بۇل جازبا قىتاي جىگىتىنىڭ قازاقستان مەن حالقى تۋرالى پىكىرى ەكەن. جازبانىڭ اۆتورى تانىمال ەكونوميست ايدار الىباەۆ. «مىنە، پەكيندە تۇراتىن قىتايلىق جاس جىگىتتىڭ، اقپاراتتارعا سونشالىقتى قانىق ەمەس جاس شەنەۋنىكتىڭ ايتىپ وتىرعانى وسى بولسا، وندا تەرەڭ ويلى تۇلعالارىنىڭ باسىندا نە ءپىسىپ جاتقانىن شامالاي بەرىڭىز. مەن وسى سوزدەردى ەستىگەندە قاتتى ەسەڭگىرەپ قالدىم. سول ساتتەگى جاي-كۇيىمدى سوزبەن جەتكىزۋ مۇمكىن ەمەس» دەيدى جازبا اۆتورى. وقىڭىز، ويلانىپ كورىڭىز. بۇل جازبا ناعىز شىندىقتىڭ دالەلى ەمەس پە؟
–سىزدەر ازعانتاي عانا حالىقسىزدار، بىراق الەمنىڭ باسقا ەشقانداي حالقىنىڭ تۇسىنە كىرمەگەن اۋقىمدى باي جەرگە يە بولىپ وتىرسىزدار. ال وسىنداي ۇلكەن تەرريتورياعا يەلىك ەتىپ وتىرعان از حالىق، ەشتەڭەگە بەيىمدەلمەگەنسىزدەر. سىزدەر بۇل جەردە جاقسى ءومىر قالىپتاستىرا المايسىزدار. بۇل جەردە سىزدەر مىقتى، ەكونوميكالىق تۇرعىدا تولىققاندى تاۋەلسىز كۇشتى مەملەكەت قۇرا المايسىزدار. كەڭەس وداعى كۇيرەپ، بولەك شىققاننان بەرى وزدەرىڭىزدى تىنىمسىز توناپ كەلە جاتىرسىزدار. ءبىز سىزدەردىڭ نە ىستەپ جاتقاندارىڭىزدى مۇقيات قاداعالاپ وتىرمىز. بىلەسىزدەر مە، جانۋارلار الەمىنىڭ وزىندە سىزدەردەگىدەي بولاشاق ۇرپاقتارىن نەسىبەسىن ۇرلاپ جاتقانداي، بالالارىنىڭ نەسىبەسىن تونامايدى.
سىزدەر مۇنداي جەرگە يەلىك ەتۋلەرىڭىزگە قۇقىقتارىڭىز جوق. سىزدەرگە مىندەتتى تۇردە سىرتتان باسقارۋ قاجەت. ايتپەسە، بۇل ادىلەتسىزدىك، سوندىقتان بۇلاي بولىپ جالعاسىپ كەتە بەرمەيدى. ءبىز سىزدەردە نە بولىپ جاتقانىن جاقسى بىلەمىز. سول سەبەپتەن ادەيى ۇلكەن كولەمدەردە نەسيە بەرىپ جاتىرمىز. ال سىزدەردىڭ ۇرى شەنەۋنىكتەرىڭىز بۇل قارجىنى تۇسكەن ساتتەن وڭەشتەرىنە توعىتۋدا. ونى كەيىن قالاي قايتاراتىنىن بىلمەيدى. نەسيەگە الىپ جاتقان قارجىمەن شىن مانىندە ەشتەڭە دە جاسالىپ جاتقان جوق. ال اقشا ۇرلانىپ جاتىر، سوعان وراي وزدەرىڭىزدى قاقپانعا تۇسىرۋدەسىزدەر. ال كەزى كەلگەندە ونى قايتارۋدى تالاپ ەتەمىز. سونىمەن قاتار، كوررۋپتسياعا بەلشەسىنەن باتقان شەنەۋنىكتەرىڭىزدى پايدالانىپ، ءتورتىنشى، بەسىنشى ادام ارقىلى بولسا دا سىزدەردەگى ساتىلاتىن دۇنيەنىڭ ءبارىن ساتىپ الۋدامىز. كاسىپورىندى، جەردى، كەنىشتەردى. ويتكەنى ولار ءبارىن ساتىپ جاتىر. ولار ءبىز نازار سالعان نارسەنىڭ ءبارىن، ءتۇرلى سحەمالار بويىنشا، سىزدەردىڭ ەلدەرىڭىزگە ءتيىمسىز، ادىلەتتى ەمەس كەلىسىم-شارتتار بويىنشا ساتىپ جاتىر.
مەنىڭ تاڭ قالاتىنىم، نەمەنە ءسىزدىڭ ەلدە زاڭدار جۇمىس ىستەمەي مە، بولماسا قۇقىق قورعاۋ ورگاندارى جوق پا، وزدەرىڭىزدە قانداي تۇڭعيىققا باتىپ بارا جاتقاندارىڭىزدى اڭعاراتىن اقىل-وي جوق پا؟!
بىراق مۇنداي كۇيگە تۇسكەن جالعىز ەل سىزدەر ەمەسسىزدەر. وسىعان ۇقساس جاعدايلار ورتا ازيا مەملەكەتتەرىنىڭ بارىندە بولىپ جاتىر. رەسەيدە دە. ءبارىن دە قىتاي جالعا الىپ جاتىر، بەلگىلى ءبىر ۋاقىتقا عانا كەلىپ جاتىر دەگەن اڭعال ويعا بەرىلگەن. ولار قىزىل ايداھاردىڭ ءبىر نارسەنى العاننان كەيىن ونى قايتارۋ ءۇردىسى جوق ەكەنىنەن مۇلدە حابارسىز.
ال ءبىر ۋاقىتتا ءبىز بارلىق قارىزدى ءبىر مەزەتتە تولىعىمەن قايتارۋ تۋرالى تالاپ قويامىز. سول كەزدە سىزدەردىڭ ونداي مۇمكىندىكتەرىڭىز بولمايدى. سول ۋاقىتتا ءبىزدىڭ ەكونوميكالىق مۇددەمىزدى قورعاۋ ءۇشىن ءتۇرلى شارالارعا بارۋىمىز مۇمكىن. ال سىزدەردە ارميا دەگەننىڭ اتى بولعانىمەن زاتى جوق ەكەنىن جاقسى بىلەمىز. ونىڭ كۇشى ءوز حالقىڭدى تەجەۋگە عانا جەتەدى.
«ادىرنا» ۇلتتىق پورتالى.
فوتو اشىق دەرەككوزدەن الىندى.
