەزدەسۋدە تالقىلانعان. بۇل اقپاراتتى وزبەكستاننىڭ مەكتەپكە دەيىنگى ءبىلىم مينيسترلىگىنىڭ ءباسپاسوز قىزمەتى حابارلادى.
ۆەدومستۆو مالىمەتىنشە، 8 قاراشا كۇنگى ونلاين-كەزدەسۋ كەزىندە تاراپتار قىتاي ءتىلى ماماندارىنىڭ بىلىكتىگىن جاقسارتۋ ماسەلەسىنە دە توقتالعان. ەكى جاق سونىمەن بىرگە تاشكەنتتەگى تسيفرلىق بالاباقشا اشۋ پيلوتتىق جوباسىنىڭ بارىسىن دا ءسوز ەتكەن. ديداكتيكالىق ماتەريالدار مەن ءتۇرلى ويىن جابدىقتارىن شىعارۋ ءۇشىن ينۆەستيتسيا تارتۋ قاجەتتىگى ايتىلعان.
كەزدەسۋگە قاتىسۋشىلار بالاباقشالاردا ءبىلىم ساپاسىن ارتتىرۋ ءۇشىن قىتايدىڭ سۋن تسينلين اتىنداعى قورمەن ارىپتەستىك ورناتۋ جايىن دا ورتاعا سالعان.
ورتالىق ازيا (وا) ەلدەرىن ارزان نەسيە مەن ينۆەستيتسيامەن قامتاماسىز ەتەتىن قىتاي كوپتەگەن ءبىلىم جوبالارىن دا قارجىلاندىرادى. مىسالى، جىل سايىن 100-دەن استام وزبەك ستۋدەنتى قىتاي ۋنيۆەرسيتەتتەرى ۇسىنعان گرانتپەن ءبىلىم الادى.
وزبەكستان وا ايماعىندا العاش بولىپ جوعارعى وقۋ ورىندارىندا قىتاي ءتىلىن وقىتا باستاعان. 2005 جىلى ەلدە قىتاي ءتىلى مەن مادەنيەتىن ناسيحاتتايتىن العاشقى كونفۋتسي ينستيتۋتى اشىلدى دەپ جازادى ازاتتىق ءتىلشىسى.
