6-قاراشا كۇنى الماتىدا "100 ولەڭ" رەسپۋبليكالىق كوركەمسوز وقۋ سايىسى مارەسىنە جەتىپ، تەاتر ءارتىسى ەدىگە قايىرتايۇلى توپ جاردى. ۇيىمداستىرۋشىلاردىڭ ايتۋىنشا، بايقاۋعا قاتىسۋعا باستاپقىدا 57 ادام ءوتىنىش ءبىلدىرىپ، ونلاين ىرىكتەۋدەن 15 قاتىسۋشى الماتىدا وتكەن فينالدىق كەزەڭگە جولداما العان. سايىس جازۋشىلار وداعىندا 5 ساعاتقا جۋىق ۋاقىتقا سوزىلىپ، وتە تارتىستى ءوتتى.
ءبىرىنشى كەزەڭدە ءار قاتىسۋشى قورجىننان 5 ولەڭ الىپ، ونى تولىق جاتقا ايتىپ جارىستى. ەكى رەت مۇدىرگەندەر، كەلەسى كەزەڭگە وتپەدى. ەكىنشى تۋردا قازىلار ءجۇرسىن ەرمان، التىنبەك قورازباەۆ، عالىم جايلىباي، باۋىرجان جاقىپ، سەرىك قاليەۆ، باقىت بەدەلحان، اقبەرەن ەلگەزەك، ماقپال مىسا قاتىسۋشىلاردان 100 ولەڭنىڭ كەز كەلگەن جەرىنەن سۇراپ، جاڭىلىستىرۋعا تىرىستى.
اقىرى فينالعا 12 جاسىندا قۇراندى تولىق جاتتاپ، قاري اتانعان قۋانىش كەنەشباي، اكتەر ەدىگە قايىرتايۇلى جانە وسكەمەننەن كەلگەن كوركەمسوز وقۋ شەبەرى قۋانىش ەركىن شىقتى. ولار ءبىر-بىرىنەن ولەڭدەر سۇراۋ ارقىلى سايىسىپ، ناتيجەسىندە ەدىگە قايىرتايۇلىنىڭ باعى جاندى. ەدىگەگە ASSYLTAS قوعامدىق قورى تاعايىنداعان تەمىر تۇلپاردىڭ كىلتى تابىستالدى. بارلىق قاتىسۋشىلار باعالى سىيلىقتارمەن ماراپاتتالدى.
ۇيىمداستىرۋشىلار كەلەسى جىلى دا اتالعان جارىس جالعاسىن تابادى دەيدى.
"ادىرنا" ۇلتتىق پورتالى
