Qazaqstanda bıylǵy tamyzda 17 835 adam qaıtys boldy. Bul týraly Qazaqstan statıstıka komıtetiniń jańarǵan dereginen kórýge bolady. Ólim sany byltyrǵy tamyzben salystyrǵanda 1,7 ese ósken dep habarlaıdy «Adyrna» ulttyq portaly Azattyq saıtyna silteme jasap.
Resmı statıstıkaǵa sáıkes, 2018 jylǵy tamyzda 9963 adam, 2019 jylǵy tamyzda 10 477 adam kóz jumǵan. Bıyl tamyzda ótken jyldyń tamyzyna qaraǵanda 1,7 ese kóp adam qaıtys bolǵan.
Ólim sany mamyr aıynan bastap aldyńǵy jyldyń kórsetkishterinen joǵary bolyp keledi. Máselen 2018-2019 jyldary mamyr aıynda 11 myńnan astam kisi qaıtsa, 2020 jylǵy mamyrda kóz jumǵandar sany 14 myńnan asqan. Aldyńǵy jyldary maýsym aıynda ortasha eseppen 10 myń adam qaıtys bolsa, bıyl maýsymda 15 myńǵa jýyq adam ólgen.
Eń úlken kórsetkish shilde aıynda tirkeldi. Jetinshi aıda elde 28 178 adam qaıtys boldy. 2018 jylǵy shildede 11289, 2019 jylǵy shildede 12420 adam qaıtys bolǵan.
Bıyl qańtar men tamyz aralyǵynda barlyǵy 111 myńdaı adam kóz jumǵan. Byltyr osy aralyqta 89 510 adam qaıtys bolǵan.
Jergilikti sarapshylar arasynda qaıtys bolý kórsetkishiniń artýyna koronavırýs pandemııasy áser etýi múmkin degen pikir bar. Halyqaralyq deńgeıdegi mamandar ólim sanynyń artýyna koronavırýstyń áser etip otyrǵanyn rastaı otyryp, bıylǵy kórsetkishtiń aldyńǵy jyldardyń dereginen aıyrymy tutastaı koronavırýs ólimin bildirmeıdi deıdi. Iaǵnı byltyr 10 myń adam qaıtyp, bıyl 17 myń adam kóz jumsa, byltyrǵy kórsetkishten artylyp turǵan 7 myń adamnyń bári koronavırýstan qaıtys bolmaýy múmkin. Juqpaly aýrý indetine qatysty "artyq ólim kórsetkishi" degen uǵym qoldanylady. Bul uǵymǵa sáıkes, aýrý órshigen tusta, densaýlyq saqtaý salasyna artyq salmaq túsip, qalypty jaǵdaıda emdeletin aýrýdan qaıtys bolatyndar kóp bolýy múmkin. Sonymen qatar indettiń taraýy jáne karantın shekteýleri adamdardyń psıhıkalyq saýlyǵyna áser etip, sýııd deńgeıin arttyrýy yqtımal.
Bılik deregi boıynsha, Qazaqstanda epıdemııa bastalǵaly barlyǵy 109 094 adamnyń koronavırýs juqtyrǵany rastaldy. Onyń 1780-i kóz jumǵan. Sonymen qatar vırýs juqtyrǵany rastalǵan, biraq "ilespe aýrýdan qaıtys boldy" degen júzdegen adam bar. Olardyń deregi koronavırýs statıstıkasyna qosylmaı otyr. 24 tamyzda "ilespe aýrýdan" 556 adamnyń qaıtys bolǵany aıtylǵan. Munyń bári Covid testimen rastalǵan derek.
El úkimeti 1 tamyzdan beri vırýs juqtyrǵany Covid testimen rastalmaǵan koronavırýs pnevmonııasy naýqastarynyń esebin júrgizip keledi. Eki aıdan astam ýaqytta elde barlyǵy 35 393 adamǵa koronavırýs pnevmonııasy dıagnozy qoıylǵan. Onyń 374-i qaıtys bolǵan.
