بقو-دا 16 جاستاعى بويجەتكەن ءۇش بالانى ورتتەن قۇتقارىپ قالدى،دەپ حابارلايدى «ادىرنا» ۇلتتىق پورتالى قر توتەنشە جاعداي مينيسترلىگىنىڭ ءباسپاسوز قىزمەتىنە سىلتەمە جاساپ.
مينيسترلىكتىڭ رەسمي وكىلى تالعات ءۋاليدىڭ ايتۋىنشا، 2020 جىلعى 27 قازان كۇنى ساعات 02.12-دە باتىس قازاقستان وبلىسى جانىبەك اۋداندىق ءورت ءسوندىرۋ قىزمەتى كەزەكشى-ديسپەتچەرلىك ءبولىمىنىڭ پۋلتىنە جانىبەك اۋىلى، شارافۋدينوۆا 5/2 كوشەسىندە جەكە تۇرعىن ءۇي جانىپ جاتقانى جونىندە حابار كەلىپ تۇسكەن.
«ءورت جۇمىستارىن بارلاۋ كەزىندە جالپى اۋدانى 25 شارشى مەتر قۇرايتىن ەكى پاتەرلى ءۇي جانىپ جاتقانى انىقتالعان. وقيعا ورنىنان 1983 جىلى تۋىلعان ءۇيدىڭ قوجايىنى ۋلى گازعا ۋلانۋ بەلگىلەرىمەن اۋرۋحاناعا جەتكىزىلگەن. الايدا، ۋلى گازدىڭ ۋلانعان ءۇي قوجايىنى ەسىن جيماستان، اۋرۋحانادا كوز جۇمدى.
ەرەكشە اتاپ وتەتىن جايت، ءورت-سوندىرۋشىلەر وقيعا ورنىنا جەتكەنگە دەيىن جەكە تۇرعىن ءۇيدىڭ تەرەزەسىنەن ءۇي قوجايىنىنىڭ قىزى 2004 جىلى تۋعان ءجاسوسپىرىم وزىنەن كىشى 2 ءسىڭىلىسى مەن 1 باۋىرىن تەرەزەدەن ءوزى شىعارىپ العان»،-دەلىنگەن حابارلامادا.
ورتسوندىرۋشىلەر ەكى پاتەرلى ءۇيدىڭ ەكىنشى بولىگىن ورتتەن ساقتاپ قالدى. الدىن الا بولجام بويىنشا، ءورت ەلەكتر جابدىعىن پايدالانۋ كەزىندەگى ءورت قاۋىپسىزدىگى ەرەجەسىنىڭ ساقتالماعاندىعىنان شىققان بولۋى مۇمكىن.
«ادىرنا» ۇلتتىق پورتالى
