امەريكا قۇراما شتاتتارىنىڭ جاڭا پرەزيدەنتى بولىپ دەموكراتتار پارتياسىنىڭ مۇشەسى دجو بايدەن سايلاندى. ول كوزبوياۋشىلىقپەن «سايلاۋ وتكىزىلىپ» تاعايىندالعان جوق، ونى امەريكانىڭ 200 ميلليوننان استام ءار ءتۇرلى ەتنوستاردان عانا ەمەس، ءار ءتۇرلى ناسىلدەردەن قۇرالعان، ءار ءتۇرلى دىندەرگە سيىناتىن حالقى قىزۋ تارتىستا سايلادى. بۇل جەڭىس دجو بايدەننىڭ نەمەسە دەموكراتتاردىڭ عانا جەڭىسى ەمەس، بۇل بوستاندىق سۇيگىش امەريكا حالقىنىڭ ۇلى جەڭىسى!
مەنىڭ دوسىم سەرىكجان بياش دونالد ترامپقا جانكۇيەر بولدى، سەبەبى ول قىتاي حالىق رەسپۋبليكاسىنىڭ شىعىس تۇركىستانداعى گەنوتسيدتىك ساياساتىنا قارسى پرەزيدەنت بولدى، وسى باعىتتا كوپ جۇمىستار اتقاردى، ءتىپتى زاڭ قابىلداتىپ ۇلگەردى. ارينە مەن دە، كوپتەگەن قازاقتار، ۇيعىرلار، قىرعىزدار تەك وسى ماقساتتا د. ترامپتىڭ جەڭىسىن تىلەدىك، بىراق سايلايتىن ءبىز ەمەس، امەريكالىقتار، ال ولار ءوز تاڭداۋىن جاسادى.
نە سەبەپپەن د. ترامپ جەڭىلىسكە ۇشىرادى؟ وعان قىتاي كوممۋنيستەرىنىڭ قانداي ىقپالى بولدى؟
ەشقانداي! سەبەبى د. ترامپتىڭ ءىس-ارەكەتى امەريكا حالىقتارىنىڭ وي-نيەتىمەن ساباقتاسىپ جاتىر، ول امەريكاندىقتار باسقاشا ويلاسا قحر كوممۋنيستىك بيلىگىنە اشىق قارسى شىقپاس ەدى.
جەڭىسكە جەتكەن دجو بايدەن دە د. ترامپتىڭ قىتاي كوممۋنيستەرىنىڭ قانقۇيلى ساياساتىنا قارسى باستاپ كەتكەن جۇمىسىن جالعاستىرا بەرەدى، سەبەبى ول امەريكا حالقىنىڭ تالابى، دەموكراتيالىق جولمەن سايلانعان پرەزيدەنت ءوز حالقىنىڭ ويىمەن ساباقتاس قيمىل جاسايدى.
سوندىقتان قازاقتاردىڭ، ونىڭ ىشىندە مەنىڭ دوسىم سەرىكجاننىڭ د. بايدەن قىتاي بيلىگىنە قارسى كەلمەيدى، ونىڭ شىعىس تۇركىستانداعى گەنوتسيدتىك ساياساتىنا كوز جۇمىپ قارايدى دەگەن قورقىنىشى بەكەر. ءتىپتى دەموكراتيالىق پارتيانىڭ مۇشەسى رەتىندە دجو بايدەن قىتاي كوممۋنيستەرىنىڭ ادامزاتقا قارسى جاساپ جاتقان گەنوتسيدتىك ساياساتىن بۇرىنعىدان دا قاتتى سىنعا الادى.
سونىمەن ءادىل سايلاۋدا د. ترامپ نە ءۇشىن جەڭىلدى؟ ونىڭ بىردەن-ءبىر سەبەبىن امەريكا حالقىنىڭ مىنەزىنەن ىزدەۋ كەرەك. امەريكا حالقى تەك اق ناسىلدىلەردەن عانا تۇرمايدى، قارا، سارى تۇستىلەر ەل حالقىنىڭ جارتىسىن قۇرايدى. اقش-تا اسىرەسە مەكسيكالىقتار، وڭتۇستىك امەريكا قۇرلىعىنان كەلگەن سارى تۇستىلەر كوپ.
