Nursultan Nazarbaev «Nur Otan» partııasy Saıası keńesiniń bıýrosyn 2020 jylǵy 24 qarashada shaqyrý týraly qaýlyǵa qol qoıdy. Al aqıqaty, bılik úshin jáne elimizdegi jetekshi partııa úshin saılaýǵa daıyndyq sharasy praımerız kezeńinen-aq bastalyp ketken. Al basqa partııalar úshin she? Olar endi typyrlap jatyr.
Parlamenttik saılaýdyń jaqyndap kele jatqanyn bilgenimen, olar báribir «Nur Otan» partııasynyń aldyna túse almaıdy. Úırenshikti jáne qalypty nárse. «Nur Otan» partııasynyń sezinen keıin ǵana baryp olar óz quryltaıyna daıyndyq sharasyna kirisedi. Bıyl da solaı bolaıyn dep tur.
Ázirge bes partııa parlamenttik saılaýǵa qatysatynyn málim etti. Tek JSDP ǵana únsiz. Parlamenttik saılaýǵa baılanysty Toqaevtyń jarlyǵynan keıin 2 apta ýaqyt ótti. Jarmahan Tuıaqbaı ketkennen keıin, Ermurat Bapıdy tóraǵalyqtan ysyrǵannan keıin JSDP ne isterin bilmeı jatqan bolar. Birden bir eldegi oppozıııalyq partııa sanalatyn uıymnyń bulaı únsiz jatqany oılantady. Biraq saılaýǵa qatysatyn halyqtyń aldynda kúrdeli saýal tur: Qaı partııaǵa daýys beremiz? Jańadan saıası partııa tirkelgen joq. Bılik HAQ, Jasyldar partııasy men Dempartııany tirkeýdi qajet dep tappady. Eger osylardan biri tirkeýden ótkende, halyq «tek «Nur Otan» partııasyna emes» degen uǵymmen joǵarydaǵylardyń birine daýys berip ketetin edi. Endi amaldyń joǵynan saılaýǵa daýys berýge eski, búıregi bılikke buratyn partııalarmen baramyz. Barsaq ta, qaı partııaǵa daýys beremiz? Kúrdeli suraq. «Aýyl», «Birlik» «Aqjol», Kommýnıster, JSDP jáne «Nur Otan» partııasy. Alty partııanyń ishindegi eń sońǵysy mindetti túrde jeńedi. Biraq eń ókinishtisi, Aqorda halyqtyń basyn ádeıi qatyryp qoıdy. Ne istemek kerek? Bazbireýler «saılaýǵa baıkot jarııalaımyz» dep baıbalam salyp jatyr. Al baıkot jarııaladyq, odan shyǵar paıda bar ma? Barmaı qalsań, daýysyńdy bılik óz múddesine paıdalanady. Utylmaý úshin ne isteý kerek? Mundaı jaǵdaıda tyǵyryqtan shyǵarar saılaýdyń saıası formýlasy bar ma?
Al saılaý jaqyn, dúbiri de estile bastady. Al halyqtyń basy qatty. Baıkot pa, joq álde baqylaýshylardyń belsendiligin arttyrýymyz kerek pe? Al búkil halyq tirkelip, saılaýǵa baqylaýshy bola almaıdy ǵoı. Janbolat Mamaı «10 qańtar kúni saılaýǵa emes – alańǵa» dep otyr. Aqıqaty, telejýrnalıst Maqsat Tolyqbaı aıpaqshy, «saılaý bar, tańdaý joq». Aldyn ala jeńisti eriksiz moıyndap qoıǵanymyz emes, kór de tur, báribir bılik partııasy basym daýys alady. Bılik jetekshi partııany sózsiz jeńiske jetkizedi.
... «Nur Otan» seni qaıteıin?!
Erkin Qaldan,
«Adyrna» ulttyq portaly
