SHYNQÝAT BAIJANOV: Qytaı kommýnısterine tyqyr taıady ma?

3531
Adyrna.kz Telegram

Amerıka Qurama Shtattarynyń jańa prezıdenti bolyp Demokrattar partııasynyń múshesi Djo Baıden saılandy. Ol kózboıaýshylyqpen «saılaý ótkizilip» taǵaıyndalǵan joq, ony Amerıkanyń 200 mıllıonnan astam ár túrli etnostardan ǵana emes, ár túrli násilderden quralǵan, ár túrli dinderge sıynatyn halqy qyzý tartysta saılady. Bul jeńis Djo Baıdenniń nemese demokrattardyń ǵana jeńisi emes, bul bostandyq súıgish Amerıka halqynyń uly jeńisi!

Meniń dosym Serikjan Bııash Donald Trampqa jankúıer boldy, sebebi ol Qytaı halyq Respýblıkasynyń Shyǵys Túrkistandaǵy genoıdtik saıasatyna qarsy prezıdent boldy, osy baǵytta kóp jumystar atqardy, tipti zań qabyldatyp úlgerdi. Árıne men de, kóptegen qazaqtar, uıǵyrlar, qyrǵyzdar tek osy maqsatta D. Tramptyń jeńisin tiledik, biraq saılaıtyn biz emes, Amerıkalyqtar, al olar óz tańdaýyn jasady.

Ne sebeppen D. Tramp jeńiliske ushyrady? Oǵan qytaı kommýnısteriniń qandaı yqpaly boldy?

Eshqandaı! Sebebi D. Tramptyń is-áreketi Amerıka halyqtarynyń oı-nıetimen sabaqtasyp jatyr, ol amerıkandyqtar basqasha oılasa QHR kommýnıstik bıligine ashyq qarsy shyqpas edi.

Jeńiske jetken Djo Baıden de D. Tramptyń Qytaı kommýnısteriniń qanquıly saıasatyna qarsy bastap ketken jumysyn jalǵastyra beredi, sebebi ol Amerıka halqynyń talaby, demokratııalyq jolmen saılanǵan prezıdent óz halqynyń oıymen sabaqtas qımyl jasaıdy.

Sondyqtan qazaqtardyń, onyń ishinde meniń dosym Serikjannyń D. Baıden qytaı bıligine qarsy kelmeıdi, onyń Shyǵys Túrkistandaǵy genoıdtik saıasatyna kóz jumyp qaraıdy degen qorqynyshy beker. Tipti demokratııalyq partııanyń múshesi retinde Djo Baıden qytaı kommýnısteriniń adamzatqa qarsy jasap jatqan genoıdtik saıasatyn burynǵydan da qatty synǵa alady.

Sonymen ádil saılaýda D. Tramp ne úshin jeńildi? Onyń birden-bir sebebin Amerıka halqynyń minezinen izdeý kerek. Amerıka halqy tek aq násildilerden ǵana turmaıdy, qara, sary tústiler el halqynyń jartysyn quraıdy. AQSh-ta ásirese meksıkalyqtar, ońtústik Amerıka qurlyǵynan kelgen sary tústiler kóp.

D. Tramp mineziniń tikeliginen halyqtyń osy bóliginiń narazylyǵyn týǵyzdy, mysaly ashyqtan ashyq sarylardy elge kirgizbeımin dep, Meksıkamen shekaraǵa qorǵan sala bastady. Onyń bıligi kezinde násilshildik saıasattyń óteýi retinde aq násildiler qara násildilerge artyqtaý bergen quqyqtar shektele bastady, bul zańdy áreket qara násildilerdiń ashý-yzasyn týǵyzdy.

Amerıka halqy 1775/1783 jyldardaǵy Táýelsizdik úshin kúrestiń nátıjesinde paıda bolǵan bostandyq súıgish jaýynger halyq. Keıin bul halyqqa kileń erkin oıly, tentek minezdi, aqyldy, bostandyq súıgish azamattar barlyq elden aǵylyp, Amerıka Qurama Shtattary halqy qalyptasqan. Tipti 19 ǵasyrdyń jartysyna deıin kári qurlyqtan da erkin oıly azamattar bul elge kelýin toqtatpaǵan. 1920 jyldary buǵan zańmen shekteý qoıylsa da, bul elge bostandyq súıgish ozyq oıly adamdar qonystanýyn toqtatpady. Mine, Amerıka halqy degenimiz kimder?!

Al D. Tramp óziniń tike minezimen, ıaǵnı avtorıtarlyq basqarý tásilimen osy bostandyq súıgish halyqtyń kóńiline kúmán saldy.

Amerıka halqy eshqashan, eshqandaı jaǵdaıda ózderine dıktator túgili, urdajyq adamnyń avtorıtarlyq basqarýyna jol bermeıdi! Mine D.Tramptyń jibergen qateligi, ol Amerıka halqymen óziniń bıznes mekemesi qyzmetkerlerin shatastyryp aldy. Batyr ańqaý, er kúdik degen osy!

Aınalaıyn qazaǵym! Biz de tarıhy san ǵasyrlarǵa ketken, bostandyq súıgish kók bóriniń urpaqtarymyz! Qazaq ulty Ózbek handyǵynan osy bostandyq súıgish minezine bola bólinip, jeke otaý qurǵan, keıin bostandyq súıgish arda qazaqpyz degen kóshpeli túrikter jan-jaqtan qosylyp Uly Qazaq Handyǵyn qurǵan! Árıne 200 jyldan astam ýaqyt Reseıdiń bodany bolý qazaqqa kóp qasiret alyp keldi, quldyq sanaly qazaqtar da paıda boldy. Biraq elý jylda el jańa, egemendik alǵanymyzǵa da 30 jyl toldy. Endi bizge de el tizginin óz qolymyzǵa alyp qazaqstandyqtarmen sanasatyn, halyqty óz menshigim dep emes, ózimniń qojaıynym dep qaraıtyn prezıdent, depýtattar, ákimder saılap alatyn kún týdy!

Osy Amerıka halqynyń saılaýy bizderge juǵysty bolsyn!

«Azamat júnjime, júrme bos.

Qol ustas birigip tize qos.»

Pikirler