قىرعىزستان پرەزيدەنتىنىڭ مىندەتىن اتقارۋشى سادىر جاپاروۆ ەگەر زاڭناماعا وزگەرىس ەنگىزىلسە، پرەزيدەنتتىك سايلاۋعا قاتىسۋعا دايىن ەكەنىن مالىمدەدى، - دەپ حابارلايدى «ادىرنا» ۇلتتىق پورتالى ريا نوۆوستيگە سىلتەمە جاساپ.
قازىرگى زاڭناماعا سايكەس پرەزيدەنت مىندەتىن اتقارۋشى پرەزيدەنتتىككە كانديدات بولا المايدى.
سادىر جاپاروۆ «روسسيا 24» ارناسىنا بەرگەن سۇحباتىندا: «قازىر پارلامەنت پرەزيدەنتتىك جانە پارلامەنتتىك سايلاۋ تۋرالى زاڭناماعا تۇزەتۋلەر دايىنداپ جاتىر. ەگەر زاڭداعى وسى وزگەرىستەردىڭ ناتيجەسىندە سايلاۋعا قاتىسۋعا رۇقسات بەرىلسە، مەن قاتىسامىن»، - دەگەن.
جاپاروۆتىڭ ايتۋىنشا، ءالى ناقتى شەشىم قابىلدانباعاندىقتان، بۇل تۋرالى كەسىپ ايتۋ مۇمكىن ەمەس.
ەستەرىڭىزگە سالا كەتسەك، قىرعىزستاندا 5 قازاندا 4 قازان كۇنى وتكەن پارلامەنت سايلاۋىنىڭ ناتيجەلەرىمەن كەلىسپەۋدەن جاپپاي نارازىلىقتار باستالدى. نارازىلىق بىلدىرۋشىلەر وپپوزيتسيالىق پارتيا پارلامەنتكە وتپەگەندىكتەن، قاۋىپسىزدىك كۇشتەرىمەن قارسىلاسىپ، پرەزيدەنت اكىمشىلىگى ورنالاسقان پارلامەنت عيماراتىن باسىپ الدى. قاقتىعىستان 1,2 مىڭنان استام ادام جاراقات الىپ، بىرەۋى قازا تاپقان. ال قىرعىزستان پرەمەر-ءمينيسترى كۋباتبەك بورونوۆ وتستاۆكاعا كەتتى. سونىمەن قاتار 15 قازاندا سوورونباي جەەنبەكوۆ تە پرەزيدەنت قىزمەتىن بوساتقان-دى.
ايتا كەتەيىك، قىرعىزستاندا پارلامەنت سايلاۋى وسى جىلدىڭ 20 جەلتوقسانىندا، ال پرەزيدەنت سايلاۋى 2021 جىلدىڭ 17 قاڭتارىندا ءوتۋى مۇمكىن.
فوتو اشىق دەرەككوزدەن الىندى
«ادىرنا» ۇلتتىق پورتالى
