يزرايل مۇعالىمدەرى قاشىقتان وقىتۋ جۇيەسىنىڭ ناتيجە بەرمەيتىنىن جەتكىزدى، دەپ حابارلايدى «ادىرنا» ۇلتتىق پورتالى vesty.co.il-گە سىلتەمە جاساپ.
سوڭعى ەكى جىلدا وقىتۋشىلاردىڭ جارتىسى عانا قاشىقتان وقىتۋ بويىنشا كاسىبي دايىندىقتان وتكەن. مۇنداي مالىمەتتەردى KAN تەلەكورپوراتسياسىنىڭ جاڭالىقتار قىزمەتى جاريالادى.
تەلەارنانىڭ ايتۋىنشا، مۇعالىمدەردىڭ كوپشىلىگى جازعى دەمالىستا دايىندىق كۋرستارىنا بارۋعا قىزىعۋشىلىق تانىتقان. دەسە دە، ولار وزدەرىنە قولايلى كۋرستاردى تابا الماعان.
Zoom ارقىلى وقىعان بالا ساپالى ءبىلىم الا المايدى
پەداگوگتار Zoom ارقىلى مەكتەپ باعدارلاماسىن تۇسىندىرۋگە تولىق مۇمكىندىكتىڭ جوق ەكەنىن جەتكىزدى. «ۇلگەرىمى تومەن وقۋشىلارعا قوسىمشا ساباقتار وتكىزۋ ءتىپتى مۇمكىن ەمەس»،-دەدى ولار.
الايدا مۇعالىمدەر كاسىپوداعىنىڭ ءتورايىمى يافا بەن-دەۆيد وقىتۋشىلاردىڭ ءبىلىم مينيسترلىگى بەكىتكەن بارلىق شەشىمدەرىنە باعىناتىندىعىن اتاپ ءوتتى. سونىمەن قاتار،ول كاسىپوداقتىڭ دا وقىتۋ باعدارلاماسىنا ءوز جوسپارىن ۇسىنعانىن حابارلادى.
وعان سايكەس 1-2 سىنىپ وقۋشىلارى اپتاسىنا 5 كۇن، ال 3-4 سىنىپ وقۋشىلارى اپتاسىنا 3 كۇن عانا شاعىن توپتاردا وقيتىن بولادى.
«ءبىلىم بەرۋ جۇيەسىن جەكەشەلەندىرۋگە جول بەرمەۋ كەرەك»، - دەيدى توراعا.
وقۋشىلار تاپسىرمانى دۇرىس ورىندامايدى
تالىمگەرلەر وقۋشىلاردىڭ قاشىقتان الاتىن تاپسىرمالارى مۇقيات ورىندالمايدى دەپ سانايدى، ال وقىتۋشىلاردىڭ پروتسەستى تەكسەرۋ مەن باقىلاۋعا مۇمكىندىگى جوق. ولاردىڭ ايتۋىنشا، ورىندالعان تاپسىرمالار مەكتەپ وقۋشىلارىنىڭ ءبىلىمى مەن داعدىلارىنىڭ شىنايى كورىنىسىن كورسەتپەيدى.
2020 جىلدىڭ شىلدە-تامىز ايلارىندا وقىتۋشىلارعا ءبىلىم بەرۋ جۇيەسىنە بايلانىستى ساۋالناما جۇرگىزىلگەن. ناتيجەسىندە رەسپوندەنتتەردىڭ كوپشىلىگى قاشىقتان وقىتۋ كەزىندە بارلىق وقۋشىلاردا قاجەتتى وقۋ قۇرالدارىنىڭ بولماعانىن جەتكىزدى. مىسالى، قۇلاققاپتار، بەينەكامەرالار مەن پرينتەرلەر. كەيبىر اتا-انالار بۇل قۇرالداردى الۋعا مۇمكىندىكتەرىنىڭ جوق ەكەنىن ايتقان.
ايتا كەتەيىك، قازىرگى تاڭدا ەلدە 1-4 سىنىپتاردى قاراشا ايىنان باستاپ ءداستۇرلى وقىتۋ فورماتىنا كوشىرۋ ماسەلەسى قاراستىرىلۋدا.
«ادىرنا» ۇلتتىق پورتالى
