قازاقستان سۋى از تابيعي كەزەڭگە كىردى. بۇل تۋرالى قر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ايتتى, دەپ حابارلايدى «ادىرنا» ۇلتتىق پورتالى «قازاقپاراتقا» سىلتەمە جاساپ.
«وزەن باسسەيندەرى بويىنشا جۇرگىزىلگەن تالداۋعا سايكەس قازاقستان سۋى از تابيعي كەزەڭگە كىردى جانە 2019 جىلى جالپى 83 شاقىرىم تەكشە مەترگە تەڭ بولدى. ايتا كەتەتىن جايت، سوڭعى جىلدارى بۇل كورسەتكىش 90-100 شاقىرىم تەكشە مەتر دەڭگەيىندە بولدى. وسىعان بايلانىستى، سۋارمالى جەرلەر بويىنشا جاعداي قيىندادى. اسىرەسە ەلدىڭ وڭتۇستىك وبلىستارىندا قاتتى سەزىلدى. ويتكەنى ەلدەگى سۋارمالى القاپتاردىڭ 90 پايىزى وسى جاقتاردا ورنالاسقان. ال رەسپۋبليكا بويىنشا قولدانىسقا الىناتىن سۋدىڭ 97 پايىزى وڭتۇستىك وڭىرگە تيەسىلى»، - دەدى ول سەنات توراعاسىنىڭ ورىنباسارى اسقار شاكىروۆتىڭ توراعالىعىمەن ءوتىپ جاتقان ۇكىمەت ساعاتىندا. ونىڭ دەرەگىنشە، ۆەگەتاتسيالىق كەزەڭنىڭ قورىتىندىسى بويىنشا الماتى وبلىسىندا وتكەن جىلدارمەن سالىستىرعاندا قار جامىلعىسى 35 پايىز از بولدى. جامبىل وبلىسىندا سۋلىلىق ورتاشا كوپ جىلدىق دەرەكتەردەن 15-20 پايىز تومەن تىركەلدى. «وسىنداي پروبلەمالارمەن ءبىز تۇركىستان جانە قىزىلوردا وبلىستارىندا تاپ بولدىق. الايدا، سۋ شارۋاشىلىعىنىڭ قولايسىز جاعدايىنا قاراماستان، مەملەكەت باسشىسى بۇل ماسەلەلەردى شەكارالاس ەلدەردەگى ارىپتەستەرىمەن كەزدەسۋ كەزىندە كوتەرگەندىكتەن، سۋ بەرۋ جوسپارى 90-100 پايىزعا ورىندالدى. سونىمەن قاتار، كوللەكتورلىق-درەناجدىق سۋلاردى قايتا پايدالانۋ پراكتيكاسى جۇرگىزىلدى»، - دەدى مينيستر.
فوتو اشىق دەرەككوزدەن الىندى
«ادىرنا» ۇلتتىق پورتالى
