نۇرسۇلتان نازارباەۆ «Nur Otan» پارتياسى ساياسي كەڭەسىنىڭ بيۋروسىن 2020 جىلعى 24 قاراشادا شاقىرۋ تۋرالى قاۋلىعا قول قويدى. ال اقيقاتى، بيلىك ءۇشىن جانە ەلىمىزدەگى جەتەكشى پارتيا ءۇشىن سايلاۋعا دايىندىق شاراسى پرايمەريز كەزەڭىنەن-اق باستالىپ كەتكەن. ال باسقا پارتيالار ءۇشىن شە؟ ولار ەندى تىپىرلاپ جاتىر.
پارلامەنتتىك سايلاۋدىڭ جاقىنداپ كەلە جاتقانىن بىلگەنىمەن، ولار ءبارىبىر «Nur Otan» پارتياسىنىڭ الدىنا تۇسە المايدى. ۇيرەنشىكتى جانە قالىپتى نارسە. «Nur Otan» پارتياسىنىڭ سەزىنەن كەيىن عانا بارىپ ولار ءوز قۇرىلتايىنا دايىندىق شاراسىنا كىرىسەدى. بيىل دا سولاي بولايىن دەپ تۇر.
ازىرگە بەس پارتيا پارلامەنتتىك سايلاۋعا قاتىساتىنىن ءمالىم ەتتى. تەك جسدپ عانا ءۇنسىز. پارلامەنتتىك سايلاۋعا بايلانىستى توقاەۆتىڭ جارلىعىنان كەيىن 2 اپتا ۋاقىت ءوتتى. جارماحان تۇياقباي كەتكەننەن كەيىن، ەرمۇرات باپيدى توراعالىقتان ىسىرعاننان كەيىن جسدپ نە ىستەرىن بىلمەي جاتقان بولار. بىردەن ءبىر ەلدەگى وپپوزيتسيالىق پارتيا سانالاتىن ۇيىمنىڭ بۇلاي ءۇنسىز جاتقانى ويلانتادى. بىراق سايلاۋعا قاتىساتىن حالىقتىڭ الدىندا كۇردەلى ساۋال تۇر: قاي پارتياعا داۋىس بەرەمىز؟ جاڭادان ساياسي پارتيا تىركەلگەن جوق. بيلىك حاق، جاسىلدار پارتياسى مەن دەمپارتيانى تىركەۋدى قاجەت دەپ تاپپادى. ەگەر وسىلاردان ءبىرى تىركەۋدەن وتكەندە، حالىق «تەك «Nur Otan» پارتياسىنا ەمەس» دەگەن ۇعىممەن جوعارىداعىلاردىڭ بىرىنە داۋىس بەرىپ كەتەتىن ەدى. ەندى امالدىڭ جوعىنان سايلاۋعا داۋىس بەرۋگە ەسكى، بۇيرەگى بيلىككە بۇراتىن پارتيالارمەن بارامىز. بارساق تا، قاي پارتياعا داۋىس بەرەمىز؟ كۇردەلى سۇراق. «اۋىل»، «بىرلىك» «اقجول»، كوممۋنيستەر، جسدپ جانە «Nur Otan» پارتياسى. التى پارتيانىڭ ىشىندەگى ەڭ سوڭعىسى مىندەتتى تۇردە جەڭەدى. بىراق ەڭ وكىنىشتىسى، اقوردا حالىقتىڭ باسىن ادەيى قاتىرىپ قويدى. نە ىستەمەك كەرەك؟ بازبىرەۋلەر «سايلاۋعا بايكوت جاريالايمىز» دەپ بايبالام سالىپ جاتىر. ال بايكوت جاريالادىق، ودان شىعار پايدا بار ما؟ بارماي قالساڭ، داۋىسىڭدى بيلىك ءوز مۇددەسىنە پايدالانادى. ۇتىلماۋ ءۇشىن نە ىستەۋ كەرەك؟ مۇنداي جاعدايدا تىعىرىقتان شىعارار سايلاۋدىڭ ساياسي فورمۋلاسى بار ما؟
ال سايلاۋ جاقىن، ءدۇبىرى دە ەستىلە باستادى. ال حالىقتىڭ باسى قاتتى. بايكوت پا، جوق الدە باقىلاۋشىلاردىڭ بەلسەندىلىگىن ارتتىرۋىمىز كەرەك پە؟ ال بۇكىل حالىق تىركەلىپ، سايلاۋعا باقىلاۋشى بولا المايدى عوي. جانبولات ماماي «10 قاڭتار كۇنى سايلاۋعا ەمەس – الاڭعا» دەپ وتىر. اقيقاتى، تەلەجۋرناليست ماقسات تولىقباي ايپاقشى، «سايلاۋ بار، تاڭداۋ جوق». الدىن الا جەڭىستى ەرىكسىز مويىنداپ قويعانىمىز ەمەس، كور دە تۇر، ءبارىبىر بيلىك پارتياسى باسىم داۋىس الادى. بيلىك جەتەكشى پارتيانى ءسوزسىز جەڭىسكە جەتكىزەدى.
... «Nur Otan» سەنى قايتەيىن؟!
ەركىن قالدان،
«ادىرنا» ۇلتتىق پورتالى
