Shaý tartyp qalypsyń aý qaıran shabyt…
Shirkin, sóz… Úrimshiden ne Hanshatyrdan satyp alar bóz emessiń ǵoı sen…Jeti túnde julmalap jastyqtan turǵyzar, jalt -jult etken dúnıeniń, ýaqyttyń bederin aınytpaı jadylap qalar jalǵyz qýat óziń ekensiń aý… men seni aıalaı aldym ba? Qyr balasynyń asqarǵa qol sozatynyndaı meniń aýylymda taý joq edi. Qaraýyldap alysqa kóz tastar bir bıikteý tóbeni «Abaıdyń dóńi» deıtin. Balalyq qoı, uǵyp júrgenim qazir ǵana. Táýelsizdikten keıin emis es jınaǵan el-jurt bar bıigin Abaımen ólshepti. Múrseıit qoljazbasy bizdiń ólkege jetpese de Abaıdyń bıik tanymyn rýhsyzdaný týnnelinen osylaısha alyp ótipti meniń ósken jerim…
Sizdi arnaıy izdep kelgen tilshilerge suhbat berip otyryp: Abaı eli – qazaq tiliniń aınasy dedińiz. Iá, aǵa, Áýezovtiń ózi aıtady ǵoı meniń tilimde Abaı tiliniń máıegi bar dep. Sizdiń tilińizde de sol Shyǵystyń injý-marjany bar. Áıtpegen kúnde «Darıǵa dáýrendegi»
Aqqý-qaz áýeleıdi qalyqtaǵan,
Qaıteıin qanatym joq qalyp baram.
Júregim qus bop ushyp ketti-aý birge,
Jylatyp jalǵyz qalaı alyp qalam? degen joldar osylaı tógile qalar ma edi. Ózińiz jaqsy kóretin Qasym «Darıǵa sol qyz» dese araǵa ýaqyt salyp aqqýdyń qanatyna «Darıǵa dáýrendi» ilestirdińiz.
«Jurtyńda ár ǵasyrdyń oljań qalǵan. Jámıǵat, bizdiń tarıh - altyn shynjyr,. Ár jerden jıi úzilip, kóp jalǵanǵan.» Osy jerde sizdiń poemalaryńyz kómekke keledi. Kórkemdik shyndyqtyń ǵumyry áldeqaıda uzaq bolatyny sııaqty siz jazǵan «Tý», «Báıterek», «Kókala úırek» bári-bári sol mıssııanyń údesinen shyǵady. Ár poemanyń ózindik júgi bar. Jekeleı zertteý jumystaryna suranyp turǵany shyndyq.
Bıyl 70 jasqa tolǵan mereıtoıyńyz qutty bolsyn. Eldegi jaǵdaıǵa baılanysty keler jyly toılanatyn mańyzdy data indetten esen- saý shyqqan qalyń qazaǵyńyzdyń basyn qosyp, qyrdaǵy men oıdaǵyny jarastyratyn, ymyrashyldyqtyń, birlik pen tatýlyqtyń, yntymaq pen bátýashylyqtyń toıy bolatynyna senemin. Biz sol kúndi asyǵa kútemiz.
Keıingi óleńderińizdiń birinde:
Bir-birińdi han-tóredeı kútińder,
Týysyńa tapsań qustyń sútin ber!
Meıirim ǵana jetkizedi muratqa,
Qaıyrym ǵana qabyrǵańdy bútinder!-dep jazasyz. Al men adamgershilik degenimiz – erneýine deıin sút toly sharany Esildiń arǵy betinen bergi betine kúnine birneshe márte esh tókpeı alyp ótý ekenin bildim be? Aqty tókpe demeýshi me edi bul halyq? Bilmeımin, aǵa, jumbaq taǵdyrdyń joly keıde tym qıyn...
Aıaýlym ShAIMARDANOVA,
“Adyrna” ulttyq portaly
