بيىل قازاقستان كاسىپوداقتارىنىڭ قۇرىلعانىنا 30 جىل تولدى. بۇل قوزعالىستىڭ جۇمىسى سوناۋ حح عاسىردا بولعان جۇمىسشىلار كوتەرىلىسىنەن باستاۋ العان ەدى. قازىرگى تاڭدا «قازاقستان رەسپۋبليكاسى كاسىپوداقتار فەدەراتسياسى» رەسپۋبليكالىق كاسىپوداقتار بىرلەستىگى سالالىق كاسىپتىك وداقتاردى جانە اۋماقتىق كاسىپوداقتار بىرلەستىكتەرىن بىرىكتىرەتىن كوممەرتسيالىق ەمەس ۇيىم بولىپ تابىلادى.
زاماناۋي قوعام قالىپتاستىرۋدا
كاسىپوداقتىڭ نەگىزگى ماقساتى — ەڭبەك داۋلارىن شەشىپ، جۇمىسكەرلەردىڭ مۇددەلەرىن قورعاۋ، حالىقتىڭ ءومىر ءسۇرۋ دەڭگەيىن كوتەرىپ، الەۋمەتتىك كەپىلدىكتى قامتاماسىز ەتۋ. ەلباسىمىزدىڭ ءوزى «جۇمىسشىلار وزدەرىن لايىقتى سەزىنۋلەرى ءۇشىن كاسىپوداقتار قوزعالىسى ءوز بيىگىندە بولۋى ءتيىس» دەپ ايتقان بولاتىن. ۇيىم بۇگىندە زاماناۋي قوعامدى قالىپتاستىرۋ جولىندا قىزمەت ەتىپ كەلەدى.
ەكى ميلليونعا جۋىق مۇشە بار
قازىرگى تاڭدا ەلىمىزدە 22 سالالىق كاسىپوداق، 17 اۋماقتىق كاسىپوداق بىرلەستىكتەرى بار. ونىڭ قۇرامىنا 2 ميلليونعا جۋىق مۇشە كىرەدى. رەسمي ستاتيستيكا بويىنشا، ەلىمىزدەگى جالدامالى جۇمىسشىلار سانى 6 ملن ادام بولسا، سونىڭ 35 پايىزى كاسىپوداق ۇيىمدارىنا مۇشە. جالپى كاسىپوداق ءبىرشاما جۇمىستاردى اتقاردى. اتاپ ايتاتىن بولساق، ەڭبەك كودەكسىن ازىرلەۋ كەزىندە كاسىپوداقتار فەدەراتسياسى 200-دەن استام وزگەرىس ۇسىنىپ، ونىڭ 117-ءسى زاڭعا ەنگىزىلدى. قىزمەتكەرلە ەڭبەك نارىعىنىڭ تيىمدىلىگىن قامتاماسىز ەتۋگە تىرىسۋدا. سونداي-اق، وبلىستىق كاسىپوداق كوميتەتىندە كاسىپوداق كادرلارى مەن اكتيۆىن وقىتۋعا ەرەكشە كوڭىل ءبولىپ جاتىر.
