مادەنيەت جانە سپورت ءمينيسترى اقتوتى رايىمقۇلوۆا ءانشى ءمولدىر اۋەلبەكوۆانىڭ «ءدىني ناسيحاتىنا» قاتىستى پىكىر ءبىلدىردى دەپ حابارلايدى «ادىرنا» ۇلتتىق پورتالى sputnik.kz اگەنتتىگىنە سىلتەمە جاساپ.
ورتالىق كوممۋنيكاتسيالار قىزمەتىندە وتكەن ونلاين بريفينگتە تىلشىلەر ءمولدىر اۋەلبەكوۆانىڭ ءدىني اڭگىمە ايتۋىنا بايلانىستى سۇراق قويدى.
«قازىرگى كەزدە تانىمال ادامدار الەۋمەتتىك جەلىدە ءوزىنىڭ ءدىني كوزقاراسىن اشىق ايتىپ ءجۇر. ولاردىڭ ىشىندە «قازاقكونتسەرتتىڭ» قىزمەتكەرلەرى دە بار. ماسەلەن، ءمولدىر اۋەلبەكوۆا ءبىر پوستىندا مەكتەپكە باراتىن قىزدارعا باسىن جاۋىپ بارۋعا بولاتىنىن جازعان. سونى ءوزى دە قولدايدى. وركەنيەتتى ەلدە مەملەكەتتىك كاسىپورىن قىزمەتكەرىنىڭ وسىنداي ناسيحات جۇرگىزگەنى دۇرىس پا؟» – دەدى جۋرناليستەر.
مادەنيەت جانە سپورت ءمينيسترى اقتوتى رايىمقۇلوۆا ءانشى وبرازىنىڭ وزگەرگەنىن بايقاعان. وسى ورايدا ول وركەنيەتتى ەلدىڭ ەرەجەلەرىن ساقتاۋ قاجەتتىگىن جەتكىزدى.
ءمولدىر اۋەلبەكوۆا جاقىندا عانا تۇرمىسقا شىققانىن اتاپ وتكەن مينيستر، ونىڭ تۇسكەن شاڭىراعىنداعى ءدىني ۇستانىمعا بايلانىستى ول وبرازىن ءبىرشاما وزگەرتكەن بولۋى مۇمكىن ەكەنىن ەسكە سالدى.
«ارينە، ونىمەن عانا ەمەس، مادەنيەت سالاسىنىڭ باسقا دا قىزمەتكەرلەرىمەن ۇنەمى ءتۇسىندىرۋ جۇمىستارى جۇرگىزىلەدى. سەبەبى ولار – تانىمال ادامدار. ولاردىڭ سوزىنە ميلليونداعان ادام قۇلاق اسادى. ءيا، ءوز پىكىرىن بىلدىرە الادى، بىراق بۇل ونىڭ جۇمىس ىستەيتىن ۋاكىلەتتى ورگاننىڭ نەمەسە ۇيىمنىڭ رەسمي كوزقاراسى بولىپ سانالمايدى»، – دەدى رايىمقۇلوۆا.
مينيستر حالىقتىڭ نازارىندا جۇرگەن ادامداردى وركەنيەتتى ەلدىڭ ەرەجەلەرىن ۇستاۋعا ۇندەدى.
ايتا كەتەيىك، ءانشى ءمولدىر اۋەلبەكوۆا كارانتين ۋاقىتىندا ەكىنشى رەت تۇرمىسقا شىققان بولاتىن.
«ال، حالقىم! قاسيەتتى رامازان ايىندا اللانىڭ قالاۋىمەن ەكى دۇركىن ورامالدى بولدىم! ءالحامدۋليللياح! قۇتتى بولسىن!»، – دەپ جازدى ول ءوز پاراقشاسىندا.
ءانشى تويدان كەيىن ورامال تاعا باستادى. سول ءۇشىن قالىڭ كوپشىلىكتىڭ سىنىنا دا ۇشىرادى.
