قازاقستاندا بيىلعى تامىزدا 17 835 ادام قايتىس بولدى. بۇل تۋرالى قازاقستان ستاتيستيكا كوميتەتىنىڭ جاڭارعان دەرەگىنەن كورۋگە بولادى. ءولىم سانى بىلتىرعى تامىزبەن سالىستىرعاندا 1,7 ەسە وسكەن دەپ حابارلايدى «ادىرنا» ۇلتتىق پورتالى ازاتتىق سايتىنا سىلتەمە جاساپ.
رەسمي ستاتيستيكاعا سايكەس، 2018 جىلعى تامىزدا 9963 ادام، 2019 جىلعى تامىزدا 10 477 ادام كوز جۇمعان. بيىل تامىزدا وتكەن جىلدىڭ تامىزىنا قاراعاندا 1,7 ەسە كوپ ادام قايتىس بولعان.
ءولىم سانى مامىر ايىنان باستاپ الدىڭعى جىلدىڭ كورسەتكىشتەرىنەن جوعارى بولىپ كەلەدى. ماسەلەن 2018-2019 جىلدارى مامىر ايىندا 11 مىڭنان استام كىسى قايتسا، 2020 جىلعى مامىردا كوز جۇمعاندار سانى 14 مىڭنان اسقان. الدىڭعى جىلدارى ماۋسىم ايىندا ورتاشا ەسەپپەن 10 مىڭ ادام قايتىس بولسا، بيىل ماۋسىمدا 15 مىڭعا جۋىق ادام ولگەن.
ەڭ ۇلكەن كورسەتكىش شىلدە ايىندا تىركەلدى. جەتىنشى ايدا ەلدە 28 178 ادام قايتىس بولدى. 2018 جىلعى شىلدەدە 11289, 2019 جىلعى شىلدەدە 12420 ادام قايتىس بولعان.
بيىل قاڭتار مەن تامىز ارالىعىندا بارلىعى 111 مىڭداي ادام كوز جۇمعان. بىلتىر وسى ارالىقتا 89 510 ادام قايتىس بولعان.
جەرگىلىكتى ساراپشىلار اراسىندا قايتىس بولۋ كورسەتكىشىنىڭ ارتۋىنا كوروناۆيرۋس پاندەمياسى اسەر ەتۋى مۇمكىن دەگەن پىكىر بار. حالىقارالىق دەڭگەيدەگى ماماندار ءولىم سانىنىڭ ارتۋىنا كوروناۆيرۋستىڭ اسەر ەتىپ وتىرعانىن راستاي وتىرىپ، بيىلعى كورسەتكىشتىڭ الدىڭعى جىلداردىڭ دەرەگىنەن ايىرىمى تۇتاستاي كوروناۆيرۋس ءولىمىن بىلدىرمەيدى دەيدى. ياعني بىلتىر 10 مىڭ ادام قايتىپ، بيىل 17 مىڭ ادام كوز جۇمسا، بىلتىرعى كورسەتكىشتەن ارتىلىپ تۇرعان 7 مىڭ ادامنىڭ ءبارى كوروناۆيرۋستان قايتىس بولماۋى مۇمكىن. جۇقپالى اۋرۋ ىندەتىنە قاتىستى "ارتىق ءولىم كورسەتكىشى" دەگەن ۇعىم قولدانىلادى. بۇل ۇعىمعا سايكەس، اۋرۋ ورشىگەن تۇستا، دەنساۋلىق ساقتاۋ سالاسىنا ارتىق سالماق ءتۇسىپ، قالىپتى جاعدايدا ەمدەلەتىن اۋرۋدان قايتىس بولاتىندار كوپ بولۋى مۇمكىن. سونىمەن قاتار ىندەتتىڭ تاراۋى جانە كارانتين شەكتەۋلەرى ادامداردىڭ پسيحيكالىق ساۋلىعىنا اسەر ەتىپ، سۋيتسيد دەڭگەيىن ارتتىرۋى ىقتيمال.
بيلىك دەرەگى بويىنشا، قازاقستاندا ەپيدەميا باستالعالى بارلىعى 109 094 ادامنىڭ كوروناۆيرۋس جۇقتىرعانى راستالدى. ونىڭ 1780-ءى كوز جۇمعان. سونىمەن قاتار ۆيرۋس جۇقتىرعانى راستالعان، بىراق "ىلەسپە اۋرۋدان قايتىس بولدى" دەگەن جۇزدەگەن ادام بار. ولاردىڭ دەرەگى كوروناۆيرۋس ستاتيستيكاسىنا قوسىلماي وتىر. 24 تامىزدا "ىلەسپە اۋرۋدان" 556 ادامنىڭ قايتىس بولعانى ايتىلعان. مۇنىڭ ءبارى Covid تەستىمەن راستالعان دەرەك.
ەل ۇكىمەتى 1 تامىزدان بەرى ۆيرۋس جۇقتىرعانى Covid تەستىمەن راستالماعان كوروناۆيرۋس پنەۆمونياسى ناۋقاستارىنىڭ ەسەبىن جۇرگىزىپ كەلەدى. ەكى ايدان استام ۋاقىتتا ەلدە بارلىعى 35 393 ادامعا كوروناۆيرۋس پنەۆمونياسى دياگنوزى قويىلعان. ونىڭ 374-ءى قايتىس بولعان.
