مەملەكەت باسشىسى قورعانىس ءمينيسترى نۇرلان ەرمەكباەۆتى قابىلدادى، دەپ حابارلايدى "ادىرنا" ۇلتتىق پورتالى اقورداعا سىلتەمە جاساپ.
پرەزيدەنت – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆ قورعانىس ءمينيسترى نۇرلان ەرمەكباەۆتىڭ قازاقستان قارۋلى كۇشتەرىنىڭ نەگىزگى دامۋ باعىتتارى جونىندەگى بايانداماسىن تىڭدادى. بۇل رەتتە قازىرگى اسكەري قاقتىعىستاردىڭ تاجىريبەسى ءسوز بولدى.
كەزدەسۋ بارىسىندا قازاقستان ارمياسىنىڭ ينفراقۇرىلىمى مەن ماتەريالدىق-تەحنيكالىق بازاسىن جەتىلدىرۋدىڭ پەرسپەكتيۆالارى جانە اسكەردى ۇشقىشسىز باسقارىلاتىن ۇشۋ اپپاراتتارى مەن اۋە شابۋىلىنا قارسى قورعانىس قۇرالدارى سياقتى زاماناۋي قارۋ-جاراق تۇرلەرىمەن جابدىقتاۋ ماسەلەلەرى قاراستىرىلدى.
سونىمەن قاتار مەملەكەت باسشىسىنا حالىقارالىق اسكەري ىنتىماقتاستىق پەن بىتىمگەرشىلىك ءىس-قيمىلداردىڭ احۋالى تۋرالى اقپارات بەرىلدى.
قاسىم-جومارت توقاەۆقا اسكەري قىزمەتشىلەردىڭ تۇرمىستىق جانە الەۋمەتتىك جاعدايىن جاقسارتۋ، ولاردى ساپالى كيىم-كەشەكپەن قامتاماسىز ەتۋ جۇمىستارى جونىندە باياندالدى.
جوعارعى باس قولباسشى تالقىلانعان ماسەلەلەردىڭ وزەكتىلىگىن ەسكەرە وتىرىپ، قورعانىس مينيسترلىگىنىڭ اسكەري القا وتىرىسىن ۇيىمداستىرۋعا تاپسىرما بەردى. جيىندا 2020 جىلعى اسكەري دايىندىقتىڭ قورىتىندىلارى جاسالىپ، الداعى كەزەڭدە اتقارىلاتىن مىندەتتەر ايقىندالادى.
"ادىرنا" ۇلتتىق پورتالى
