قازىرگى وتپەگەن زاماندا، ءدىن–مۇسىلمان اماندا، ۇلىبريتانيا دەگەن ەلىندە، لوندون دەگەن جەرىندە، سورەپ–سورەپ تاستاعان كامپيتتەي تىرىق، ەرنى جىرىق، جەلكەسى قۇيقا، شاشى بۇيرا، ەرىنى ءولىپ قالعان كەسىرتكە، ءوزى ءبىر سەكىرىپ جۇرگەن شەگىرتكە، سيراقتارى كەۋىپ قالعان بۇتاقتاي، ميى قۇرتتتاپ كەتكەن ۇنتاقتاي، لاقاپ اتى– بورات دەگەن، ءبىزدىڭ ەلدى مازاقتاپ، ەسەكتىڭ ميىن جەگەن، شىن اتى– كوەن ساشا، سۇيىكتى اسى–ماننايا كاشا... ءومىر ءسۇرىپتى.
ءبىر كۇنى نامىس پاتشا ۋازىرلەرىن شاقىرىپ الدى:
–بورات دەگەن بىرەۋ وسىدان ءبىراز بۇرىن ەلىمىزدى مازاقتايتىن فيلم ءتۇسىرىپ، الەمگە ماسقارامىزدى شىعارعان ەدى. ەندى ەتپەتىنەن جاتىپ الىپ، ەسەكتەي اقىرىپ الىپ، «بورات–2» دەگەن مازاق فيلم ءتۇسىرىپتى. ونىڭ جارناماسىنا ءوزىنىڭ تىرجالاڭاش ەسكەرتكىشىن تۇرعىزىپ، جاندايشاپتارىنا كوك تۋىمىزدى قورلاتىپ، تاپتاتىپ، جالاڭاش ەسكەرتكىشكە جاۋىپ قويىپتى. نامىستارىڭ بار شىعار، دەرەۋ، ونىڭ باسىن شاۋىپ اكەلىڭدەر، جەرگە كىرىپ كەتسە دە، ىزدەپ، تاۋىپ اكەلىڭدەر! –دەپ بۇيىردى.
ء–لابباي، تاقسىر، بۇيرىعىڭىز قازاقستان قىلمىستىق كودەكسىنىڭ «ار–نامىس» بابىنىڭ 00 بابى بويىنشا ورىندالادى! –دەدى باس ءۋازىر.
–باسىن قاعىپ الىڭدار، شاشىن قىرىپ تاستاپ، پىستە ماي جاعىپ الىڭدار!
باس ءۋازىر ەكى شپيون ءۋازىرىن ەرتىپ الىپ، قولدارىندا نايزا، بەلدەرىندە قايقى قىلىشپەن ۇلىبريتانياعا اتتاندى. بۇل كەزدە ەلىمىزدە پاندەميا ءجۇرىپ جاتقاندىقتان، ۇلىبريتانياعا ۇشاقتار ۇشپايتىن ەدى. ولار جولاي ەرتەگىلەر ەلىندەگى تاۋسوعار مەن كولتاۋىساردى ەرتىپ الدى. ءتىپتى، زۇلىمدىقتىڭ جارشىسى مىستان كەمپىر دە قوسىلا كەتتى. ونى ايتاسىز، «قىز–جىبەكتەگى» بەكەجان باتىر مەن تولەگەن دە سوڭدارىنان ىلەستى. ولار لوندوننىڭ «ساسىقتار» كافەسىنە كىرىپ كەلگەندە، بورات باسىن قاسىپ، ءبىر سۇلۋ بيكەشتىڭ قوس انارىنان يىسكەپ وتىرعان. باس ءۋازىر:
–كتو پو يمەني بورات؟ –دەپ سۇرادى اعىلشىن ءتىلىن بىلمەگەندىكتەن.
–كەشىرىڭىز، مەن عوي، –دەدى بورات قىزدىڭ توسىنەن باسىن جۇلىپ الىپ.
–ايىپقا بۇيرماڭىز، ءسىزدىڭ باسىڭىز كەرەك ەدى، –دەدى تولەگەن باتىر.
–قالاي سوندا؟
–پاتشامىز باسىڭىزدى كەرەك ەتىپ جاتىر.
بوراتتتىڭ بۇتىنان فونتان اتقىلادى. جىبەرىپ قويدى. ورنىنان قالتىراي تۇرىپ:
–سوندا مەنىڭ باسىمدى شاۋىپ الماقشىسىزدار ما؟ پوليتسيا! –دەپ ايقاي سالدى. بەس التى پوليتسيا جۇگىرىپ كەلىپ ەدى، بەكەجان ساداعىمەن ءبىرىن مۇرتتاي ۇشىردى. ەكىنشىسىن تولەگەن تاسپەن ءبىر ۇرىپ قۇلاتتى. ءۇشىنشىسىن مىستان كەمپىر جەلكەسىنەن تىستەپ جىلاتتى. بورات كافەدەن تۇرا قاشتى. ولار قۋىپ كەپ بەرسىن. ءبىر جەرلەرگە كەلگەندە، بوراتتىڭ ارتىندا تۇرعان ساياسات سايقالدارى شىققان ەدى، ۋرالاپ، تاۋسوعار ەكى تاۋدى جۇلىپ الىپ، ولارعا قاراي اتتى تۋرالاپ. ودان دا قۇتىلعان بوراتتىڭ بوربايى شىپ–شىپ تەرلەپ، شاشى جالبىراپ، ءوزى قالتىراپ، ءبىر كولگە سۇڭگىدى دە كەتتى.بالىق سياقتى كورىنبەي قالدى. باس ءۋازىر كولتاۋىسارعا قارادى. كولتاۋىسار كولدى ءبىر رەت قانا ۇرتتاپ ەدى، بىرەۋ قارنىن شاپاتتاپ قۇم ۇستىندە جاتىر. بورات قوي. باس ءۋازىردى كورىپ، باسىن قۇمعا تىعىپ الىپ، قۇيرىعىن كوككە قاراتا، توڭقايىپ قالىپ ەدى، مىستان كەمپىر قۇيرىعىن شىمشىپ:
–بالام، ساعان تاڭ قالام، نە ىستەدى مەنىڭ دالام؟ تۇرا عوي! –دەدى كەتىك ءتىسىن كورسەتە، كەڭكىلدەي كۇلىپ. بورات باسىن قۇمنان جۇلىپ الىپ، ەڭكىلدەپ جىلاي باستادى. بىراق وعان باس ءۋازىر قاراسىن با، قايقى قىلىشپەن باسىن شاۋىپ الدى. دومالاپ كەتكەن باستى ءبىر جەردەن مىستان كەمپىر تاۋىپ الدى.ەتەگىنەن ءتۇسىپ كەتىپ ەدى، باسى دومالاپ بارا جاتىپ كەشىرىم سۇراپ جاتىر. قازاق حاندىعىنان. قازاق ەلىنەن. كەشىرەمىز بە، قايتەمىز؟
مۇحتار شەرىمنىڭ قىشقىل ساتيراسى،
«ادىرنا» ۇلتتىق پورتالى