د. ترامپ مىنەزىنىڭ تىكەلىگىنەن حالىقتىڭ وسى بولىگىنءىڭ نارازىلىعىن تۋعىزدى، مىسالى اشىقتان اشىق سارىلاردى ەلگە كىرگىزبەيمىن دەپ، مەكسيكامەن شەكاراعا قورعان سالا باستادى. ونىڭ بيلىگى كەزىندە ناسىلشىلدىك ساياساتتىڭ وتەۋى رەتىندە اق ناسىلدىلەر قارا ناسىلدىلەرگە ارتىقتاۋ بەرگەن قۇقىقتار شەكتەلە باستادى، بۇل زاڭدى ارەكەت قارا ناسىلدىلەردىڭ اشۋ-ىزاسىن تۋعىزدى.
امەريكا حالقى 1775/1783 جىلدارداعى تاۋەلسىزدىك ءۇشىن كۇرەستىڭ ناتيجەسىندە پايدا بولعان بوستاندىق سۇيگىش جاۋىنگەر حالىق. كەيىن بۇل حالىققا كىلەڭ ەركىن ويلى، تەنتەك مىنەزدى، اقىلدى، بوستاندىق سۇيگىش ازاماتتار بارلىق ەلدەن اعىلىپ، امەريكا قۇراما شتاتتارى حالقى قالىپتاسقان. ءتىپتى 19 عاسىردىڭ جارتىسىنا دەيىن كارى قۇرلىقتان دا ەركىن ويلى ازاماتتار بۇل ەلگە كەلۋىن توقتاتپاعان. 1920 جىلدارى بۇعان زاڭمەن شەكتەۋ قويىلسا دا، بۇل ەلگە بوستاندىق سۇيگىش وزىق ويلى ادامدار قونىستانۋىن توقتاتپادى. مىنە، امەريكا حالقى دەگەنىمىز كىمدەر؟!
ال د. ترامپ ءوزىنىڭ تىكە مىنەزىمەن، ياعني اۆتوريتارلىق باسقارۋ تاسىلىمەن وسى بوستاندىق سۇيگىش حالىقتىڭ كوڭىلىنە كۇمان سالدى.
امەريكا حالقى ەشقاشان، ەشقانداي جاعدايدا وزدەرىنە ديكتاتور تۇگىلى، ۇرداجىق ادامنىڭ اۆتوريتارلىق باسقارۋىنا جول بەرمەيدى! مىنە د.ترامپتىڭ جىبەرگەن قاتەلىگى، ول امەريكا حالقىمەن ءوزىنىڭ بيزنەس مەكەمەسى قىزمەتكەرلەرىن شاتاستىرىپ الدى. باتىر اڭقاۋ، ەر كۇدىك دەگەن وسى!
اينالايىن قازاعىم! ءبىز دە تاريحى سان عاسىرلارعا كەتكەن، بوستاندىق سۇيگىش كوك ءبورىنىڭ ۇرپاقتارىمىز! قازاق ۇلتى وزبەك حاندىعىنان وسى بوستاندىق سۇيگىش مىنەزىنە بولا ءبولىنىپ، جەكە وتاۋ قۇرعان، كەيىن بوستاندىق سۇيگىش اردا قازاقپىز دەگەن كوشپەلى تۇرىكتەر جان-جاقتان قوسىلىپ ۇلى قازاق حاندىعىن قۇرعان! ارينە 200 جىلدان استام ۋاقىت رەسەيدىڭ بودانى بولۋ قازاققا كوپ قاسىرەت الىپ كەلدى، قۇلدىق سانالى قازاقتار دا پايدا بولدى. بىراق ەلۋ جىلدا ەل جاڭا، ەگەمەندىك العانىمىزعا دا 30 جىل تولدى. ەندى بىزگە دە ەل تىزگىنىن ءوز قولىمىزعا الىپ قازاقستاندىقتارمەن ساناساتىن، حالىقتى ءوز مەنشىگىم دەپ ەمەس، ءوزىمنىڭ قوجايىنىم دەپ قارايتىن پرەزيدەنت، دەپۋتاتتار، اكىمدەر سايلاپ الاتىن كۇن تۋدى!
وسى امەريكا حالقىنىڭ سايلاۋى بىزدەرگە جۇعىستى بولسىن!
«ازامات جۇنجىمە، جۇرمە بوس.
قول ۇستاس بىرىگىپ تىزە قوس.»