رەسپۋبليكالىق كاسىپوداقتار بىرلەستىگىنىڭ نەگىزگى فۋنكتسيالارى قانداي؟
كاسىپوداق بىرلەستىگى تومەندەگىدەي قىزمەتتەردى اتقارادى:
1) ءوزىنىڭ مۇشەلىك ۇيىمدارىنىڭ قۇقىقتارى مەن مۇددەلەرىن ءبىلدىرۋ، قورعاۋ;
2) ءوزىنىڭ مۇشەلىك ۇيىمدارى قىزمەتىنىڭ نەگىزگى باعىتتارىن، ستراتەگياسىن ازىرلەۋ جانە ايقىنداۋ;
3) الەۋمەتتىك ارىپتەستىكتىڭ بارلىق دەڭگەيلەرىندە الەۋمەتتىك ارىپتەستىك جۇيەسىن دامىتۋعا جاردەمدەسۋ;
4) رەسپۋبليكالىق جۇمىس بەرۋشىلەر بىرلەستىكتەرىمەن جانە قازاقستان رەسپۋبليكاسىنىڭ ۇكىمەتىمەن باس كەلىسىم جاساسۋ كەزىندە الەۋمەتتىك ارىپتەستىكتىڭ تاراپى بولىپ ارەكەت ەتۋ، كەلىسىم جوباسىن دايىنداۋ جانە ونى جاساسۋ جونىندەگى كەلىسسوزدەرگە قاتىسۋ;
5) الەۋمەتتىك ارىپتەستىك جانە الەۋمەتتىك پەن ەڭبەك قاتىناستارىن رەتتەۋ جونىندەگى رەسپۋبليكالىق ۇشجاقتى كوميسسيانىڭ جۇمىسىنا قاتىسۋ;
6) شەتەلدىك، حالىقارالىق كاسىپوداقتار بىرلەستىكتەرىمەن جانە ەڭبەكشىلەردىڭ قۇقىقتارى مەن بوستاندىقتارىن قورعاۋ سالاسىندا جۇمىس ىستەيتىن وزگە دە ۇيىمدارمەن ىنتىماقتاستىق جاساۋ جانە مۇشەلىك ۇيىمداردىڭ ولارمەن بايلانىستار ورناتۋىنا جاردەم كورسەتۋ;
7) جارعىلىق ماقساتتاردى ىسكە اسىرۋعا باعىتتالعان وزگە دە فۋنكتسيالاردى جۇزەگە اسىرۋ.
كاسىپوداققا قالاي مۇشە بولۋعا بولادى?
«كاسىپوداقتار – ەڭبەك ادامىنىڭ قۇقىقتارىن قورعاۋ، ونىڭ لايىقتى تۇرمىس ساپاسى مەن جۇمىس جاعدايىن قامتاماسىز ەتۋ جولىندا مارتەبەلى ميسسيا اتقاراتىن اسا ماڭىزدى زاماناۋي قوعامدىق ينستيتۋتتىڭ ءبىرى» دەپ قر پرەزيدەنتى قاسىم-جومارت توقاەۆ اتاپ وتكەندەي، بۇگىنگى كۇنى كاسىپوداقتار قىزمەتكەرلەردىڭ ەڭبەك قاۋىپسىزدىگى مەن قۇقىقتارىنىڭ ساقتالۋىن قامتاماسىز ەتىپ، جۇمىس بەرۋشى مەن جۇمىسشىلار اراسىندا التىن كوپىردىڭ ورناۋىنا ۇيىتقى بولاتىن قوزعاۋشى كۇشكە اينالدى.
ۇيىم نەگىزى ەرىكتى تۇردە قۇرىلادى. ەگەر ءسىز جۇمىس ىستەيتىن مەكەمەدە كاسىپوداق ۇيىمى بولماسا، ونى ءوز بەتىڭىزبەن قۇرۋعا مۇمكىندىگىڭىز بار. ال جۇمىس ورىنىڭىزدا باستاۋىش كاسىپوداق ۇيىمى بولسا، كاسىپوداق كوميتەتىنە كاسىپوداققا مۇشەلىككە قابىلداۋ جانە مۇشەلىك كاسىپوداق جارناسىن ۇستاۋ تۋرالى ءوتىنىش جازۋ قاجەت. ايتا كەتەيىك، كاسىپوداقتار ءوز قىزمەتىندە بارلىق دەڭگەيدەگى مەملەكەتتىك ورگانداردان، ساياسي پارتيالاردان، جۇمىس بەرۋشىلەر مەن ولاردىڭ بىرلەستىكتەرىنەن تاۋەلسىز بولادى، ولاردىڭ باقىلاۋىندا بولمايدى جانە ولارعا ەسەپ بەرمەيدى.
كاسىپوداق قۇقىقتىق كومەك كورسەتۋگە دايىن
كاسىپوداققا قاتىستى بارلىق سۇراقتار بويىنشا 8(7172) 643481 جانە 643482 نومىرلەرىنە حابارلاسا الاسىز. ەگەر قۇقىقتىق كومەك العىڭىز كەلسە، ەلەكتروندى پوشتاعا (legaldep@fprk.kz) حات جولداڭىز.
«ادىرنا» ۇلتتىق پورتالى
