«مەن ەرەكشەمىن. مەن مەكتەپكە بارا المايمىن. بىراق مەن دە ساباق وقي الامىن. مەن جۇگىرە المايمىن. بىراق مەن دە ويناي الامىن. مەن وزدىگىمنەن اس ىشە المايمىن. بىراق مەن دە ءتاتتىنى جاقسى كورەمىن»...بۇل سوزدەر جارىمجان بالاقايلاردىڭ مونولوگى. بۇل سوزدەر ءسىز بەن ءبىز ەستي بەرمەيتىن مۇگەدەك بالالاردىڭ جانايقايى.
دەرەكتەرگە سۇيەنسەك، جەر شارى تۇرعىندارىنىڭ 10 پايىزى مۇگەدەكتەر. ال، مۇمكىندىگى شەكتەۋلى جاندار – قوعامىمىزدىڭ ءبىر بولىگى. ولاردىڭ وزىندىك شەشىمىن كۇتىپ تۇرعان ماسەلەلەرى دە از ەمەس.
الايدا، وسىنداي ءالسىز جانداردىڭ قاسىندا ءومىرىنىڭ كوپ بولىگىن وتكىزەتىن قىزمەتكەرلەر تۋرالى ءبىز كوبىنە ويلانا، ءمان بەرە بەرمەيمىز. مۇگەدەك جانداردىڭ كۇتۋشىسىن ءبىزدىڭ قوعامدا الەۋمەتتىك سالا قىزمەتكەرلەرى دەپ اتايدى. مىنە، وسى قىزمەتكەرلەردىڭ ەلىمىزدەگى الەۋمەتتىك ستاتۋسى مەن جاعدايى قانداي ەكەن؟
الەۋمەتتىك قىزمەتكەرلەردىڭ ايلىق تابىسى قانداي؟
الەۋمەتتىك قىزمەتكەر: «جۇمىسىمىزدىڭ قيىندىعىنا قاراماستان بىزدەرگە تولەنەتىن ايلىق جالاقى وتە تومەن. مۇگەدەكتەرمەن جۇمىس جاساۋ وڭاي ەمەس، ءارى ەكىنىڭ ءبىرىنىڭ جۇرەگى داۋالامايدى. وسى فاكتورلاردى ەسكەرىپ، ءبىزدىڭ ايلىق تابىسىمىزدى كوتەرسە ەكەن دەيمىز. سوندا وسى سالاعا كەلەتىن مامانداردىڭ دا سانى ارتار ەدى».
ءيا، الەۋمەتتىك قىزمەتكەرلەردىڭ 40 مىڭنان 90 مىڭعا دەيىنگى الاتىن جالاقى دەڭگەيىنىڭ ولار اتقارىپ وتىرعان اۋىر جۇمىسقا سايكەس كەلمەۋى سالدارىنان بىلىكتى كادرلاردىڭ تاپشىلىعى ءالى دە بولسا سەزىلۋدە.
مۇگەدەكتەرگە بەرىلگەن مۇمكىندىك
«جامبىل وبلىستىق مۇگەدەك بالالاردى وڭالتۋ جانە بەيىمدەۋ ورتالىعى» وڭىردەگى الەۋمەتتىك قىزمەت كورسەتۋدىڭ وزىق ۇلگىسىن كورسەتىپ كەلەدى. مەكەمەدەن مەيىرىمدى مەيىربيكە دە، بالا جانىن تەرەڭ تۇسىنەتىن پسيحولوگ تا، دەفەكتولوگ تە تابىلادى. بۇل ارنايى ءبىلىم بەرۋ ورتالىعى بولماسا دا، ەرەكشە بالالاردىڭ دامۋى ءۇشىن ۇنەمى جاعداي جاسايدى. ءارتۇرلى مەرەكەلىك شارالار، سپورتتىق جارىستار ۇيىمداستىرىپ، ءار بالانىڭ تۇلعالىق ءارى جان-جاقتى تانىلۋىن باستى ورىنعا قويادى. مۇنداي شارالارعا ءجيى قاتىسقان بالانىڭ كوڭىلىندە سەنىمدىلىك پايدا بولىپ، ومىرگە دەگەن قۇشتارلىعى دا ارتاتىنىن دا پسيحولوگتار راستاپ وتىر.
جۇرەگى كەڭ جامبىلدىقتار ورتالىق عيماراتىنىڭ تار بولۋىنا بايلانىستى، بۇرىن بالا سىيدىرا الماي قينالۋشى ەدى. مىنبەردەگىلەردىڭ مۇگەدەكتەرگە مەيىرىمى ءتۇسىپ بۇگىندە بالالاردى وڭالتۋ ورتالىعىنىڭ جاڭا عيماراتىن اشىپ بەردى. بۇل شارا جامبىل وبلىسى اكىمدىگىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنىڭ باستاماسىمەن جۇزەگە استى. مەرەكەگە مۇرىندىق بولعان باسقارما باسشىسى جورابەك نۇرمەرگەنۇلى باۋبەكوۆ قازان ايىنىڭ 7 كۇنى ورتالىقتىڭ جاڭا عيماراتىنىڭ كىلتىن تابىس ەتتى.
