قر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ ءبولىم جەتەكشىسى الۋا جولدىبالينا مەملەكەت باسشىسىنىڭ بۇگىن جولداعان ۇندەۋىنە قاتىستى پىكىر ءبىلدىردى، دەپ حابارلايدى قازاقپارات. «پرەزيدەنت قاسىم-جومارت توقاەۆتىڭ پارلامەنتى ءماجىلىسى دەپۋتاتتارىنىڭ كەزەكتى سايلاۋىن تاعايىنداۋ تۋرالى جارلىعى ءبىرشاما ۋاقىت بويى ساراپشىلار بولجاعان وقيعالاردىڭ ءبىرى بولدى.
جالپى، ءسال ستاتيستيكاعا نازار اۋدارايىق. ەلىمىزدە وسى كۇنگە دەيىن 6 پارلامەنتتىك سايلاۋ وتكەن بولاتىن، ونىڭ ىشىندە 3 پارلامەنتتىك سايلاۋ (2007 ج.، 2012 ج.، 2016 ج.) كەزەكتەن تىس ءوتتى. سونىمەن قاتار، 3 پارلامەنتتىك سايلاۋ (1995 ج.، 1999 ج.، 2004 ج.) كەزەكتى سيپاتقا يە بولعان بولاتىن. ەندىگى 7-ءشى پارلامەنتتىك سايلاۋ دا كەزەكتى سيپاتقا يە»، دەدى ا. جولدىبالينا. ونىڭ اۋتۋىنشا، بۇل پارلامەنتتىك سايلاۋدىڭ وزىندىك ەرەكشەلىگى – سايلاۋ پروتسەسىنە دە، ساياسي پارتيالار جۇمىسىنا دا 2020 جىل بويى بىرقاتار جاڭاشىلدىقتار ەنگىزىلگەن بولاتىن، ياعني، بۇل سايلاۋدا ءبىرىنشى رەت پارتيالىق ءتىزىمدى قالىپتاستىرۋداعى 30 پايىزدىق كۆوتا ەرەجەسى جۇزەگە اسىرىلادى.
سونداي-اق، ەگەر وسىعان دەيىن وتكەن سايلاۋلاردا ماسليحات دەپۋتاتتارىن ءبىر مانداتتى وكرۋگتەر بويىنشا سايلاسا، ەندىگى كەزەكتە، ەڭ العاشقى رەت پارتيالىق ءتىزىم بويىنشا وتەدى، ياعني وبلىستىق، قالالىق، اۋداندىق ماسليحاتتاردىڭ دەپۋتاتتارىنىڭ بارلىعى پارتيالىق ءتىزىم بويىنشا سايلانادى. «بۇل پرينتسيپ پارتيالاردىڭ ءوزارا باسەكەلەستىگىن، ايماقتاردا ماسليحات جۇمىسىنىڭ ءارى قاراي بەلسەنە ءتۇسىپ، پارتيالاردىڭ جاۋاپكەرشىلىگىن ارتتىرۋعا مۇمكىندىك بەرەدى. ەگەر وسىعان دەيىن پارتيالار كوبىنە ورتالىق دەڭگەيدە كوبىرەك جۇمىس اتقارسا، بۇگىننەن باستاپ ايماقتارداعى جۇمىسىن ارتتىرۋى ءتيىس.
سونىمەن قاتار، پارتيالار سايلاۋالدى كامپانياسىندا، ايماقتىق دەڭگەيدە ءوز جۇمىسىن بەلسەندى سيپاتقا نەگىزدەپ، ايماقتارداعى وزەكتى ماسەلەلەردى جانە حالىقتىڭ نەگىزگى تالاپ-تىلەكتەرىن تۇبەگەيلى تالداپ، ولاردى شەشۋدە ءوز جۇمىسىن كورسەتە الادى، ياعني، پارتيا جۇمىسىندا ايماقتىق كومپونەنت ارتادى دەگەن ءسوز»، - دەپ تولىقتىردى ول.
ساراپشىنىڭ پىكىرىنشە، پارلامەنت جانە ماسليحات دەپۋتتاتتارى سايلاۋىنىڭ ءبىر مەرزىمدە ءوتۋى قارجىلىق شىعىنداردى دا ۇنەمدەۋگە مۇمكىندىك بەرەدى، سونداي-اق، كارانتين ءتارتىبىن ەسكەرە وتىرىپ، سايلاۋ كامپانياسىن وڭتايلى جۇرگىزۋگە، سايلاۋدى ۇيىمداستىرىپ، ءتيىمدى وتكىزۋگە سەپتيگىن تيگىزەدى، ياعني كوپتەگەن پارتيالار سايلاۋ كامپانياسىن جۇرگىزۋدە كارانتين ءتارتىبىن ەسكەرە وتىرىپ، وزىندىك جاڭاشىل ساياسي تەحنولوگيالاردى قولدانۋى مۇمكىن.
«بۇگىندە بىرقاتار ەلدەر كارانتينگە قاراماستان، پارلامەنتتىك سايلاۋدى وتكىزۋدە. ەڭ العاشقىلاردىڭ ءبىرى – وڭتۇستىك كورەيا بولاتىن. سونداي-اق، پارلامەنتتىك سايلاۋ 21 ماۋسىمدا سەربيادا، 4 قازاندا قىرعىزستاندا، 11 قازاندا ليتۆادا كارانتين تارتىبىندە ءوتتى. 31 قازاندا گرۋزيادا دا پارلامەنتتىك سايلاۋ وتەدى. سونىمەن قاتار، 13 قىركۇيەكتە رەسەي بىرىڭعاي داۋىس بەرۋ كۇنىن وتكىزگەن بولاتىن. سونىمەن، كارانتين ءتارتىبى ساياسي پروتسەستەردىڭ جۇزەگە اسۋىنا توسقاۋىل ەمەستىگىن، كەرىسىنشە، قالىپتى ساياسي دامۋدى ءارى قاراي جالعاستىرۋعا مۇمكىندىك بەرىپ وتىر»، - دەدى ساراپشى.
