مەملەكەت باسشىسى قاسىم-جومارت توقاەۆ پرەمەر-مينيستر اسقار ءماميندى قابىلدادى، دەپ حابارلايدى اقوردا سايتى.
قازاقستان پرەزيدەنتىنە بيىلعى 9 اي ىشىندەگى ەلىمىزدىڭ الەۋمەتتىك-ەكونوميكالىق دامۋ قورىتىندىلارى جونىندە ەسەپ بەرىلدى.
قاسىم-جومارت توقاەۆقا بىرقاتار سالادا دامۋدىڭ وڭ قارقىنى بايقالاتىنى باياندالدى. اتاپ ايتقاندا وڭدەۋ ونەركاسىبىنىڭ ءوسىمى 3,3 %-عا جەتكەن، قۇرىلىس كولەمى 10,5 %-عا، تۇرعىن ۇيلەردىڭ پايدالانۋعا بەرىلۋى 9 %-عا نەمەسە شامامەن 9,6 ميلليون شارشى مەترگە ارتقان. اۋىل شارۋاشىلىعىنداعى ءوسىم كورسەتكىشى 5%-دى قۇرادى. قازاقستاننىڭ التىن-ۆاليۋتا قورى مەن ۇلتتىق قور اكتيۆتەرى 1 قازانداعى مالىمەت بويىنشا 91,1 ميلليارد دوللارعا جەتتى.
ۇكىمەت باسشىسىنىڭ ايتۋىنشا، قىركۇيەكتە قىزمەت كورسەتۋ سالاسىنداعى بەلسەندىلىكتى قايتا قالپىنا كەلتىرۋ جۇمىستارى باستالدى. وسى رەتتە تامىز ايىمەن سالىستىرعاندا ساۋدا-ساتتىق 2,7 %-عا، بايلانىس 1,3%-عا، كولىك جانە قويما 1,2 %-عا ارتقان. قىزمەت كورسەتۋ سەكتورىنداعى ءوسىم شاعىن جانە ورتا بيزنەستىڭ جاندانعانىن بىلدىرەدى. بۇل جاڭا جۇمىس ورىندارىنىڭ اشىلۋىنا جانە ازاماتتاردىڭ ءال-اۋقاتىنىڭ جاقسارۋىنا ىقپال ەتەدى.
پرەمەر-مينيستر 11-12 قازان كۇندەرى ابۋ-دابي قالاسىنا جاساعان جۇمىس ساپارىنىڭ قورىتىندىلارى تۋرالى ەسەپ بەردى. اتالعان ساپار بارىسىندا مەملەكەت باسشىسى قاسىم-جومارت توقاەۆتىڭ بيىلعى قاڭتاردا بىرىككەن اراب امىرلىكتەرىنە جاساعان رەسمي ساپارى كەزىندە قول جەتكىزگەن ۋاعدالاستىقتاردىڭ ناقتى جۇزەگە اسىرىلىپ جاتقانىنا كوز جەتكىزىلدى. سونىمەن قاتار ەكى ەل ۇكىمەتتەرى ينۆەستيتسيالىق ىنتىماقتاستىق تۋرالى مەموراندۋمعا قول قويدى. وندا قۇنى 6,1 ميلليارد دوللار بولاتىن 21 جوبانى جۇزەگە اسىرۋ كوزدەلگەن. اتالعان قۇجات جوعارى قوسىمشا قۇنى بار جانە پايداسى مول، سونداي-اق، ىشكى نارىقتا دا، سىرتقى نارىقتا دا ۇلكەن سۇرانىسقا يە بولاتىن ءوندىرىس ورىندارىن اشۋعا باعىتتالعان.
مەملەكەت باسشىسى ەكونوميكانى دامىتۋدىڭ وڭ قارقىنىن قامتاماسىز ەتۋ جونىندەگى ۇكىمەتتىڭ اتقارعان ءىس-قيمىلدارىن اتاپ ءوتىپ، ازاماتتارىمىزدىڭ دەنساۋلىعىنا، شاعىن جانە ورتا بيزنەستىڭ جۇمىسىنا، سونداي-اق، جالپى ەكونوميكانىڭ دامۋىنا شەتەلدە كەڭ تاراعان كوروناۆيرۋس ىندەتىنىڭ كەرى اسەرىن بولدىرماۋ ءۇشىن پرەمەر-مينيسترگە ەلىمىزدەگى ەپيدەميولوگيالىق احۋالدى قاتاڭ باقىلاۋعا الۋدى تاپسىردى.
"ادىرنا" ۇلتتىق پورتالى
