اكىمشىلىك قۇقىق جانە اكىمشىلىك پروتسەسس بويىنشا تمد كەڭىستىگىندە تانىمال حالىقارالىق ساراپشىلاردىڭ ءبىرى، م.س. نارىكباەۆ اتىنداعى كازگيۋ ۋنيۆەرسيتەتىنىڭ پروفەسسورى رومان مەلنيك فەيسبۋكتەگى پاراقشاسىندا ينبريدينگ تۋرالى جازدى دەپ حابارلايدى "ادىرنا" ۇلتتىق پورتالى. ينبريدينگ دەگەنىمىز ستۋدەنت، ماگيسترانت، دوكتورانتتىڭ ءوزى وقىعان ۋنيۆەرسيتەتىندە وقىتۋشى بولىپ قىزمەت ەتۋى. يبريدينگ، ەڭ الدىمەن، ۋنيۆەرسيتەتتىڭ جۇمىسىنا، دامۋىنا كەدەرگى جاسايدى، جاڭا عىلىمي يدەيا مەن كرەاتيۆتى كوزقاراستىڭ جويىلۋىنا الىپ كەلەدى، — دەيدى رومان مەلنيك جازباسىندا. https://www.facebook.com/roman.melnyk.948
ينبريدينگ ۇعىمى كوپتەگەن ەلدەردىڭ اكادەميالىق جۇيەسىندە ءجيى كەزدەسەدى. پروفەسسور مەلنيكتىڭ ايتۋىنشا، كەشەگى تۇلەك وزىنە ساباق بەرگەن پروفەسسورلار مەن دوتسەنتتەرگە تاۋەلدى. جاس عالىم تالىمگەرلەرىنىڭ عىلىمي كوزقاراستارىنا كۇمان كەلتىرمەيدى، سىن دا ايتا المايدى. ناتيجەسىندە عىلىمي زەرتتەۋلەردىڭ ساپاسى تومەندەيدى.
«ءوز تۇلەكتەرىن وقىتۋشىلىق قىزمەتكە قابىلداۋ ساياساتى — اكادەميالىق ينبريدينگ، پوستكەڭەستىك كەڭىستىكتەگى ەلدەردە كەڭ تاراعان. ولاردىڭ ويىنشا، ءوزىمىزدىڭ تۇلەك «سىرتتان كەلگەندەرگە» قاراعاندا سەنىمدى، وقۋ ورنىنىڭ ىشكى جۇيەسىن، تاريحىن، ءداستۇرىن بىلەدى. بۇل پىكىر — تازا ۋتوپيا» ،- دەيدى رومان مەلنيك.
پروفەسسور جازباسىندا ستەنفوردتىڭ پروفەسسورلىق قۇرامى بويىنشا مىسال كەلتىرىپتى. ستەنفوردتا 42 نوبەل سىيلىعى لاۋرەاتى جۇمىس ىستەيدى، ونىڭ تەك 5-ەۋى ءوز تۇلەگى ەكەن.
«ۋنيۆەرسيتەت نارىقتاعى ۇزدىك كادرلار ءۇشىن كۇرەسىپ، ولاردى ىزدەپ تاۋىپ، جۇمىسقا شاقىرىپ، شىعارماشىلىعىنا قولايلى جاعداي جاساۋى كەرەك. سوندا ۋنيۆەرسيتەتتىڭ بويىنا «جاڭا» قان جۇگىرەدى. الەمدىك دەڭگەيدەگى ۋنيۆەرسيتەتتەر ينبريدينگكە قارسى ساياسات ۇستانادى. سول وقۋ ورنىندا عىلىمي دارەجە العان ادامداردى ۋنيۆەرسيتەتكە جۇمىسقا قابىلداۋعا زاڭمەن تىيىم سالىنعان» ،- دەيدى م.س. نارىكباەۆ اتىنداعى كازگيۋ ۋنيۆەرسيتەتىنىڭ پروفەسسورى رومان مەلنيك.
