الماتىدا قۇلاعى ناشار ەستيتىن ءارى مىلقاۋ ەر ادام ەتىك جوندەۋ شەبەرحاناسىندا ەسىرتكى ساقتاعان، دەپ حابارلايدى «ادىرنا» ۇلتتىق پورتالى قازاقپارات-قا سىلتەمە جاساپ.
بۇل تۋرالى جەرگىلىكتى تۇرعىندار «وربيتا» شاعىناۋدانىنىڭ ۋچاسكەلىك ينسپەكتورلارىنا شاعىمدانعان. بوستاندىق اۋدانىنىڭ اۋماعىندا «قۇقىقتىق ءتارتىپ» جەدەل-الدىن الۋ ءىس-شاراسىن وتكىزۋ كەزىندە ۋچاسكەلىك پوليتسيا ينسپەكتورلارى پوليتسيا كومەكشىلەرىمەن بىرگە ەتىكشىنى ءىرى كولەمدەگى ەسىرتكىمەن ۇستادى. ەسىرتكى زاتى – گاشيش ونىڭ جۇمىس ورنىنان، اياق كيىمنەن تابىلدى. ۇستالعان ادام ساڭىراۋ ءارى مىلقاۋ. سوندىقتان ۇستاۋ كەزىندە ول پوليتسيا قىزمەتكەرلەرىنە ەسىرتكىنى قايدان العانىن جانە ونى قانداي ماقساتتا وزىمەن بىرگە ساقتاعانىن تۇسىندىرە المادى. «قازىرگى ۋاقىتتا سوتقا دەيىنگى تەرگەۋ قر قك-ءنىڭ 296-بابى 4-بولىگى (ەسىرتكى، پسيحوتروپتىق زاتتاردى، ولاردىڭ انالوگتارىن اسا ءىرى كولەمدە ساتۋ ماقساتىنسىز زاڭسىز دايىنداۋ، وڭدەۋ، الۋ، ساقتاۋ، تاسىمالداۋ) بويىنشا باستالدى»، – دەدى بوستاندىق اۋداندىق پوليتسيا باسقارماسى باستىعىنىڭ ورىنباسارى ەدىلحان بايعاراەۆ.
فوتو اشىق دەرەككوزدەن الىندى
«ادىرنا» ۇلتتىق پورتالى
