شاۋ تارتىپ قالىپسىڭ اۋ قايران شابىت…
شىركىن، ءسوز… ۇرىمشىدەن نە حانشاتىردان ساتىپ الار ءبوز ەمەسسىڭ عوي سەن…جەتى تۇندە جۇلمالاپ جاستىقتان تۇرعىزار، جالت -جۇلت ەتكەن دۇنيەنىڭ، ۋاقىتتىڭ بەدەرىن اينىتپاي جادىلاپ قالار جالعىز قۋات ءوزىڭ ەكەنسىڭ اۋ… مەن سەنى ايالاي الدىم با؟ قىر بالاسىنىڭ اسقارعا قول سوزاتىنىنداي مەنىڭ اۋىلىمدا تاۋ جوق ەدى. قاراۋىلداپ الىسقا كوز تاستار ءبىر بيىكتەۋ توبەنى «ابايدىڭ ءدوڭى» دەيتىن. بالالىق قوي، ۇعىپ جۇرگەنىم قازىر عانا. تاۋەلسىزدىكتەن كەيىن ەمىس ەس جيناعان ەل-جۇرت بار بيىگىن ابايمەن ولشەپتى. مۇرسەيىت قولجازباسى ءبىزدىڭ ولكەگە جەتپەسە دە ابايدىڭ بيىك تانىمىن رۋحسىزدانۋ تۋننەلىنەن وسىلايشا الىپ ءوتىپتى مەنىڭ وسكەن جەرىم…
ءسىزدى ارنايى ىزدەپ كەلگەن تىلشىلەرگە سۇحبات بەرىپ وتىرىپ: اباي ەلى – قازاق ءتىلىنىڭ ايناسى دەدىڭىز. ءيا، اعا، اۋەزوۆتىڭ ءوزى ايتادى عوي مەنىڭ تىلىمدە اباي ءتىلىنىڭ مايەگى بار دەپ. ءسىزدىڭ تىلىڭىزدە دە سول شىعىستىڭ ءىنجۋ-مارجانى بار. ايتپەگەن كۇندە «داريعا داۋرەندەگى»
اققۋ-قاز اۋەلەيدى قالىقتاعان،
قايتەيىن قاناتىم جوق قالىپ بارام.
جۇرەگىم قۇس بوپ ۇشىپ كەتتى-اۋ بىرگە،
جىلاتىپ جالعىز قالاي الىپ قالام؟ دەگەن جولدار وسىلاي توگىلە قالار ما ەدى. ءوزىڭىز جاقسى كورەتىن قاسىم «داريعا سول قىز» دەسە اراعا ۋاقىت سالىپ اققۋدىڭ قاناتىنا «داريعا داۋرەندى» ىلەستىردىڭىز.
«جۇرتىڭدا ءار عاسىردىڭ ولجاڭ قالعان. جاميعات، ءبىزدىڭ تاريح - التىن شىنجىر،. ءار جەردەن ءجيى ءۇزىلىپ، كوپ جالعانعان.» وسى جەردە ءسىزدىڭ پوەمالارىڭىز كومەككە كەلەدى. كوركەمدىك شىندىقتىڭ عۇمىرى الدەقايدا ۇزاق بولاتىنى سياقتى ءسىز جازعان «تۋ»، «بايتەرەك»، «كوكالا ۇيرەك» ءبارى-ءبارى سول ميسسيانىڭ ۇدەسىنەن شىعادى. ءار پوەمانىڭ وزىندىك جۇگى بار. جەكەلەي زەرتتەۋ جۇمىستارىنا سۇرانىپ تۇرعانى شىندىق.
بيىل 70 جاسقا تولعان مەرەيتويىڭىز قۇتتى بولسىن. ەلدەگى جاعدايعا بايلانىستى كەلەر جىلى تويلاناتىن ماڭىزدى داتا ىندەتتەن ەسەن- ساۋ شىققان قالىڭ قازاعىڭىزدىڭ باسىن قوسىپ، قىرداعى مەن ويداعىنى جاراستىراتىن، ىمىراشىلدىقتىڭ، بىرلىك پەن تاتۋلىقتىڭ، ىنتىماق پەن باتۋاشىلىقتىڭ تويى بولاتىنىنا سەنەمىن. ءبىز سول كۇندى اسىعا كۇتەمىز.
كەيىنگى ولەڭدەرىڭىزدىڭ بىرىندە:
ءبىر-ءبىرىڭدى حان-تورەدەي كۇتىڭدەر،
تۋىسىڭا تاپساڭ قۇستىڭ ءسۇتىن بەر!
مەيىرىم عانا جەتكىزەدى مۇراتقا،
قايىرىم عانا قابىرعاڭدى بۇتىندەر!-دەپ جازاسىز. ال مەن ادامگەرشىلىك دەگەنىمىز – ەرنەۋىنە دەيىن ءسۇت تولى شارانى ەسىلدىڭ ارعى بەتىنەن بەرگى بەتىنە كۇنىنە بىرنەشە مارتە ەش توكپەي الىپ ءوتۋ ەكەنىن ءبىلدىم بە؟ اقتى توكپە دەمەۋشى مە ەدى بۇل حالىق؟ بىلمەيمىن، اعا، جۇمباق تاعدىردىڭ جولى كەيدە تىم قيىن...
اياۋلىم شايماردانوۆا،
“ادىرنا” ۇلتتىق پورتالى
