كەشە، 27.10.2020 جىلى قازاقستاننىڭ حالىق ءارتىسى، قازاقستاننىڭ مەملەكەتتىك سىيلىعىنىڭ لاۋرەاتى، پاراسات، قۇرمەت وردەندەرىنىڭ يەگەرى نۇرعالي ءنۇسىپجانوۆتىڭ 82 جاسىندا اكە اتانعانى جايلى اقپارات الەۋمەتتىك جەلىلەر مەن باق ارقىلى تاراعان ەدى. وسى اقپارات بويىنشا Almaty تەلەارناسىنىڭ باسشىسى نۇرجان جالاۋقىزى ارنايى تۇسىنىك بەردى، - دەپ حابارلايدى «ادىرنا» ۇلتتىق پورتالى.
مۇنداي قاۋەسەتتىڭ تارالۋىنا تۇرتكى بولعان Almaty تەلەارناسىنىڭ Paparazzi باعدارلاماسى. وسىعان وراي Almaty تەلەارناسىنىڭ باسشىسى نۇرجان جالاۋقىزى Facebook پاراقشاسىندا حالىقتان جانە ايتۋلى ونەر تۇلعاسىنان كەشىرىم سۇرادى.
نۇرجان جالاۋقىزى: «قۇرمەتتى فب وقىرماندارى!
كەشەدەن بەرى قازاق ەلىنىڭ ءبىرتۋار ازاماتى نۇرعالي ءنۇسىپجانوۆ اعامىز تۋرالى تاراپ جاتقان اقپاراتتىڭ شىندىققا جاناسپايتىنىن ايتقىم كەلەدى. ەڭ الدىمەن Almaty تەلەارناسىنىڭ باسشىسى رەتىندە نۇرعالي اعادان كەشىرىم سۇرايمىن! ءسىزدىڭ جۇرەگىڭىزگە ابايسىزدا تۇسكەن وسىناۋ قاياۋ مەنىڭ ارىپتەستەرىم ءۇشىن ۇلكەن ساباق بولارى ءسوزسىز.
سونداي-اق، تەلەارنامىزدىڭ تاپسىرىسىمەن دايىندالاتىن Paparazzi باعدارلاماسىنىڭ تىلشىسىمەن كورەرمەندەرگە جالعان اقپارات تاراتقانى ءۇشىن بۇدان بىلاي جۇمىس ىستەمەيتىندىگىمىزدى xابارلايمىن.
تەلەارنامىزدىڭ ۇستانىمى - قازاق ەلىنىڭ كەشەگىسى مەن بۇگىنى ءۇشىن ايانباي ەڭبەك ەتكەن ءار سالاداعى اياۋلى ۇل-قىزدارىنا ءاردايىم قۇرمەتپەن قاراۋ بولىپ قالا بەرەدى»، - دەيدى جازباسىندا.
فوتو اشىق دەرەككوزدەن الىندى
«ادىرنا» ۇلتتىق پورتالى
