Muhtar Sherim. Borattyń basy (Eresekterge ertegi)

5003
Adyrna.kz Telegram
Qazirgi ótpegen zamanda, din–musylman amanda, Ulybrıtanııa degen elinde, London degen jerinde, sorep–sorep tastaǵan kámpıtteı tyryq, erni jyryq, jelkesi quıqa, shashy buıra, erini ólip qalǵan kesirtke, ózi bir sekirip júrgen shegirtke, sıraqtary keýip qalǵan butaqtaı, mıy qurtttap ketken untaqtaı, laqap aty– Borat degen, bizdiń eldi mazaqtap, esektiń mıyn jegen, shyn aty– Koen Sasha, súıikti asy–mannaıa kasha... ómir súripti.
Bir kúni Namys patsha ýázirlerin shaqyryp aldy:
–Borat degen bireý osydan biraz buryn elimizdi mazaqtaıtyn fılm túsirip, álemge masqaramyzdy shyǵarǵan edi. Endi etpetinen jatyp alyp, esekteı aqyryp alyp, «Borat–2» degen mazaq fılm túsiripti. Onyń jarnamasyna óziniń tyrjalańash eskertkishin turǵyzyp, jandaıshaptaryna kók týymyzdy qorlatyp, taptatyp, jalańash eskertkishke jaýyp qoıypty. Namystaryń bar shyǵar, dereý, onyń basyn shaýyp ákelińder, jerge kirip ketse de, izdep, taýyp ákelińder! –dep buıyrdy.
–Lábbaı, taqsyr, buıryǵyńyz Qazaqstan qylmystyq kodeksiniń «Ar–namys» babynyń 00 baby boıynsha oryndalady! –dedi bas ýázir.
–Basyn qaǵyp alyńdar, shashyn qyryp tastap, piste maı jaǵyp alyńdar!
Bas ýázir eki shpıon ýázirin ertip alyp, qoldarynda naıza, belderinde qaıqy qylyshpen Ulybrıtanııaǵa attandy. Bul kezde elimizde pandemııa júrip jatqandyqtan, Ulybrıtanııaǵa ushaqtar ushpaıtyn edi. Olar jolaı ertegiler elindegi taýsoǵar men kóltaýysardy ertip aldy. Tipti, zulymdyqtyń jarshysy mystan kempir de qosyla ketti. Ony aıtasyz, «Qyz–Jibektegi» Bekejan batyr men Tólegen de sońdarynan ilesti. Olar Londonnyń «Sasyqtar» kafesine kirip kelgende, Borat basyn qasyp, bir sulý bıkeshtiń qos anarynan ıiskep otyrǵan. Bas ýázir:
–Kto po ımenı Borat? –dep surady aǵylshyn tilin bilmegendikten.
–Keshirińiz, men ǵoı, –dedi Borat qyzdyń tósinen basyn julyp alyp.
–Aıypqa buırmańyz, sizdiń basyńyz kerek edi, –dedi Tólegen batyr.
–Qalaı sonda?
–Patshamyz basyńyzdy kerek etip jatyr.
Boratttyń butynan fontan atqylady. Jiberip qoıdy. Ornynan qaltyraı turyp:
–Sonda meniń basymdy shaýyp almaqshysyzdar ma? Polıııa! –dep aıqaı saldy. Bes alty polıııa júgirip kelip edi, Bekejan sadaǵymen birin murttaı ushyrdy. Ekinshisin Tólegen taspen bir uryp qulatty. Úshinshisin mystan kempir jelkesinen tistep jylatty. Borat kafeden tura qashty. Olar qýyp kep bersin. Bir jerlerge kelgende, Borattyń artynda turǵan saıasat saıqaldary shyqqan edi, ýralap, taýsoǵar eki taýdy julyp alyp, olarǵa qaraı atty týralap. Odan da qutylǵan Borattyń borbaıy shyp–shyp terlep, shashy jalbyrap, ózi qaltyrap, bir kólge súńgidi de ketti.Balyq sııaqty kórinbeı qaldy. Bas ýázir kóltaýysarǵa qarady. Kóltaýysar kóldi bir ret qana urttap edi, bireý qarnyn shapattap qum ústinde jatyr. Borat qoı. Bas ýázirdi kórip, basyn qumǵa tyǵyp alyp, quıryǵyn kókke qarata, tońqaıyp qalyp edi, mystan kempir quıryǵyn shymshyp:
–Balam, saǵan tań qalam, ne istedi meniń dalam? Tura ǵoı! –dedi ketik tisin kórsete, keńkildeı kúlip. Borat basyn qumnan julyp alyp, eńkildep jylaı bastady. Biraq oǵan bas ýázir qarasyn ba, qaıqy qylyshpen basyn shaýyp aldy. Domalap ketken basty bir jerden mystan kempir taýyp aldy.Eteginen túsip ketip edi, basy domalap bara jatyp keshirim surap jatyr. Qazaq handyǵynan. Qazaq elinen. Keshiremiz be, qaıtemiz?

Muhtar Sherimniń qyshqyl satırasy,

«Adyrna» ulttyq portaly

Pikirler