اتقارىلعان شارۋالاردى ءسۇزىپ شىقساق:
- 2700 شارشى مەتردى قامتيتىن بۇرىنعى ورتالىق عيمارات ماڭايىن اباتتاندىرىپ، تولىقتاي كۇردەلى جوندەۋدەن وتكىزۋگە وبلىستىق بيۋدجەتتەن 160 413,0 تگ ءبولىندى. جوندەۋ جۇمىستارى 6 ايدى قامتىپ، 2020 جىلدىڭ 22 قىركۇيەگىندە اياقتالدى. ورتالىقتىڭ ماتەريالدىق بازاسىن جاقسارتۋ ماقساتىندا جيھازدار مەن ارنايى جابدىقتار ءۇشىن 12 556,0 تگ قاراجات جۇمسالدى.
- كۇردەلى جوندەۋدەن وتكەن 3 قاباتتى عيماراتتا سەنسورلىق بولمە، مانتەسسوري كابينەتى جانە دەفەكتولوگ، لوگوپەد ماماندارى ساباق وتكىزەتىن 3 وقۋ بولمەلەرى بار.
- مەديتسينالىق بلوك: ەمدىك دەنە شىنىقتىرۋ، ۋقالاۋ بولمەسى، وقشاۋلاۋ، فيزيوەمدەۋ، ستەريليزاتسيالاۋ جانە دارىگەرلەر مەن ەمشارا بولمەلەرى بار. قىزمەت الۋشى بالالارعا ارنالعان سالتاناتتى ءىس- شارالار وتكىزەتىن مۋزىكا زالى بار.
- مەكتەپكە دەيىنگى جاستاعى 44 بالا 4 توپ بويىنشا بولىنگەن. قىزمەت الۋشى بالالار ءۇشىن ويىن، شەشىنۋ، ۇيىقتايتىن بولمەلەر قاراستىرىلعان. مەكتەپ جاسىنداعى 24 جەتكىنشەك ءۇشىن ارنايى ەڭبەك باۋلۋ، بالالاردىڭ ءجۇرىپ، تۇرۋىنا ىڭعايلاستىرىلعان ليفت جانە ويىن بولمەلەرى بار. ءبىرىنشى جانە ءۇشىنشى قاباتتاردا بالالاردىڭ 2 مەزگىل تاماقتانۋى ءۇشىن اسحانا ورنالاسقان. عيماراتتىڭ اۋماعىندا 5 ويىن الاڭى بار.
- سونداي- اق ورتالىققا ارنايى وڭالتۋ جۇمىستارىنا قاجەتتى جابدىقتار ساتىپ الىندى: ورتوپەديالىق ستولدار، ۆەرتيكاليزاتورلار، ۇلكەن قۇرعاق باسسەين، «فاەتون»، «گراۆيستات» سەكىلدى ارناي نەيروتەراپيالىق كوستيۋمدەر،فيزيوتەراپيالىق جابدىقتار جانە ميكروپوللياريزاتسيالار.
- ورتالىقتىڭ جاڭا عيماراتىنىڭ اشىلۋى سەبەپتى قىزمەت الۋشىلار سانى 40 بالادان، 68-گە كوبەيتىلدى. وسىعان وراي قوسىمشا 28 جاڭا قىزمەتكەر جۇمىسپەن قامتىلدى.
«ءبارىمىز بىردەيمىز، كەمسىتۋدى بىلمەيمىز». مۇمكىندىگىن تاعدىر تارىلتقان جانداردىڭ كوڭىلىن اۋلاۋ - كىمنىڭ بولسا دا كىسىلىك پارىزى. وسى ورايدا الەۋمەتتىك قورعاۋ جۇيەسى قىزمەتكەرلەرىنىڭ ءرولى ەرەكشە. ايتا كەتەيىك، ەلباسىنىڭ «قازاقستان رەسپۋبليكاسىنىڭ مەرەكەلەرى تۋرالى» جارلىعىنا سايكەس، قازان ايىنىڭ ەكىنشى جەكسەنبىسى – مۇمكىندىگى شەكتەۋلى ازاماتتار كۇنى، ال، سوڭعى جەكسەنبىسى - الەۋمەتتىك قورعاۋ جۇيەسى قىزمەتكەرلەرىنىڭ كۇنى بولىپ بەلگىلەنگەن. ايتىلمىش شارا وسى مەرەكەگە وراي ۇيىمداستىرىلدى. سوندىقتان، كومەككە مۇقتاج جاندار مەن الەۋمەتتىك سالا وكىلدەرىنىڭ ءوزارا بايلانىسى دا بەكەم، مەرەكەلەرى دە مازمۇنداس.
«ادىرنا» ۇلتتىق پورتالى.
