باستى بەت
اقتوبە
اقتوبەدە اباي قۇنانبايۇلىنىڭ ەسكەرتكىشى اشىلدى

اقتوبەدە اباي قۇنانبايۇلىنىڭ ەسكەرتكىشى اشىلدى

27.10.2020

1996

سەيسەنبى، 27 قازان كۇنى اقتوبە وبلىسىنىڭ اكىمى وڭداسىن ءورازاليننىڭ قاتىسۋىمەن اقتوبە قالاسىندا ۇلى ويشىل، قازاقتىڭ باس اقىنى اباي قۇنانبايۇلىنىڭ ەسكەرتكىشى اشىلدى.
اتالعان شاراعا ەلىمىزگە تانىمال اقىن-جازۋشىلار، قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت، اقىن اقۇشتاپ باقتىگەرەەۆا، شقو اباي اۋدانىنىڭ اكىمى جارقىنبەك بايسابىروۆ جانە وبلىس تۇرعىندارى مەن زيالى قاۋىم وكىلدەرى قاتىستى.
ايشىقتى شارادا قۇتتىقتاۋ ءسوز سويلەگەن وبلىس باسشىسى و.ورازالين ۇلى اقىننىڭ حالقىمىزدىڭ ومىرىنەن الار ايشىقتى ورنىن اتاپ ءوتىپ، قۇرمەتتى قوناقتارعا العىسىن ءبىلدىردى.
«بيىل ەلىمىزدە ۇلى اقىن اباي قۇنانبايۇلىنىڭ تۋعانىنا 175 جىل مەرەيتويىنا بايلانىستى كوپتەگەن ءىس-شارالار جوسپارلانعان بولاتىن. الايدا، əلەمدە ورىن الىپ جاتقان ەپيدەميولوگيالىق احۋال ەلىمىزگە كەرى əسەرىن تيگىزىپ جوسپارلانعان شارالار كەيىنگە شەگەرىلدى. دەگەنمەن، ءبىز ۇلى اقىنعا ارنالعان ءتۇرلى شارالاردى جاڭا فورماتتا وتكىزىپ كەلەمىز. مىنە، بۇگىن سۇيىكتى مەكەن اقتوبەمىزدىڭ ءدال ورتاسىنان ايشىقتى ورىننان ۇلى اقىننىڭ قۇرمەتىنە ەسكەرتكىش اشىلعالى وتىر. ابايدىڭ ولەڭدەرى مەن قارا سوزدەرىندە ۇلت بولمىسى، ءبىتىمى، تۇرمىسى، تىرشىلىگى، دۇنيەتانىمى، رۋحى كورىنىس تاۋىپ كەلەدى. بيىلعى مەرەيتوي ەلگە وي سالاتىن، تاعىلىمى مول ناقتى شارالارمەن جالعاسۋدا. الەمگە تانىمال باس اقىنىمىزدىڭ ەڭبەگىن حالىق بولىپ ۇلىقتاۋ مەملەكەتىمىزدىڭ مەرەيىن ارتتىرادى. ۇلى ويشىلدىڭ اسىل مۇراسىن ارداقتاۋ جانە جان-جاقتى دارىپتەۋ – بارشامىزدىڭ مىندەتىمىز. ول ءۇشىن بۇگىنگى بۋىن اباي مۇراسىنان ءنار الىپ، رۋحاني كەمەلدەنۋى قاجەت. بۇل ءۇردىس اباي جىلىنان كەيىن دە جالعاسىن تاباتىن بولادى» - دەدى وبلىس اكىمى.
ەسكەرتكىشتىڭ اشىلۋ سالتاناتىندا قازاقستان جازۋشىلار وداعىنىڭ باسقارما توراعاسى ۇ.ەسداۋلەت، اقىن ا.باقتىگەرەەۆا قۇتتىقتاۋ ءسوز سويلەپ، قر مادەنيەت جانە سپورت ءمينيسترىنىڭ كەڭەسشىسى ە.جۇرىنباەۆ ءمينيستردىڭ ارنايى قۇتتىقتاۋ ءسوزىن جەتكىزدى. شقو اباي اۋدانىنىڭ اكىمى ج.بايسابىروۆ ۇلى اقىنعا قۇرمەت كورسەتىپ جاتقان اقتوبەلىك اعايىنعا ءوز العىسىن ءبىلدىردى.
اتاپ وتەيىك، ەڭسەلى ەسكەرتكىش قالا تۇرعىندارىنىڭ كوپ جۇرەتىن جەرى اباي داڭعىلى مەن ەسەت باتىر كوشەسىنىڭ قيىلىسىنا ورناتىلدى. ەسكەرتكىشتىڭ اۆتورلارى قازاقستان رەسپۋبليكاسىنىڭ مادەنيەت قايراتكەرى، بەلگىلى ءمۇسىنشى، قازاقستان سۋرەتشىلەر وداعىنىڭ مۇشەسى توقتار ەرمەكوۆ جانە قالامىزداعى ايتەكە بي، ءجالاڭتوس ءباھادۇر، بوكەنباي باتىر، ءاليا سىندى تاريحي ەسكەرتكىشتەرىنىڭ اۆتورى جەڭىس جۇبانقوسوۆ. ەسكەرتكىش ەكاتەرينبۋرگ قالاسىندا جاسالىنعان. ەسكەرتكىشتىڭ جالپى بيىكتىگى 6,20 مەتر. تۇعىرى 2,40, ءمۇسىننىڭ ءوزى 3,80 مەتر.